Nimlivolivon 15 - Seysyo No Tao

Makdeng a nikazyak da do Yelosaleng

¹ Amyan so tao a apo do Yotay a nimai do Antia a omnanao so sinjya do dang. Maniring sira am, “No si ji nyo mangozai o iwawalam na ni Moyse a amyongkad do kataotao nyo a meyngongyod a Isedi am ji na patazadanga inyo ni Ama ta do to do teyngato.”

² Si Pawlo a kani Parnapo am nimakdeng sira nimacigalagal jira do akman sang a malas a nanao. Am ori o nipamnekan da ji Pawlo a kani Parnapo a kano tatasa ka sinjya a mangay do Yelosaleng a macisirsiring nya do nipamnekan ni Yeso a omlivolivon no ciriciring na kano panipanirsirngen do kyokay.

³ Meyratateng am tovoin da rana sira no akma dey kakteh do cinai a mangay. So nyangay da tomazogaw no sinjya do Vongnise a kado Samadiya. Maniring sira jira am, “Yaro rana o beken a tao do Yotay a yarana omanoyong ji Yeso.” Mamizing da ori am masaray sira.

⁴ Makaranes rana sira do Yelosaleng am taotawwen da sira no akma dey kakteh do cinai a kano panipanirsirngen da do kyokay a kano nipamnekan ni Yeso a omlivolivon no ciriciring na. So niononongan da jya da Pawlo a kani Parnapo so nisidongan na sira ni Ama ta do to do vazay da.

⁵ Maniring o tatasa ka amraralay ni Yeso a tao a macyagom do Vadisay am, “Jyabo kaji da yongkadan do kataotao da no beken a tao do Yotay a mangozay do iwawalam ni Moyse a.”

⁶ Meyratateng am peysirisiring da no nipamnekan ni Yeso a omlivolivon no ciriciring na kano panipanirsirngen da do kyokay o ciring da no tao a macyagom do Vadisay.

⁷ So nikownay da nimeysirisiring. Meyratateng am meytatanek si Pite. Maniring jira am, “Manga kakteh, nyo katenngan yaken a na nipamnekan ni Ama ta do to a mangay a mapamizing so beken a tao do Yotay no Mapasaray a Ciriciring.

⁸ Si Ama ta do to rana am katenngan na o onowned no tao. So nitorwan na no Seyzi do beken a tao do Yotay, akman jyaten a nitorwan na nya,

⁹ pacittan na no kapeyyangangay na jyaten a patazadangen do teyngato. Na nivonas o raraten da no beken a tao do Yotay, do da kanoyong rana ji Yeso.

¹⁰ Nyo ileylamdamen si Ama ta do to? Nyo pancyan no kamimin no iwawalam ta tao do Yotay a ahapen da no yamraralay ni Yeso a beken a tao do Yotay? To ko na macitangain jinyo am ji da nimataptap no ineynapo ta o iwawalam ni Moyse a pangozayan.

¹¹ Yaten rana am meyyangay ta kano beken a tao do Yotay a patazadangen ni Ama ta do to do teyngato, do ta kapeyhanhan no pangangarilawan na ni Yeso a Panirsirngen ta.”

¹² So ikabo no meykazyazyak a tao a omamizing so ononongan ni Parnapo a kani Pawlo, do kapeyzokab da no vazay da do beken a tao do Yotay, ta nisidong na sira ni Ama ta do to.

¹³ Mateyka sira a mangononong am meyzezyak si Yake. Maniring am, “Manga kakteh, amizngen nyo an.

¹⁴ O nipanci ni Simong Pite no kacitai ori am na nipanci o kanimamnek na ni Ama ta do to do beken a tao do Yotay a omanoyong jya.

¹⁵ O akman sang a vazay am mina todey mangononong do nivatvatkan da no panoyonoywan na so ciring ni Ama ta do to no kakwa. Maniring am,

¹⁶ ‘No makwa am meysinaoli ko pa a mapatnek so yakma raney nimazkem a vahay ni Tawey.

¹⁷ Ta ori o ikamimin da omanop jyaken no nipamnekan ko a beken a tao do Yotay.

¹⁸ Ori rana am ciring na ni Ama ta do to a nipamizing na jira no kakwa pa.’ ”

¹⁹ Maniring pa si Yake am, “O nakenakem ko am taosya o kapeyparo ta so vazay da no yarana amraralay ni Ama ta do to a beken a tao do Yotay.

²⁰ Apyapya pa o kapeyteygami ta nira a manci no kaji da nganan so nipazos da. Taosya o kapangzakza da so icyatatao da. Taosya o kakan da so rala no vinyay a kano nivitkeh da vinyay a nimazakat a jya nimvoyog so rala.

²¹ Ta nimakalapo no kakwa do ipeywalam no tao o keyyan no tao do peyneynozyan amvilang do iwawalam ni Moyse. So na icyakman sang do peycyeylilyan na a yada ipeylimwang do tao.”

Teygami da do beken a tao do Yotay a amraralay ni Yeso

²² No kanang am mamnek sira o nipamnekan ni Yeso a omlivolivon no ciriciring na kano panipanirsirngen do kyokay a kano amraralay ni Yeso a tao so pahanhanen da macihza ji Pawlo a kani Parnapo a mangay do Antia. So nipamnekan da ji Sila kani Yota. O kasaing no ngaran ni Yota am si Pasapa. Ikanig da sira ori no akma dey kakteh do cinai.

²³ O peypeypangayan no domket a ciring do teygami ori am: “Kokay kamo akma nameney kakteh do cinai a beken a tao do Yotay a yamyan do Antia ka ninyo a yamyan do Sidiya ka ninyo a yamyan do Cidicya. Yamen a kakteh nyo a nipamnekan ni Yeso a omlivolivon no ciriciring na kano panipanirsirngen do kyokay am namen meyteygami jinyo.

²⁴ Namen nimamizing sira o yatatasa ka tao a mangononong so malas a yanyo ikarahet so onowned. Am yabo o asa ka tao a namen nitovoy.

²⁵ Am ori o namen nipeysirsirngan nya no kapanovoy namen so mangay jinyo do dang. So da ipacihza ji Parnapo a kani Pawlo a akma tey kakteh do cinai,

²⁶ ta sira rana am da ji hawan o inawan da a mahap so vazay ni Yeso Kizisto a Panirsirngen ta.

²⁷ O namen nipamnekan rana am si Yota kani Sila. Sira o namen hanhan a manci no ciring namen do teygami eya.

²⁸ Ta namen ipeyhanhan o Seyzi a macyanoyong jyamen a ji mapeyparo so vazay nyo. O makekdeng rana a ciring o itoro namen jinyo a pangozayan nyo.

²⁹ Taosya o kakan nyo so nipazos da. Taosya o kakan nyo so rala no vinyay a kano nivitkeh da vinyay a nimazakat a jya nimvoyog so rala. Taosya o kapangzakza nyo so icyatatao nyo. Si pangozayan nyo ori am ipeypapya nyo ori. Inaoy si apzatan na inyo ni Ama ta do to.”

³⁰ Mangay rana sira o nipamnekan da do Antia am lovoten da rana sira o yamraralay ni Yeso a katoro da no teygami da jira.

³¹ Vilangan da rana o teygami da jira am masasaray sira, ta apiya o ciring da ipait da sira.

³² Si Yota kani Sila am mateneng sira mangononong so ciriciring na ni Ama ta do to. Am ori o ikaro no ciriciring da ipowyat da so onowned da no akma dey kakteh do cinai.

³³ So nikownay da dang a nimiseysan. Mangay rana sira am taitaiden da sira no akma dey kakteh do cinai a meysinaoli rana do Yelosaleng.

³⁴ [Am si Sila am mina todavezed do dang.]

³⁵ Si Pawlo a kani Parnapo am amyan pa sira do Antia amnanao so tao a meylimwang ni Yeso. So nikaro no mina kararay da somidong sira do vazay da.

No kapeysyay da Pawlo a kani Parnapo

³⁶ Kadadayan na rana do araraw am ipanci na ni Pawlo ji Parnapo o kapeysinaoli da do aro a ili a nipeylimwangan da rana no ciriciring na ni Ama ta do to a tomita so akma dey kakteh do cinai.

³⁷ Naknakmen na ni Parnapo si Yowani Make a palolwen da macihza jira.

³⁸ Am ji na mya ni Pawlo. Ta no keypisa am jya nimakey a macihza jira si Yowani Make. Am ori o nipacisyay na jira do Pangveydiya.

³⁹ Am ori o ji da nimacipasovoi do vazay da. Karahan am to sira meysyay rana. Si Parnapo rana am nipalolo na si Make a mavang do avang a mangay do Saypolose a pongso.

⁴⁰ Si Pawlo rana am nipamnekan na si Sila a macihza jya. Karwan da sira o akma dey kakteh do cinai am ipeynozi da sira ji Ama ta do to a omzat jira.

⁴¹ So nilivonan da so peycyeylilyan na do Sidiya kado Cidicya a mapait so onowned da no akma dey kakteh do cinai.