Nimlivolivon 25 - Seysyo No Tao

Amyan si Pawlo do tangain ni Veyseto a panirsirngen

¹ Macipalit o kabtekan da do Kaysadiya a panirsirngen a meyngaran so Veyseto am mangay rana do Yelosaleng do ikatlo na araw.

² O panipanirsirngen da rana no mapatanatanang so nakem da si Ama ta do to a kano kamanrarakehan da no tao do Yotay am mangononong sira so malas a iraherahet da si Pawlo,

³ a kapanci da ni Veyseto a omya so tao a mangay ni Pawlo do Yelosaleng. Ta naknakmen da o kavat da ji Pawlo do rarahan a zakaten da sya.

⁴ Am maniring jira si Veyseto am, “Yapa myan si Pawlo do pamemtengan do Kaysadiya. Cyaha, ta makeykai ko a meysinaoli do dang.

⁵ So pancyan nyo no kamanrarakehan a macihza jyaken a kapanci da no karatan no tao ang, no si makaranes sira do dang.”

⁶ Mina kapito araw si Veyseto a nimyan do dang a kapeysinaoli na rana a mangay do Kaysadiya. Ikadwa na araw am iwangan na o pacicicyan a kai da rana ni Pawlo do tangain na.

⁷ Mai rana si Pawlo am o apo do Yelosaleng aro a tao am limoten da a kapanci da no itawwen da ciring a iraherahet da sya. Am abo do dang o manoyong a ciring da.

⁸ So nitovisan na jira ni Pawlo. Maniring am, “Yabo o ko mina vazay a yamacisala do iwawalam namen a tao do Yotay. Ko jya niraherahet o rako a panaralayan namen do Yelosaleng a kano rako a panirsirngen ta do Loma.”

⁹ Am kakdain na ni Veyseto o karilaw da nya no tao do Yotay. Maniring ji Pawlo am, “Manngwa, apyahen mo o kangay mo do Yelosaleng a pacicin ko dang an?”

¹⁰ Maniring si Pawlo am, “Ko myan do tangain mo a yamo pacicin sicyaraw eya a nitovoy ni Kaysa a panirsirngen no Loma. So ko to ngyani do jya pacicin mo. Yamo katenngan yaken a yabo so yacinaratan do tao do Yotay.

¹¹ No si myan so kalasan ko a jya niomonot do iwawalam ta am cyaha, to nyo na zakata yaken. Am si abo o kalasan ko am ji ko mya o kapacici da jyaken no tao do Yotay. Si Kaysa apyahen ko a mapacici jyaken.”

¹² Mateyka ni Veyseto a ahesen o kararay na am maniring ji Pawlo am, “No mo ikakza o mo kangay do rako a panirsirngen do Loma am to ko na novoya imo a mangay dang.”

Meysirisiring sira Veyseto a kani Aglipa

¹³ Kadadayan na so araraw am mangay si Aglipa a panirsirngen a kano mavakes a meyngaran si Peynici do Kaysadiya a somaray ni Veyseto, do mina kapamnek da jya panirsirngen da.

¹⁴ Makanateng o araraw no niyan da dang am ipanci na rana ni Veyseto o vazay ni Pawlo ji Aglipa. Maniring am, “Yamyan jya so yasa ka tao a nipteng na ni Veydise.

¹⁵ No kangay ko do Yelosaleng am amyan so ciring a niraherahet da sya no panipanirsirngen no mapatanatanang so nakem da si Ama ta do to a kano kamanrarakehan da no tao do Yotay. Ipanci da yaken a omzakat sya.

¹⁶ Am maniring ko jira am, ‘No pangozayan o iwawalam no tao do Loma am no jya nipacici pa kabo no asa ka ciring a nipanci na a omagaz do karatan na am masalit o kato wakwakan so akman sang a tao.’

¹⁷ No kai da am ji ko nipeyyahahay, ta ikadwa na araw am iwangan ko o pacicicyan a kapacici ko si Pawlo.

¹⁸ Patwawen da o iraherahet da si Pawlo a ciring da am abo do teywara o karatan na do amizngan ko sya.

¹⁹ O da oyyan nya am ji na nionotan o iwawalam da no tao do Yotay. Ta onotan na o asa ka tao a meyngaran si Yeso a nimawakwak rana. Am ipanci na ni Pawlo o kanimirwa na mavyay no nang.

²⁰ O akman rana sya a vazay am ko jyatenngi o ko ahahapan sya. Pacicin ko si Pawlo am, ‘Manngwa, apyahen mo kangay mo do Yelosaleng a pacicin an?’

²¹ Am jyakey si Pawlo, ta ikakza na o rako a panirsirngen ta do Loma a mapacici sya. Maniring ko ji Pawlo am, ‘No komwan am to mo na panala o araraw no angayan da nimo do Loma.’ ”

²² Maniring si Aglipa ji Veyseto am, “Amizngen ko pala o ciring na.” Maniring si Veyseto am, “Amizngen mo simaraw.”

Amyan si Pawlo do tangain ni Aglipa

²³ Ikadwa na araw am nimai si Aglipa kani Peynici a meyyayob so apiya ayob da somdep do rako a peykeykaygyan. O macihza rana jira am panipanirsirngen no itaysang a kano maizay a tao do ili da. Meyratateng am nipanci ni Veyseto o tao a mai ni Pawlo.

²⁴ Maniring si Veyseto do aro a tao am, “O tao rana ya am oya o yada ipanci a zakaten no tao do Yotay do Yelosaleng a kado jya.

²⁵ Nyamizing ko na o ciring na am abo teywara a karatan na. O na ikakza no tao eya am pacicin no rako a panirsirngen do Loma. Am ori o ko na to novoi sya mangay do Loma.

²⁶ Am yabo o ko nivatvatkan a karatan na a citahen no panirsirngen no Loma. Am ori o ko nyayyan nya jimo, mo Aglipa a panirsirngen namen, a ka ninyo a aro a tao a yaomamizing sya. Ta sidongen nyo pa yaken a manci no karatan na, kavatvatek ko jya. Ta ori o iyan no vatvatkan ko a citahen no panirsirngen do Loma.

²⁷ Ta no ko naknakmen am no ji pa tenngi o karatan no nirakep a tao am marahet o kato rana novoyan sya do rako a panirsirngen ta.”