Nimlivolivon 4 - Seysyo No Tao

Pacicin da si Pite a kani Yowani do rako a peykeykaygyan

¹ No kapangnanao da pa ni Pite a kani Yowani do aro a tao am to sira ngai o mapatanatanang so nakem da si Ama ta do to a kano panirsirngen da no mamzamzat do rako a panaralayan a kano tao a macyagom do Satokay.

² Meyoyaoya sira makamizing sya, ta ipangnanao da Pite a kani Yowani o kanimirwa na mavyay ni Yeso. Ta si Yeso am yongkad no kanoyong no nimawakwak rana tao a mirwa a mavyay.

³ Am ori o nirakpan da sira kapasdep da sira do pamemtengan mangay do ikadwa na araw, ta makoyab rana.

⁴ Am no kanang am aro tao a niomanoyong do nipangnanao da Pite. O vilang da no mahakay am kakaliman a ranaw (5000).

⁵ Ikadwa na araw am o kamanrarakehan da no tao do Yotay a kano mangnanao no iwawalam ni Ama ta do to a kano karwan da no panipanirsirngen da am meylovolovot sira do Yelosaleng.

⁶ O rako a panirsirngen no mapatanatanang so nakem da si Ama ta do to a meyngaran si Annase a kani Keyava kani Yowani a kani Yadisanta kano zipos na mahakay ni Annase am amyan sira do dang.

⁷ Nyangay da sira Pite a kani Yowani do tangain da a kapacici da sira. Maniring sira am, “Do wanjin na kapwan no oyowyat nyo a yaniomiwakwak do nimapilay a tao ang. Sino yanimanta ninyo so oyowyat nyo.”

⁸ No kanang rana am oyatan no Seyzi si Pite. Am ori o nipancyan na no, “Inyo rana panipanirsirngen namen a kano kamanrarakehan am,

⁹ no si myan jinyo so mapacici jyamen sicyaraw eya do namen kanimapeypapya so nimapilay a tao ori am

¹⁰ naknakmen nyo a Isedi a tao an. O na nipeytatanek do tangain nyo no tao eya a nimapya rana am oyowyat no ngaran na ni Yeso a tao do Nasale a nipadket nyo do jyojika a nipirwa na avyain ni Ama ta do to.

¹¹ O ciring do Seysyo no kakwa a omagaz ji Yeso am, ‘O Vato a niwalit da no mapatnek so vahay am meyvoga am ney makdeng na aslet no ai no vahay.’

¹² Si Yeso o mapatazadang jyaten do teyngato. So ikabwata no ikararwa na do karawan a nitovoy na ni Ama ta do to a mapatazadang jyaten.”

¹³ Macita da no panipanirsirngen do peykeykaygyan si Pite a kani Yowani a mowyat so onowned am manakem da rana sira todna ka tao a jya nimeyvatvatek. Am ori o nipeyzokaban da nira. Meyratateng am katovilan da rana sira nimacilocilolo ji Yeso.

¹⁴ Am ori o ji da rana tenngi a meyzezyak, ta macita da o nipeypapya da so ai a meytatanek do tangain da.

¹⁵ To da na mancyan sira makowbot do rako a peykeykaygyan a kapeysirsiring da rana no panipanirsirngen.

¹⁶ Maniring sira am, “Kongwen ta sira ya, ta o meyvahay rana do Yelosaleng a tao am da katenngan sira yamapeyzokab so vazay. So ikabo no omalalas so sang a tao.

¹⁷ Marahet si meyparo tao a makateneng do akman sang a vazay. Apyapya o kalalaw ta sira, kaji da makadketan do ngaran ni Yeso a ipeylimwang do tao.”

¹⁸ Am ori o nitawagan da jira mai a kalalaw da sira a manci nya jira so kaji da mangnanawan no ngaran ni Yeso a ipamizing so tao.

¹⁹ Am maniring si Pite a kani Yowani am, “Do tangain ni Ama ta do to am amizngen namen o ciring nyo an? Ano amizngen namen o ciring ni Ama ta do to. Naknakmen nyo pala.

²⁰ Jyabo kaji namen mancyan no namen nimacita kano namen nimamizing a.”

²¹ Meyratateng am peyparowen da o ciring da yalalaw da sira kapasaway da rana sira. Ta ji da kala o karatan da, a macyoman pa o kanyahey da no aro a tao ang a somaray nya ji Ama ta do to, do mapeyzokab a vazay na do nimapilay ang.

²² O kakawakawan na no nimapilay a tao ori am to ngyan so ikasikalima (50) no awawan na ang.

Inozi da no yamraralay ni Yeso do Yelosaleng

²³ Pasawain da si Pite a kani Yowani am mangay rana sira do kararay da omraralay ni Yeso a tao a manci no mina ciring da jira no panipanirsirngen no mapatanatanang so nakem da si Ama ta do to a kano kamanrarakehan.

²⁴ Mamizing da am malovot sira meynozi ji Ama ta do to. Maniring sira am, “Mo Panirsirngen a nimangamamaog so hanit a kano teyrahem a kano awa kano meycyamadadayan,

²⁵ si Tawey rana ineynapo namen a nimahap so vazay mo am nioyatan mo no Seyzi a manci no, ‘Ikongo isozi da no beken a tao do Yotay. Ikongo pakanakman da so vazay a yabo so peypeypangayan.

²⁶ O kabtekan a panirsirngen rana do teyrahem a kano karwan da panipanirsirngen am malovot sira amnakenakem so kazazat da ji Ama ta do to a kano Misayya.’

²⁷ So nipangononong no nang a mina vazay da do Yelosaleng eya. Ta si Helote rana kani Pangsyo Pilato a kano karwan da tao do Yotay a kano beken a tao do Yotay am nimalovot sira nimnakenakem so kazakat da si Yeso a ji meylimoteng so onowned a nipamnekan mo a mahap so vazay mo.

²⁸ Da pangononongan o mina ciring mo a omagaz do nipamnemnekan mo.

²⁹ Am ori o pakatenngan mo jira so onowned a yaomalalaw jyamen. So sidongan mo jyamen, mo Panirsirngen a mahap so vazay mo a kaji namen a mogawan a meylimwang no ciriciring mo.

³⁰ So pacittan mo no oyowyat mo a mangiwakwak so ingingnen no tao a keyyan no mapeyzokab a vazay namen a mangozay do ngaran ni Yeso a nipamnekan mo a mahap so vazay mo.”

³¹ Mateyka sira meynozi am todagoyogoyon o peynozyan da a kamimin da nioyatan no Seyzi. Ori o nikowyat da a meylimwang no ciriciring na ni Ama ta do to. Ori ji da rana mogawi.

Ipasyazazaw da o kangangay da

³² Omraralay rana ni Yeso a tao am meyyangangay o onowned da. So ikabo no asa ka tao a maveyvow do kangangay na, ta akma dey todalovoci apzapzatan.

³³ O nipamnekan na rana ni Yeso a omlivolivon no ciriciring na am mowyat sira meylimwang no mina kapirwa na ni Yeso a mavyay. So nisidongan na sira ni Ama ta do to so omraralay nya tao.

³⁴ So ikabo no asa ka tao amyan so kalahen. Ta o myan so iheyhakawan a kano vahay am nipamalit da so nizpi o karwan na.

³⁵ O nipalit da nizpi am nyangay da do nipamnekan ni Yeso a omlivolivon no ciriciring na a kavonong da sya. To da palololwa do ikeykasi da tao o kavonongan na.

³⁶ Akman sang o vazay na no asa ka Diwey a tao do Saypolose a pongso a meyngaran so Yoseyvo. O ingaran da jya no nipamnekan na ni Yeso a omlivolivon no ciriciring na am si Parnapo. O peypeypangayan no ngaran na ori am “Mapayyait so nakenakem.”

³⁷ Ta nipamalit na o asa ka nihakawan na so nizpi a katoro na nya do nipamnekan na ni Yeso a omlivolivon no ciriciring na.