Nimlivolivon 23 - Seysyo No Tao

¹ Singkadan na sira ni Pawlo o macipeykaygi a tao. Maniring jira am, “Manga kakteh, o iwawalam ko no kalyalikey ko am abo pasagpyanan ko so nakenakem ko do tangain ni Ama ta do to a yato ngai sicyaraw eya an.”

² Mamizing na no panirsirngen da no mapatanatanang so nakem da si Ama ta do to a meyngaran so Ananiya am manara so tao a somiplang so ngoso ni Pawlo.

³ Maniring si Pawlo jya am, “Mangay o kapasingesinget na jimo ni Ama ta do to, do mo kaji raralayan nya. Ta imo rana am mo jya nyahap o iwawalam ta mapacici jyaken. So mo ikalas so iwawalam a yato manci no tao a yasomiplang jyaken.”

⁴ Maniring sira o macitangked jya tao am, “Yaka makongo a yajyasnesnek no panirsirngen no mapatanatanang so nakem ta si Ama ta do to.”

⁵ Maniring si Pawlo am, “Manga kakteh, no ko nikatenngan ori a panirsirngen no mapatanatanang so nakem si Ama ta do to am ko jya nioya. Ta o ciring do Seysyo am, ‘Ji nyo ngavaya o panirsirngen nyo.’ ”

⁶ To na rana tenngi ni Pawlo o kapeypinpin da no tao a macyagom do Satokay a kano macyagom do Vadisay. Am ori o nilolos na do peykeykaygyan da. Maniring am, “Manga kakteh, yaken rana am ko macyagom do Vadisay. O ineynapo ko am macyagom do Vadisay. O nyo pacicyan jyaken sicyaraw eya am ko kanoyong do keypirwa mavyay no nimawakwak a tao an.”

⁷ Kapakamizing da so ciring ni Pawlo am meygalagalagal sira o tao a macyagom do Vadisay a kano macyagom do Satokay. So nipeykadwa no nakenakem da a ji macipaswasovoy do kadwan jira.

⁸ Ta ji da nganoyngi no tao a macyagom do Satokay o keypirwa da mavyay no nimawakwak a tao. Ji da nganoyngi o keyyan no tinsi a kano keyyan no pahad no tao. Am o tao a macyagom do Vadisay am miminen da ori a anoyngan.

⁹ So nikarakorako pa no ilololosan da. So nipeytatanek da no karwan da no tao a macyagom do Vadisay a mangnanao no iwawalam ni Ama ta do to. Maniring sira am, “Namen jyakala o na karatan no tao eya. Tana yamyan so tinsi a kano pahad a macisirsiring jya am ta karatan nya.”

¹⁰ Ikeykavevek da amlololos. Ikongo do peypazapazangan da rana si Pawlo, am ori o nipanovoy na no panirsirngen no itaysang so itaysang a mangay omvozcin sya jira a isdep do sahad.

¹¹ Mahep rana am mai si Yeso do katangked ni Pawlo. Maniring am, “Ji ka onib, mo Pawlo an. To mo peynara no kapeylimwangan mo nyaken do Yelosaleng a meylimwang nyaken do Loma.”

Ipeysirsiring da o kawakwak da si Pawlo

^12-13 Ikadwa na araw do penzak am kakapatan (40) sira o tao do Yotay a nimeysirisiring. Maniring sira am, “Si ji ta zakat si Pawlo am jyabo kapangakaday ta.”

¹⁴ Meyratateng am mangay sira do panipanirsirngen no mapatanatanang so nakem da si Ama ta do to a kano kamanrarakehan. Maniring sira am, “Namen rana teyka a meysirisiring. No si ji namen a zakat si Pawlo am ji namen mangakaday.

¹⁵ Inyo rana panipanirsirngen am ipanci nyo o panirsirngen no itaysang no Loma a mai ni Pawlo do jya, akma nyoy pacicin a komala so karatan na. A yamen am avatan namen do jya wakwaken si mai do jya.”

¹⁶ Mamizing na o ciring ori no manganak no kakteh ni Pawlo am mangay do vahay no itaysang a mangay manci nya ji Pawlo.

¹⁷ Am ori o nipanara na ni Pawlo so asa ka itaysang. Maniring jya am, “Palolwen mo o malavayo a tao ito a mangay do panirsirngen nyo, ta yamyan so na ipanci jya.”

¹⁸ Am ori o nipalolwan na sya mangay do panirsirngen da. Maniring am, “Si Pawlo rana yata nipteng eya am na ipanci yaken a yamapalolo so tao eya mangay a tomita jimo. Ta yamyan so na ipanci jimo.”

¹⁹ So nikalayan na sya no panirsirngen so malavayo a tao ang a pahawahen na a sirsirngen. Maniring am, “Ikongo mo ipanci jyaken.”

²⁰ Maniring am, “Da nipeysirisiring no tao do Yotay o kapya mo si Pawlo simaraw a mangay do rako a peykeykaygyan, akma dey pacicin.

²¹ Am ji mo ngonoci sira an, ta yamyan so kakapatan (40) a tao a yaomavat jya wakwaken. Ta o ciring da am, ‘No si ji ta wakwaka si Pawlo am ji ta mangakaday.’ Imo rana o da ahesen.”

²² Maniring jya o panirsirngen da no itaysang am, “Ji mo mancyan do tao o kanimanci mo nya jyaken so akman sya vazay an.” Meyratateng am tovoin na rana mangay.

Nitovoy da si Pawlo a mangay do meyngaran so Veydise a kabtekan da panirsirngen do Kaysadiya

²³ Am ori o nipanara na no panirsirngen no itaysang so rarwa ka lamlamsoy na. Maniring jira am, “Meykala kamo so adwa poo (200) a itaysang a kano kakapitwan (70) a omavang do baka a itaysang a kapeykala nyo pa so adwa poo (200) a meycinalolot a macihza jira. Ta simahep do ikasyam no toki am yangay nyo si Pawlo do Kaysadiya,

²⁴ a kapeykala nyo ni Pawlo so avangan na baka a kapacihza nyo jya a rarayan a mangay ji Veydise a kabtekan ta panirsirngen.”

²⁵ Meyratateng am meyteygami jya o panirsirngen ang. Maniring am,

²⁶ “Yaken rana am si Kelawti Disiya. Ko ipeyteygami imo a panirsirngen namen. Maran kong mo Veydise.

²⁷ Si Pawlo rana ya am yada nirakep no tao do Yotay. Da naknakmen o da kawakwak sya. Am katenngan ko rana tao do Loma si Pawlo am ori o nipanara ko so itaysang a yamangay nya jimo.

²⁸ Si Pawlo am nyangay ko do rako a peykeykaygyan. Ta ko naknakmen o ko kakala so agagazan no da oyyan nya.

²⁹ O nioyyan da nya am ipanci da o kaji na ngapan no iwawalam da no tao do Yotay. Am ko jyatenngi o peypeypangayan no da wakwakan sya, da aptengan sya.

³⁰ Mamizing ko o keyyan no amvovo jya wakwaken am ori o ko peyteygamyan nimo a omzat jya. O ko nipanci do tao do Yotay am, ‘Mangay kamo pa do kabtekan ta panirsirngen a manci no agagazan no yanyo nirakpan si Pawlo.’ ”

³¹ Karahan am yangay da rana si Pawlo no aro a itaysang do Antipate do mahep.

³² Ikadwa na araw am meysinaoli rana sira o katey da no itaysang do vahay da. Omavang do baka a itaysang am ori o macihza ji Pawlo.

³³ Makaranes sira do Kaysadiya am itoro da rana o teygami do kabtekan da panirsirngen a katoro da ni Pawlo jya.

³⁴ Vilangan na no panirsirngen o teygami am pacicin na o nikapwan na ili ni Pawlo. Ori o nipakatenngan na rana jya tao do Cidicya.

³⁵ Maniring am, “Si makaranes rana sira o tao a yamraherahet jimo am pacicin ko imo.” Meyratateng am ipanci na o itaysang a amzat jya do vahay no mina panirsirngen da a meyngaran so Helote.