Nimlivolivon 27 - Seysyo No Tao

No kangay da ni Pawlo do Loma

¹ Ikongo do nipamnekan da no panipanirsirngen o kangay da ni Pawlo do Itadi, am ori o nitorwan da ni Pawlo a kano aro a nipteng da do mimong no itaysang no Loma a meyngaran si Sodian.

² So nisakay namen do avang a nimapo do Atamityan a mangay do Yasiya a pongso. Nimacihza jyamen si Aditako a tao do Tesalonicya. O ili rana am macinapnap do Maciton.

³ Ikadwa na araw am makaranes namen do Siton. Ikongo do ikaglaw na si Pawlo ni Sodian, am ori o nipya na sya makarala a komala so kagagan na.

⁴ Karwan namen do Siton am izasen na yamen no rako a pagpag. Am ori o ninanad namen a mangay a macimazeveng so avang namen do Saypolose a pongso.

⁵ Peyhavasan namen o ili do Cidicya kado Pangveydiya am makaranes namen do Mila a ili a macinapnap do Dicya.

⁶ Makaranes namen dang am macita ni Sodian o asa ka avang apo do Adisanta a meypangay do Itadi. Karahan am ipanci na yamen a somakay do avang ang.

⁷ O avang rana ori am tey mapakeh a somongay. Am ori o nikahay namen a makaranes do Kenito, ta ji namen a sangoz o pagpag. Am ori o mina to namen meyhavasi do Kedite a pongso a to namen paninida o avang do kehtengan na. Mownay am makaranes namen rana do kananayan do Samoni.

⁸ Pandan namen rana nimapaninid so avang namen, do kaji namen makasangozan sya. Mownay am makaranes namen do ngaranan da Tey yapya a minato. O minato rana am macinapnap do Lasiya ili.

⁹ Makaranes namen rana dang am ilawden na. Am ori o nikainin namen. Maniring rana si Pawlo do aro a tao no avang am,

¹⁰ “Manga keypong, ko citahen o palanginan am manginanawa ta no si meypangay ta. Jyabo kaji na kavan no avang ta. Ji na zyodan o aro a warawara do avang eya.”

¹¹ Am o mimong no itaysang a tao am apyapyahen na pa o kamizing na so mapasongay so avang a kano mapeyyavang sya. Ji na ngamiznga o ciring ni Pawlo.

¹² No ahemyan am masakboz na o minato ang. Am ori o to da lovoci no tao no avang a manci no kapasongay so avang, ta tey kakza da o kapakaranes da do Venici do Kedite a pongso. Ta tey meymatek o minato do dang a nanalan da so kapiya rana no kakawan.

Rako a pagpag do awa

¹³ No kano nang am nimehteng pa. Am ori o ningingitan namen so ipanenbong namen a mangay rana. Am to namen paninida o avang namen do Kedite a pongso.

¹⁴ So nikakeykai na nisangsang na.

¹⁵ Karahan am sibsiblakan na o avang namen. Ori o ji namen makasangozi sya. So to namen panowji rana sya.

¹⁶ Ikongo do nimacimazeveng namen do asa ka mahataw a ngaranan da so Kawtaw, ori o nikapya namen rana a mapasakay so tataloran. Karahan am pakedkeden namen rana do avang.

¹⁷ Mateyka namen rana pakedkeden o tataloran am imatkan namen no ovid o avang namen. Ta ihawa namen a makava. Ikongo do ikanyahey namen o avang a mangay somahag do kananayan do Siarti, am ori o nipakarwan namen so rako a vilad namen, kato namen rana macyocyozayan do angayan na nyamen no pagpag.

¹⁸ Ikongo do ji na heman no kakawan, am ori o to namen rana meywalici no karwan no warawara do avang do ikadwa na araw.

¹⁹ Ikatlo na araw am ji na pa ngehtengan. Am meywasik namen pa dang so maoran no avang ikarehmet na.

²⁰ Nimownay namen a jya nimakacita so araw a kano mata no hanit, do kaji na ablisan no hangin. Am ori o to namen rana macirierisi.

²¹ Ikongo do tey mownay namen a jya nimangakaday, am ori o nipeytatanek ni Pawlo. Maniring am, “Kokay kamo. No nyamizing nyo o ciring ko asyo do kaji ta pasongayan sya do Kedite a pongso am jyabo ta mina kakman sya yamakavakava so avang a.

²² Am ko ipanci pa jinyo am ji kamo anyahey. Ta apya tamo. Am o avang ta ya am todabo rana makavakava.

²³ Ta si Ama ta do to rana a yako iraralay am nimanovoy so tinsi na no kamahep a yamanci nya jyaken. Yamaniring jyaken am,

²⁴ ‘Mo Pawlo, ji ka onib. Ta manoyong o kangay mo do tangain na ni Kaysa. Ta na rana nimamizing ni Ama ta do to o inozi mo. So ikamimin nyo a apzatan na so kataotao do avang eya.’ Ori o ciring na jyaken no tinsi.

²⁵ Am ori o ji nyo anyahei, manga keypong an. Ta ko anoyngan si Ama ta do to a mangononong do ciring na jyaken.

²⁶ Cyaha, ta amyan so asa ka likta pongso a kazadawan ta.”

²⁷ Ikapat na so icyarwa (14) no araraw no niyan namen do karakwan no awa am to na rana pavyota yamen do meyngaran so Yatediya awa. Avak no ahep am ipanci da no tao no avang o kasngen namen rana do pamsan na.

²⁸ Paliwaten da o ovid a iktokto da do kararahem no awa am to ngyan so ikasi kapat na (40) anet no kararahem na. Ipirwa da aktoktwan am to ngyan so ikasi katlo na (30) anet.

²⁹ Ikongo do ikanyahey da kasahag no avang, am ori o nipakasan da so apat a ka ipanenbong namen do maoji a omapanala so karaw na.

³⁰ Ikongo do meykagcigcin sira o tao no avang, am ori o nipagcinan da so tataloran da. Am o karwan da am mangay sira do morong na akmey mapagcin so ipanenbong.

³¹ Am maniring si Pawlo do mimong no itaysang a kano macilolo jya itaysang am, “No si somaway sira ito am jyabo kavyay ta.”

³² Am ori o nikteban da sya no itaysang so ovid no tataloran a kahatahataw na meyparai do avang ang.

³³ Meyzengazengang rana am ipanci na sira ni Pawlo a koman. Maniring jira am, “Kamo kapat rana so icyarwa so araraw a yajya nimangakaday do nyo kalaw.

³⁴ Sijya kamo rana, ta koman ta na. Ta ori o iyan no oyowyat nyo. Cyaha, ta apya ta.”

³⁵ Teyka na o ciring na am mangap si Pawlo so myanpaw a kasaray na nya ji Ama ta do to do tangain da kakcikcil na sya kanen.

³⁶ So ji da na mogawi a koman rana.

³⁷ Yamen rana nimaoran do avang a tao am namen nanem so ikakawaowan so ikakatlwan na poo (276).

³⁸ Teyka namen rana koman am pipowa da rana o nimavezed a mogi, ta ihepaw da do avang.

Nisomahag o avang da Pawlo

³⁹ Penzak rana am ji da singkaji no tao no avang o pongso am macita da o kananayan. Ikakza da o kangay da mapanbong so avang da do dang.

⁴⁰ Karahan am akteben da o ovid no panenbong da kowvay da so ovid a iktan no savilak a kangingit da so vilad do morong na kapavyot na so avang do pasalan.

⁴¹ Karahan am mangay somahag o avang namen a kaji na rana makapeygonagonayan a kakavakava no maoji na sibsiblakan na no rako azda.

⁴² Naknakmen da no itaysang o kazakat da so nipteng da tao, ta ihawa da sira meyyawawat a somaway.

⁴³ Am o mimong no itaysang am ikarilaw na si Pawlo. So ji na nimyai sira amwakwak sira. Maniring rana do aro a aptengen da tao am, “Inyo rana yamakeykeyyawat am peyyawat kamo na mangay do pamsan na.”

⁴⁴ O macikavang jira tao am amyan jira so mangap so tapi. Amyan jira so mangap so oraoran no avang a peyyawatan da. Am ori o nikamimin namen rana nimeyyawawat a mangay do pamsan na.