Nimlivolivon 16 - Seysyo No Tao

No karara da si Timotay da Pawlo a kani Sila

¹ Mangay sira do Tepey a kado Disetela am amyan dang so asa ka tao a amraralay ni Yeso a meyngaran si Timotay. O ina na am tao do Yotay a amraralay ni Yeso. Am o ama na am tao do Sila.

² Ikanig da si Timotay no akma dey kakteh do cinai do Disetela kado Ikenyan.

³ Palolwen na ni Pawlo si Timotay am yongkadan na o kataotao na no iwawalam no tao do Yotay, ta panadnaden na o tao do dang a makateneng ji ama na a beken a tao do Yotay.

⁴ Omrateng sira do peycyeylilyan na am ipanci da o mina kaygi da do Yelosaleng no nipamnekan ni Yeso a omlivolivon no ciriciring na kano panipanirsirngen do kyokay do dang a panginginaran da.

⁵ Am ori o nipeypahagnat da so onowned do peycyakyokyokayan na. So nipangday da so araraw a meyparo no omanoyong rana ji Yeso a tao.

Rarahen na sira Pawlo ni Ama ta do to a mangay do Maciton

⁶ Ikongo do ji na mya sira no Seyzi a mangay a meylimwang no ciriciring na ni Ama ta do to do Yasiya, am ori o nipangonong da do Vodicya kado Cyalatay.

⁷ Makaranes sira do Misiya am naknakmen da o kangay da do Potiniya a ili. Am ji na mya sira no Seyzi.

⁸ Am ori o to da hatasi so Misiya a kangay da do Teloya.

⁹ Mahep rana am amyan so nipacita na ji Pawlo ni Ama ta do to, do akma ney tateynep. Macita na do akmey tateynep o asa ka tao do Maciton a meytatanek a mapasyasi jya. Maniring am, “Mai kamo do Maciton a somidong jyamen.”

¹⁰ Macita na ni Pawlo o akmey tateynep am ori o nikakeykai namen rana a nimangay do Maciton. Ta katenngan namen si Ama ta do to a manci nyamen a mangay meylimwang no Mapasaray a Ciriciring na do tao do dang.

No kanoyong na rana ji Yeso ni Ditiya

¹¹ Nimavang namen do avang do Teloya kapasongay da sya mangay do Samotake. Ikadwa na araw am makaranes namen do Niyapodi.

¹² So nyangay namen do rako a ili do Maciton a meyngaran so Veydipi. O ili ori am italamozong no Loma. So niseysan namen dang.

¹³ Ipeywalam no tao am mangay namen do ayo do siri no ili da, ta nimamizing namen do dang o angayan da meynozi no tao do Yotay. Makaranes namen dang am nanawen namen sira o aro a mavakes a nimalovot dang.

¹⁴ Amyan jira ang so asa ka mavakes apo do Tiyatila a meyngaran si Ditiya. O vazay na am macinginangina no masingat a akmey nikowpasan a vangkoro a milakayob. Makdeng o nakenakem na ji Ama ta do to. Mamizing na o ipangnanao ni Pawlo a ciring ni Yeso am mina todeywangi o onowned na, do kanisomidong na sya ni Ama ta do to.

¹⁵ Teyka namen a taktakan o mavakes ori a kano macivahay jya tao am maniring jyamen am, “No si milamdam nyo yaken so onowned a yameyngongyod a omanoyong ji Yeso am mai kamo a misan do vahay ko an.” So nitaidan na jyamen a peysanen.

No keyyan da Pawlo a kani Sila do pamemtengan do Veydipi

¹⁶ Ipisa am mangay namen do ayo a meynozi am amyan so nimasinmo namen do rarahan a mavakes a lamlamsoy da. Mahaw na o vazay no makwa, ta nikovotan no kalamsoyan ni Satan. So ikaro no mahap na nizpi a itoro do mapeylamlamsoy sya a tao.

¹⁷ So to na maciloloi jyamen do rarahan a amlololos. Maniring am, “Sira rana ya am da ahapen o vazay no ney manokdwan na Tao do to. Yada ipeylimwang o Tao do to a mapatazadang jyaten do teyngato.”

¹⁸ Mangday do araraw a amlololos. Ikarahet na ni Pawlo am to meyvazingowngaw a tomita sya. Maniring do nikomovot jya am, “Ko pangozayan o ngaran na ni Yeso Kizisto a manci nimo a makowbot rana do kataotao na.” Am ori o nipakowbot na rana no nikomovot jya.

¹⁹ Katenngan da na no pacivahayan na no mavakes ang o kabo rana no peynizpyan da am rakpen da si Pawlo a kani Sila a lololwen a yangay do panipanirsirngen do ili da.

²⁰ Maniring sira am, “Sira rana tao do Yotay am da peyzavozavozen o icicirawat do ili ta ya.

²¹ Ta sira mangononong so ta ikarahet a tao do Loma.”

²² So ikamimin da no aro a tao a macioya jira. O panipanirsirngen da am nipakaro da o talili da Pawlo a kani Sila a kapanci da no tao a somipsipzot jira.

²³ Mateyka da sira sipsipzotan am pasdepen da sira do pamemtengan a kapanci da no mamzamzat a ominlid so ivaod na sira.

²⁴ Am ori o nipaneban na rana jira do zosok na rana no pamemtengan a kapasopit na so ai da do kayo a kaji da makapeygonagonayan.

²⁵ Avak no ahep am meynozi si Pawlo a kani Sila kapeyyanwanood da somaray ni Ama ta do to. O kararay da nipteng da am to da ngamiznga sira.

²⁶ Meyratateng am to ngyan so rako a kanini. Am ori o nikagonagonay no pamemtengan a kapeycyeyweywang na no pangengneban. O nivaod da sira vahalang do lima da am to meycyazavazavat.

²⁷ Mayokay o mamzat jira am to na cita o pangengneban a nimeywang. Ipanci na o kanisomaway da rana no nipteng da tao. Am ori o nipangap na so ipangan na ipanma na do kataotao na.

²⁸ Macita na ni Pawlo am tawagan na. Maniring am, “Ji mo manomai o kataotao mo. Cyaha, ta namen mamimin a yapa myan do jya.”

²⁹ O mamzamzat rana am manovoy so tao a mangap so zampo. Somdep rana am manyahey a to na nizikzik a mangay meylilitod do tangain da da Pawlo a kani Sila.

³⁰ Meyratateng am powboten na sira. Maniring jira am, “Manga kahakay, makongo ko so wanjin a kapakahap ko so to meyyonong a ikavyay no pahad ko.”

³¹ Maniring sira jya am, “Anoyngan mo si Yeso a Panirsirngen ta. Ta ori o ipakahap nyo so to meyyonong a ikavyay no pahad nyo a asa ka vahay.”

³² Meyratateng am nanawen da sira asa ka vahay no ciriciring na ni Ama ta do to.

³³ No kanang na am nioyasan na no mamzamzat o nipeyzazan da Pawlo a kani Sila. Meyratateng am mamimin sira asa ka vahay a nitaktakan da,

³⁴ a kapanci da ni Pawlo a kani Sila a macyakan jira do vahay da. So ikasaray da asa ka vahay, do kaniomanoyong da rana ji Ama ta do to.

³⁵ Ikadwa na araw do pezak am manovoy o panipanirsirngen da so meykalsong a manci no kapasaway da si Pawlo a kani Sila.

³⁶ Maniring o mamzamzat ji Pawlo am, “Na ipanci no panipanirsirngen o na kapasaway jimo a kani Sila. So to nyo na makowboci a somaliway.”

³⁷ Am maniring si Pawlo do meykalsong am, “Yamen am tao namen do Loma. Am ikongo da todey nipsipzoci jyamen, a da katodey angneban jyamen do pamemtengan a yabo so karatan. Ikongo da taywan sya do taotao so da kapasaway jyamen. So ikarahet no akman sang. Am ori o pancyan nyo no panipanirsirngen, ta mai sira a mapowbot jyamen.”

³⁸ Meyratateng am mangay na ipanci no meykalsong do panipanirsirngen da. Mamizing da si Pawlo a kani Sila a tao do Loma am mamogaw sira.

³⁹ Am ori o nyangay da do pamemtengan a meyminaminasi nira kapowbot da rana sira komaro do ili da.

⁴⁰ Makowbot rana si Pawlo a kani Sila do pamemtengan am mangay sira do vahay ni Ditiya. So nipakacita da dang so akma dey kakteh do cinai kapait da sira so nakenakem da ji Yeso a kangay da rana.