Nimlivolivon 18 - Seysyo No Tao

Vazay ni Pawlo do Kedinto

¹ Karwan na ni Pawlo do Yatyan am mangay rana do Kedinto.

² Makaranes do dang am makasazi so asa ka tao do Yotay a nimatazak a tao do Pento a meyngaran si Akwila. O kadwan na do vahay am meyngaran si Paycila. Kapo da pa do Itadi, ta o panirsirngen a meyngaran si Kelawti am ipanci na o tao do Yotay a komaro do Loma. So nyangay na ni Pawlo a tomita sira.

³ So nipacivahay na jira macipeyvazay jira, ta meyyangay o vazay da mapakapkapya so vilad a vahay.

⁴ Mangday so ipeywalam no tao yangay ni Pawlo do peyneynozyan a macinekanekad, kananao na so tao do Yotay a kano tao do Sila. Ta kakdain na sira omanoyong ji Yeso.

⁵ Mai rana sira Sila kani Timotay a nimapo do Maciton am masangib si Pawlo a meylimwang nya do tao do Yotay so kanoyong na ni Yeso a Misayya a nitovoy na ni Ama ta do to.

⁶ Am ji da ngamiznga, ta o karaherahet da sya. Am ori o nitoktokan na ni Pawlo do talili na so ibeybek. Maniring pa jira am, “Si amyan so oyaoyyan na ninyo ni Ama ta do to no makwa am beken a yaken o raraten an, ta monganay jinyo an. To ko na papwa sicyaraw eya o kangay ko na a mangnanao so beken a tao do Yotay.”

⁷ Meyratateng am karwan na rana sira ni Pawlo a kangay na meyvahay do vahay ni Tito Yoseto. Iya rana am beken a tao do Yotay a omraralay ni Ama ta do to. O vahay na am macitangked do peyneynozyan.

⁸ O tomalamozong no peyneynozyan a meyngaran si Kedisepo a ka nira asa ka vahay am nimamimin sira omanoyong ji Yeso a kano aro a tao do Kedinto a nimakamizing so nipangnanao ni Pawlo a omanoyong rana ji Yeso a kataktak da jira.

⁹ Ipisa kahep na am meygegcin ji Pawlo o ciring ni Yeso akma ney tateynep. Maniring am, “Ji ka mogaw. Ji mo amtadan o kapangnanao mo,

¹⁰ ta amyan ko a macikaop jimo. So ikabo no makagogad nimo. Ta do ili rana ya am sira aro o tao meypaza pa omanoyong jyaken.”

¹¹ So niyan na dang so kasisi so ikadwa kawan ni Pawlo a mangnanao no ciriciring na ni Ama ta do to.

¹² No kapeypanirsirngen da si Cyadien do Akayya a pongso am meylovolovot sira o tao do Yotay amwoya ni Pawlo. Karahan am lolwen da a yangay do pacicicyan.

¹³ Maniring sira am, “Iya rana am na ipanci do tao o kaji ngapan so iwawalam ta a tao do Yotay. Yamacitarek o na ipangnanao so tao a yana ipanop so tao ji Ama ta do to.”

¹⁴ Naknakmen na ni Pawlo o kapeyzezyak na am to na amizing si Cyadien a mapacici so aro a tao do Yotay. Maniring am, “No si marahet o akman so sang a vazay am to ko ngamiznga inyo.

¹⁵ Am o nyo ikazyak am yaomagaz do adan a iwawalam nyo. So to nyo rana mapeyvazai sya, ta ko jyakzan eya peyvazain.”

¹⁶ So nipowbotan na sira do pacicicyan,

¹⁷ karakep da si Sotenay a tomalamozong no peyneynozyan a kabakbak da jya do pantaw no pacicicyan. Am ji na nikazyak ni Cyadien o akman sang a vazay.

Meysinaoli si Pawlo do Antia

¹⁸ Nimownay pa si Pawlo do Kedinto. Meyratateng am karwan na rana sira o akma ney kakteh do cinai a karara na si Paycila kani Akwila a omavang do avang a mangay do Sidiya. Makaranes sira do Kengkedi am mey na tedtedan o avok na, akma ney yongkad do kanimanci na rana no makdeng a mina ciring na ji Ama ta do to.

¹⁹ Makaranes rana sira do Ivoso am taitaiden na rana sira Paycila kani Akwila kangay na rana do peyneynozyan a macinekanekad do tao do Yotay.

²⁰ Taidan da si Pawlo a mownay pa dang amyan am ji na mya ni Pawlo.

²¹ Karwan na sira am amyan so ciring na jira. Maniring jira am, “No si apyahen ni Ama ta do to am pirwan ko pa o kai ko do jya.” Meyratateng am somakay rana do avang a komaro do Ivoso.

²² Makaranes si Pawlo do Kaysadiya am mangay do Yelosaleng a tomita so akma ney kakteh do cinai a kangay na rana do Antia.

²³ So nikownay na dang a kangay na rana do peycyeylilyan na do Cyalatay a kado Vodicya a mapait so onowned da no yamraralay ni Yeso a tao.

No kapangnanao ni Apolo do Ivoso a kado Kedinto

²⁴ Amyan so asa ka tao do Yotay a meyngaran si Apolo a meyili do Yadisanta nimangay do Ivoso. Iya rana am tey mateneng a mangnanao a mateneng do Seysyo.

²⁵ Amyan so nimnanao sya no ciring a omagaz ji Yeso. Am ori o ikowyat na mangnanao. Am o nipangnanao ni Yowani a nimanaktak o katenngan na.

²⁶ Ori o ji na rana mogawi a mangnanao do peyneynozyan. Mamizing ni Paycila kani Akwila am rarahen da mangay do vahay da kapanci da no ji na pa nimamizing a nanao a omagaz ji Yeso. Ori o nikapiya na rana no ipangnanao na.

²⁷ Meyratateng am naknakmen na ni Apolo o kangay na do Akayya. Ori o nisidongan da sya no akma ney kakteh do cinai do Ivoso a meyteygami nira no omanoyong ji Yeso do Akayya tomaotao sya no mangay jira. Makaranes rana dang si Apolo am arako o nisidongan na sira so nimakahap rana so pangangarilawan na ni Ama ta do to a tao.

²⁸ Ta mowyat a mapasapa do macinekanekad jya tao do Yotay a manci no Seysyo, do kanoyong ni Yeso a Misayya a nitovoy ni Ama ta do to.