Nimlivolivon 20 - Seysyo No Tao

No kangay ni Pawlo do Maciton a kado Akayya

¹ Meyrehes rana o nipeyvonag da am lovoten na sira ni Pawlo o amraralay ni Yeso, kapait na sira kataitaid na rana sira. So nikarwan na rana dang a mangay do Maciton.

² So nilivonan na so ili da pangonongan a mapait so sinjya, kangay na rana do Akayya.

³ So nisan na dang so katlo a vehan. Vovwan na o kavang na do avang a mangay do Sidiya am to na sapa o tao do Yotay a omvovo jya zakaten. Am ori o nipancyan na no kato na rana meysinaoli a meyliktaw do Maciton.

⁴ O nimacihza jya am tao do Peyloya, anak na ni Pilo a meyngaran so Sopate a kano tao do Tesalonicya a meyngaran so Aditako a kani Sikongto a kano tao do Tepey a meyngaran so Cyayo a kano tao do Yasiya a meyngaran so Timotay a kani Ticiko a kani Teloveymo.

⁵ So nikehzehza da manma mangay do Teloya ili a amnanala jyamen.

⁶ Mahatas rana o nipamaring da so kanen do yakan da so ji nimimway a pang am nimapo namen do Veydipi. Kalima araw namen a niomavang do avang am makaranes namen do Teloya. So nipakacita namen rana so kararay namen a nimanmanma a nimangay. Karahan am misan namen do dang so kapito araw.

⁷ Makoyab do niciyo am malovot namen a kano akma nameney kakteh do cinai a mahahanghang a makanakem si Yeso a nimawakwak no raraten ta. So todavaki jya do ahep ni Pawlo a mangnanao, ta imong na o kangay na rana do ikadwa na araw.

⁸ Aro zampo do ikatlo na vava no vahay a peylovolovotan namen.

⁹ Amyan so asa ka malavayo a tao a meyngaran si Yotike a amlisna do ngoso no pazevngen. Ikongo do tey naro o ipangnanao ni Pawlo, am ori o nikakaha na ni Yotike. Karahan am todey manazasaz a makas do teyrahem. Citahen da am abo rana o inawan na.

¹⁰ So nyangay na ni Pawlo a kasapopo na sya. Maniring am, “Ji nyo alawan an, ta yana mavyay an.”

¹¹ Tomanggeh rana si Pawlo do kavava no vahay am ahapen na o myanpaw a kakan na sya a kapangnanao na rana. So nyangay na do madagdag no ipangnanao na a kakaro na rana jira.

¹² So nikavyay na rana no malavayo a tao ang. So nikasaray da no tao a mangay nya do vahay da.

Apo si Pawlo do Teloya mangay do Midito

¹³ Nimanmanma namen a omavang do avang a mangay do Aso. Si Pawlo am to mangonong do rarahan. Ipanci na o kangay namen masinsinmo do Aso a ili.

¹⁴ Makaranes namen do Aso am masinmo namen si Pawlo. Am ori o nipavangan namen sya do avang, kangay namen rana do Mitidini.

¹⁵ Ikadwa na araw am makaranes namen do Cio. Ikatlo na araw am nimangay namen someyked do Samo. Ikapat na araw am makaranes namen rana do Midito.

¹⁶ Nakenakem na ni Pawlo o kaji namen neykedan do Ivoso, ta ihawa na kasengseng namen do Yasiya, ta meybezbez si Pawlo a mangay do Yelosaleng. Ta ikakza na o kapakapis na so pamaringan da so kanen no tao do Yotay do Osinci.

Ivavaga na ni Pawlo do panipanirsirngen do kyokay do Ivoso

¹⁷ Amyan si Pawlo do Midito am manovoy so tao a mangay do Ivoso a manci no panipanirsirngen do kyokay a mai a tomita sya.

¹⁸ Mai rana sira am pacisirsirngan na rana sira ni Pawlo. Maniring jira am, “Nyo katenngan o icicirawat ko no ka ori pa so kangay ko do Yasiya.

¹⁹ Ko ji pahamaha o nakenakem ko do ko kahap so vazay na ni Ama ta do to. Tana peyrarehten da yaken no tao do Yotay, tana kalahen da yaken a zakaten am ji ko a mamman. O kapeyvazay ko so vazay ni Ama ta do to.

²⁰ Nyo katenngan manga keypong, no ko myan do peylovolovotan no tao a kado peycyakavakavahayan am ko nanawen inyo. Ko miminen o apya ciring a yako ivavaga jinyo. So ikabo no ko taywen jinyo.

²¹ Tana tao do Yotay a tana tao do Sila am yako inyo to peyyangangaya a yananawen, do ko kakza ninyo a mamlis so nakem a omanoyong ji Yeso Kizisto a Panirsirngen ta.

²² So ko na karwan jinyo sicyaikwaya a mangay do Yelosaleng, ta onotan ko o ipanci na jyaken no Seyzi. Am ji ko a tenngi o masapa ko dang a vazay.

²³ O ko katenngan am o na nipaziman jyaken no Seyzi do kapteng da jyaken, do karo no alalaw ko.

²⁴ Am ko jyalawan o inawan ko. Ta ko kakakzeb so kakavos na no vazay ko a na nitoro jyaken ni Yeso Kizisto a Panirsirngen ta. So peylimwangan ko no Mapasaray a Ciriciring na ni Ama ta do to a omagaz do pangangarilawan na.

²⁵ “No keyyan ko pa jinyo am nipanci ko na jinyo o omagaz do italamozong na ni Ama ta do to. Am ko na to mancyan jinyo am ji nyo na cita yaken.

²⁶ To ko na macitangain jinyo manga keypong am no si myan jinyo so ji nganoyong ji Yeso Kizisto am nakenakem na rana.

²⁷ Ta yabo rana o ko taywen a nanao ni Ama ta do to.

²⁸ So ipeypepzat nyo an. Ahapen nyo o nitoro na jinyo no Seyzi a marilaw no kadwan jinyo. Ta sira rana am nipalit na no rala no Anak na ni Ama ta do to a yarana macikaop jya.

²⁹ Ta ko katenngan si karwan ko rana inyo am amyan so mangalalas a tao a mai a omnanao jinyo a mapeycyakawad jinyo a amraralay ni Yeso a tao.

³⁰ Ta no makwa am amyan do tangain nyo so mangononong so malas amlita do amraralay ni Yeso Kizisto a tao. No amyan so akman sang a tao am ji nyo ngonoci.

³¹ Ori o apzatan nyo do onowned nyo an. Manakem nyo o ninanao ko jinyo a nimeykaoo ninyo an. Ta mina katlo a kawan ko a mangday so araraw a kano ahep a amnanao jinyo.

³² “Sicyaikwaya am ko na to norwan inyo ji Ama ta do to. Ta ko ipeyhanhan o pangangarilawan na ni Ama ta do to a somidong jinyo a to ngotokot so nakem a meyhanhan nya. No si makman kamo sang am mahap nyo na o igeygeglaw na so omraralay nya tao.

³³ Yaken rana am yabo pa o yako nikamkam a nizpi a kano ayob da no tao.

³⁴ Ta nyo katenngan yaken a yamowyat a meyvazay a omyaw no velek ko a yaomlam so kararay ko.

³⁵ Am ori o inaran nyo jyaken an. So ipakowyat nyo a meyvazay an. Ta ori o ipakasidong nyo so ji makahakaw a tao. Manakem nyo o mina ciring na jyaten ni Yeso a Panirsirngen ta. Ta maniring si Yeso am, ‘Rakorako pa o sarasaray no onowned no mangazaw a kano azawen da tao.’ ”

³⁶ Teyka na ori a ciring ni Pawlo am mamimin sira meylilitod a meynozi.

³⁷ So nikamimin da meycyalavilavi a komopkop si Pawlo adkanan a taitaiden,

³⁸ do kapakanakem da so ciring ni Pawlo a manci no kaji da rana makacittan sya. So nikeyngen no onowned da. So nikamimin da macihza ji Pawlo a mapasakay sya do avang.