Nimlivolivon 22 - Seysyo No Tao

¹ “Manga maran, manga kakteh, amizngen nyo o ko ipanci jinyo, manga keypong an.”

² Mamizing da si Pawlo a meyzezyak so ciring da no Sipolay am yeyyak da. Meyratateng am mangononong rana si Pawlo. Maniring am,

³ “Yaken rana am tao do Yotay ko a nimatazak a tao do Tasose a macinapnap do Cidicya am nimamno ko do Yelosaleng eya. Nimeyvilang ko ji Cyamadi a tey mateneng a mangnanao no iwawalam ta tao do Yotay. Ori o nikakman ko jinyo a makdeng a omahap so iwawalam no ineynapo ta.

⁴ No kakwa pa am makdeng ko a nimapakakasi so amraralay ni Yeso a tao. So niyan no nimawakwak ko jira ang. Tana mavakes a tana mahakay am abo o ji ko rakpa jira a pain do pamemtengan.

⁵ To nyo mancyan do panirsirngen da no mapatanatanang so nakem da si Ama ta do to a kano kamanrarakehan, ta sira ang o nimakacita jyaken a nimanta nyaken so teygami a mangay do Tamaseke a omya jyaken a omrakep so amraralay ni Yeso a tao a yangay do Yelosaleng a bakbakan.

⁶ “Tod ko a ji makaranes do Tamaseke do peyignan no araw am to ngyan so mazngang apo do teyngato a tomiray jyaken.

⁷ Am ori o nikavazakwang ko do teyrahem. Karahan am amyan so ciring. Maniring am, ‘Mo Sawlo, mo Sawlo, ikongo yamo pakakasyan jyaken.’

⁸ Maniring ko jya am, ‘Mo Panirsirngen, sino ka.’ Maniring am, ‘Yaken rana am si Yeso ko a tao do Nasale a yamo pakakasin.’

⁹ O kararay ko am nimacita da o maniray. O zezyak a nimamizing ko am ji da nimamizing.

¹⁰ Pacicin ko am, ‘Mo Panirsirngen, meypanngonngo ko so wanjin eya.’ Maniring jyaken o Panirsirngen ta am, ‘Peyvangon rana kangay mo do Tamaseke, ta amyan dang so asa ka tao a manci nya jimo so kakzeben na ni Ama ta do to a vazay mo.’

¹¹ Ikongo do tey macimat o zezngangen na, am ori o nikakowap ko. Karahan am to da rana ngalaya yaken no kararay ko a yangay do Tamaseke.

¹² “Amyan dang so asa ka tao a meyngaran si Ananiya. Iya rana ori am manoyong a mahap so iwawalam ni Moyse. So kanigan da nya no tao do Yotay amyan do Tamaseke.

¹³ Mai ori jyaken am maniring am, ‘Mo Sawlo, akma koy kakteh do cinai, makacita ka rana.’ No kanang rana am mina to ko na makacita.

¹⁴ Maniring jyaken am, ‘Yana nipamnekan imo no Tao do to da no ineynapo ta a mahap so vazay na, do mo kanimakacita si Yeso a Anak na ni Ama ta do to, do kanimakamizing mo so ciring ni Yeso.

¹⁵ Imo rana am ipeylimwang mo do aro a tao o mo nimacita kano mo nimamizing.

¹⁶ Am ori o ji mo meypahahai. Peyvangon rana a kapamlis mo na so nakenakem. Tawagan mo o ngaran ni Yeso a omvonas so raraten mo a kataktak da jimo.’ Ori o ciring na jyaken ni Ananiya.

^17-18 “Kadadayan na so araraw am meyoli ko a mangay do Yelosaleng a mangay meynozi do rako a panaralayan. Meyratateng am akma raney tateynep ko si Yeso a to ko a cita. Maniring jyaken am, ‘Makeykai ka komaro do Yelosaleng an. Ta o tao rana jya am da jyakzan a yamizngen o mo ipeylimwang jira a ciriciring ko.’

¹⁹ Maniring ko am, ‘Mo Panirsirngen, da mamimin yaken no tao a yakatenngan a yamapakakasi so aro a yamraralay nimo do peyneynozyan.

²⁰ No kawakwak da so nimeylimwang no ciriciring mo a meyngaran so Setiven am nimacizanod ko jira a tomita so aywayob da.’

²¹ Maniring jyaken si Yeso am, ‘To ka nangay. Ko na to novoya imo a mangay do ili da no beken a tao do Yotay a meylimwang no ciriciring ko.’ ”

²² Mamizing da no tao o niononongan ni Pawlo am amlololos sira manci no, “Zakaten ta si Pawlo. Zakaten ta si Pawlo. Jyabo kavyay so akman sya ya.”

²³ So nilololos da mapatalatala so ayob da kapeymeymozasik da so tana.

²⁴ O panirsirngen no itaysang no Loma am iyokod na si Pawlo a isdep do vahay da no itaysang a kasipsipzot da jya pacicin. Ta si ori pa o patwawan na ni Pawlo so karatan na.

²⁵ To da ji nipsipzoci am maniring si Pawlo do itaysang amyan dang am, “Manngwa, manoyong a iwawalam nyo a Loma o kapanmanma nyo a mamakbak so tao do Loma an? No manmanma o kakala nyo so karatan na.”

²⁶ Mamizing na no itaysang o ciring ni Pawlo am to rana angay a komala so panirsirngen da. Maniring jya am, “Ka nimeypanngonngo eya. Mo jyatenngi ori a tao do Loma?”

²⁷ Karahan am mangay na citahen no panirsirngen si Pawlo. Maniring am, “Ka manoyong a tao do Loma ya an?” Maniring si Pawlo am, “Noon.”

²⁸ Maniring ji Pawlo o panirsirngen no itaysang am, “Yaken rana am yaro o nizpi a yako ningina do kataotao ko. Ori o ko rana ipeyngongyod a tao do Loma.” Maniring si Pawlo am, “Nimapo no katazak a tao ko o ka Loma ko.”

²⁹ Mamizing da no omvovo ji Pawlo a bakbakan am mina to da rana ngaroi. So nikalaw na no panirsirngen da no itaysang, ta katenngan na si Pawlo a tao do Loma a todey vaoda.

Amyan si Pawlo do rako a pacicicyan

³⁰ Ikongo do kakzeben na no panirsirngen da no itaysang o kapakateneng na do oyyan da ni Pawlo no tao do Yotay, am ori o niovayan na so nivaod da sya do ikadwa na araw a kalovot na so panipanirsirngen no mapatanatanang so nakem da si Ama ta do to a kano macipeykaygi jira a kamanrarakehan a kapowbot da si Pawlo a patanken do tangain da.