Nimlivolivon 24 - Seysyo No Tao

Raheraheten da si Pawlo no tao do Yotay

¹ Ikalima na araw am o panirsirngen no mapatanatanang so nakem da si Ama ta do to a meyngaran so Ananiya kano aro a kamanrarakehan a kano meyngaran si Tetolo a mapacicici a nimai do Kaysadiya kangay da do kabtekan da panirsirngen a meyngaran so Veydise a manci no karatan ni Pawlo.

² Karahan am powboten da si Pawlo do pacicicyan a kapanci na no aro a karatan na ni Pawlo ni Tetolo. Maniring am, “Mo Veydise a panirsirngen, imo rana am yaka tey mateneng a mimong nyamen. Am ori o namen ikapiya do keymiminili namen. Yaro yapiya vazay mo do keymiminili namen.

³ So namen sarayan no karilawan mo nyamen.

⁴ Yabo a yamasalit a ko isanga jimo am amizngen mo pa o alinged a ciring namen.

⁵ Namen katenngan si Pawlo a na yapwan no ipeyvonag no tao do Yotay do peycyamahamahatawan na, a panirsirngen da no tao a yaomanoyong ji Yeso a tao do Nasale.

⁶ Iya rana am nimanara so beken a tao do Yotay a somdep do rako a panaralayan. Am ori o namen nirakpan sya. [Naknakmen namen o kahap namen so iwawalam namen a oyyan namen nya am,

⁷ mina kazazat na jyamen no panirsirngen no itaysang a meyngaran si Disiya.

⁸ Na nipanci yamen ni Disiya o kangay namen ni Pawlo jimo.] Si pacicin mo o tao ito am to mo na tenngi o peypeypangayan no nirakpan namen sya.”

⁹ O macikaop rana jira tao do Yotay am mamimin sira amraherahet si Pawlo. To da macyanoyngi o nipanci na ni Tetolo.

Ipanci na ni Pawlo ji Veydise o kabo no karatan na

¹⁰ No kano nang am nipya na ni Veydise si Pawlo a manci no kanoyngan na. Maniring si Pawlo am, “Ko katenngan imo a yarana meyyawawan a yatomalamozong no pongso ta ya. Am ori o ko sarayan nimo a pacisirsirngan a yamanci no kabo no karatan ko.

¹¹ Jyabo mo kaji makatenngan do mina vazay ko no kangay ko a meynozi do Yelosaleng a.

¹² Jyabo kanimakacita da jyaken do rako a panaralayan a macingasangas do aro a tao a. Jyabo kanimakacita da jyaken a nimapeyvonag so tao do peyneynozyan a kado rarahan a.

¹³ So na ikabo no yongkad no da iraherahet jyaken.

¹⁴ Am yasa ka vazay pa o ko ji naywa jimo. Ori rana am ko anoyngan o da iraralay no ineynapo namen. Ko anoyngan o iwawalam ni Moyse a kano nivatvatkan da no panoyonoywan na so ciring ni Ama ta do to. So na ikanoyong no ko kahap so yada ipanci a malas a nanao.

¹⁵ Ko akman sira yaomanoyong do keypirwa da mavyay no nimawakwak rana tao, tana marahet a tana yapya so vazay a tao am to sira meyyangangay a mirwa mavyay.

¹⁶ Am ori o ko ikakdekdeng a mahap so yapiya vazay do tangain ni Ama ta do to a kado tangain no tao.

¹⁷ “Yarana meyyawawan o ko nikarwan do Yelosaleng. Am o ko nipeysinaoli a mangay do Yelosaleng am ko yangay o kingking da no akma koy kakteh do cinai a da isidong so tao do Yelosaleng. So nyangay ko pa do rako a panaralayan a mapatanang so nakem ko si Ama ta do to.

¹⁸ Mateyka ko a mahap so iwawalam namen am nimacita da yaken no tao do rako a panaralayan. Am abo tao a nipeyvonag ko.

¹⁹ No kanang am amyan do dang so tao do Yotay a apo do Yasiya. Inaoy no yasira myan do jya a manci no karatan ko.

²⁰ Am ipanci da pala no yamyan jya a panipanirsirngen o ko karatan a nimamizing da ciring ko do rako a peykeykaygyan do Yelosaleng.

²¹ Ko naknakmen am yakmey yasa da pacioyyan jyaken, do mina kapanci ko no kanoyong ko do keypirwa no nimawakwak a tao a mavyay.”

²² Si Veydise rana am katenngan na o vazay da no amraralay ni Yeso. Am ori o ji na nimyai rana so tao a meyzezyak. Maniring do mangamizing a tao am, “Nanalahen ta pa o panirsirngen no itaysang a meyngaran so Disiya a kapacici ko na jimo.”

²³ Karahan am ipanci na o itaysang a amzat ji Pawlo a kapya da so kagagan na tomazogaw nya. So ji da nimvaoji pa sya no kanang.

Amyan si Pawlo do tangain ni Veydise a kani Tosila

²⁴ Kadadayan na so araraw am mai sira Veydise a kano mavakes na a tao do Yotay a meyngaran so Tosila a omrara si Pawlo a manci no peypeypangayan na no kanoyong na ji Yeso Kizisto.

²⁵ Karahan am ononongan na rana ni Pawlo jira a meyyaven do vahay o kapiya no icicirawat a omzat do onowned mangay do ikarateng no araraw na no ipeykapyapinpin na so tao ni Ama ta do to. Mamizing na ori ni Veydise am manyahey rana o onowned na. Maniring ji Pawlo am, “Angay rana. No ipanci ko imo am mai ka.”

²⁶ O pancyan na no akman sang am kakzeben na si Pawlo a mantan nya so nizpi. Am ori o ikasangib na amrara si Pawlo.

²⁷ Marateng o kadwa kawan am palitan na si Veydise no meyngaran so Pocyo Veyseto a meypanirsirngen. Am ikongo do kakzeben na ni Veydise no kaglaw da nya no tao do Yotay, am ori o ji na nimapasawai si Pawlo do pamemtengan.