Nimlivolivon 13 - Seysyo No Tao

No kapamnek da ji Parnapo a kani Sawlo a mangay meylimwang no ciriciring na ni Ama ta do to do peycyeylilyan na

¹ O kyokay do Antia am amyan so panoyonoywan na so ciring ni Ama ta do to a kano mangnanao a tao. Sira rana am si Parnapo a kani Simoyang a ngaranan da si Vaheng a kano tao do Cidinay a meyngaran so Lociye a kani Manaeng a nipavahay ni ama na ni Helote a panirsirngen do Cyadidi a kani Sawlo.

² No kararalay da ni Ama ta do to a ji mangakaday am maniring jira o Seyzi am, “Pamnekan nyo si Parnapo a kani Sawlo a mapeyvazay so vazay ko.”

³ Mateyka sira meynozi a ji mangakaday am paoptahen da o lima da ji Parnapo a kani Sawlo a ipowyat da sira do vazay da katovoy da rana sira mangay do peycyeylilyan na.

No keyyan da Parnapo a kani Sawlo do Saypolose a pongso

⁴ Nipahanhan na no Seyzi si Parnapo a kani Sawlo. Am ori o niosok da mangay do Silyoci a kavang da do avang a mangay do Saypolose a pongso.

⁵ Makaranes sira do Salami a ili am ipeylimwang da o ciriciring na ni Ama ta do to do aro a peyneynozyan da no tao do Yotay. No kanang am nimacihza jira si Yowani Make a somidong sira do vazay da.

⁶ Nilivolivon da o pongso do Saypolose. Makaranes sira do Pavo a ili am masazi da dang o asa ka tao do Yotay a meyngaran so Pa-Yeso a mamnek a tao. Ipanci na o kataotao na a panoyonoywan na so ciring ni Ama ta do to. Am malas ori.

⁷ Kagagan na o mateneng a panirsirngen no Saypolose a meyngaran si Secyo Pawlo. Nipanci na si Parnapo a kani Sawlo a mai, ta kakzeben na o kamizing na so ciriciring na ni Ama ta do to.

⁸ Am ji na nipya no mamnek a tao. (O ngaran na do Sila am si Idima.) Ta naknakmen na o kazazat na jya a omanoyong ji Yeso.

⁹ No kanang rana am nioyatan no Seyzi si Sawlo. (Mamlis rana am meyngaran so Pawlo.) Ori o mina to na pasilapi jya a citahen.

¹⁰ Maniring jya am, “Imo rana ya am kamo meyyangay so nakenakem a kani Satan a yaji ngahap so vazay ni Ama ta do to, do mo kapanlita a yaomalalas do ciriciring na ni Ama ta do to.

¹¹ So ipeydedna na jimo no peyoyaoyyan ni Ama ta do to. So ikownay mo a mavota ji makacita so araw.” Makarahan am jya nimeyyahahay si Idima a masari so citahen a kavota na rana. So nipeykazakazazap na meykala so tao a komalay sya.

¹² Macita na ni Secyo Pawlo o akman sang a vazay am anoyngan na rana si Yeso, do kapeyzokab na no oyowyat no ipangnanao da a omagaz ji Yeso.

Do Antia a macinapnap do Pisitiya

¹³ Meyratateng am mavang sira Pawlo do avang a apo do Pavo a mangay do Peyke a ili a macinapnap do Pangveydiya. Makaranes sira do dang am karwan na sira ni Yowani Make a kapeysinaoli na mangay do Yelosaleng.

¹⁴ Am sira Pawlo a kani Parnapo am to sira meysosonong a mangay do asa ka ili a meyngaran so Antia a macinapnap do Pisitiya. O araw na no ipeywalam no tao am mangay sira do peyneynozyan a omamizing so ciriciring na ni Ama ta do to.

¹⁵ Mateyka na vilangan no asa ka tao o nivatvatkan ni Moyse a kano nivatvatkan no panoyonoywan na so ciring ni Ama ta do to am manovoy o panipanirsirngen no peyneynozyan so tao a mapacici sira. Maniring am, “Inyo rana yararwa am si myan so ipait nyo jyamen am ipanci nyo an.”

¹⁶ Ori nipeytatanek ni Pawlo a mapatala so lima na. Maniring am, “Inyo rana Isedi a tao a ka ninyo a yamraralay ni Ama ta do to am amizngen nyo an.

¹⁷ O Tao do to ta Isedi a tao am na nipamnekan o ineynapo ta amraralay nya. No keyyan da do beken a ili da do Ayci am nipasaod na sira. Meyratateng am agagen na sira no oyowyat na a komaro dang.

¹⁸ No keyyan da pa do kabwan no nihakawan no tao so sikapat a ngarnan (40) so awawan am tana ji da ngamiznga si Ama ta do to am apzatan na sira.

¹⁹ Am ori o nibalinasan da so apito a ka ili do Cyanan, ta nisidong na sira no oyowyat na katoro na nya jira so ili da. No kangay da do Ayci a mangay no keyyan da rana do Cyanan am sikalima o ikasikalima na poo (450) no awawan na.

²⁰ “Meyratateng am ipamnek na sira so mapalipalit a amyokod nira mangay no kapeypanirsirngen na ni Samoar. Iya rana am panoyonoywan na so ciring ni Ama ta do to.

²¹ No kanang am ikakza da o keyyan no asa ka panirsirngen da. So nipamnekan na ji Sawlo anak ni Cise sivovoong ni Penyaming a meypanirsirngen so sikapat a ngarnan (40) so awawan.

²² Pakarwen na ni Ama ta do to si Sawlo am pamnekan na si Tawey a panirsirngen da. Maniring si Ama ta do to am, ‘Yako ikaglaw si Tawey anak ni Yesi, ta na miminen o vazay ko ahapen.’

²³ Si Tawey rana am ineynapo na ni Yeso a nitovoy ni Ama ta do to a mapatazadang jyaten do teyngato a sivosivovoong ni Isedi. Ta ori o nipanci na no kakwa pa ni Ama ta do to.

²⁴ No kaji na pa mangnanawan ni Yeso am nimanma rana si Yowani a mapaziman so Isedi a tao a komaro do peyraratenan da kataktak na jira.

²⁵ Makeykai rana o vazay ni Yowani a komavos am ipanci na jira. Maniring am, ‘Nyo katenngan yaken an? Yaken rana am beken a mapatazadang jinyo do teyngato a nyo pananalahen a mai. Ta yamyan pa so yamai a maizaizay pa ka nyaken. So ikabo no pacicingayan ko jya a omovay so iktan no tokap na.’ ”

²⁶ Maniring pa jira si Pawlo am, “Manga kakteh a sivosivovoong na ni Apolahan a ka ninyo a yamraralay ni Ama ta do to a beken a tao do Yotay, yaten o nipeylimwangan na no ciriciring a omagaz do kapatazadang na jyaten do teyngato ni Ama ta do to.

²⁷ Am o yameyvahay do Yelosaleng a tao a kano panipanirsirngen da am da jyatenngi si Yeso a nitovoy ni Ama ta do to a mapatazadang jyaten. Tana yamangday do ipeywalam no tao o na keyyan no da mamizing do peyneynozyan da am da jyatenngi o peypeypangayan no nivatvatkan no panoyonoywan na so ciring ni Ama ta do to a omagaz ji Yeso. So nipangononong no mina ciring da no panoyonoywan na so ciring ni Ama ta do to, do mina kapanci da ni Yeso a wakwaken.

²⁸ Tana ji da kala o karatan na izakat da sya am pakotokoten da ji Pilato o kazakat da sya.

²⁹ Mangononong rana o nivatvatkan do Seysyo a omagaz ji Yeso am akasen da rana do jyojika kapakakasa da sya do heseb na.

³⁰ Am nivyay na ni Ama ta do to.

³¹ O mina kararay na apo do Cyadidi a mangay do Yelosaleng am nimacita da si Yeso a nimirwa a mavyay do sikapat a ngarnan (40) so araraw. Sira ori nimeylimwang ni Yeso jyaten a tao do Yotay, do kanimakacita da sya.

^32-33 Sicyaraw rana ya am namen ipeylimwang jinyo o Mapasaray a Ciriciring na ni Ama ta do to. O nipanci na pa ni Ama ta do to do ineynapo ta am yana nimangononong jyaten an. Ta na nivyay si Yeso ni Ama ta do to akman so nivatvatkan do ikadwa na no Anwanood. Maniring am, ‘Imo am Anak ko imo an. So peylimwangan ko nimo sicyaraw eya do yamo kapeyyama jyaken.’

³⁴ Si Ama ta do to rana a nimapeyvangon sya do heseb na a ji mamyapya nya mirwa a mawakwak am maniring am, ‘To ko peynara ji Tawey o aryarilaw ko jinyo.’

³⁵ Maniring pa si Tawey do nivatvatkan a Anwanood am, ‘Mo ji mamyapyan o kataotao no nipamnekan mo a tao a macirapa do tana.’

³⁶ No kapeyigegen na pa ni Tawey am aro mina vazay na ji Ama ta do to. Mawakwak am patangkeden da o heseb na do heseb da no ineynapo na. So nipacirapa no kataotao na do tana.

³⁷ Am si Yeso am jya nimakman so sang o kataotao na, ta nivyay na ni Ama ta do to.

^38-39 Manga kakteh, naknakmen nyo an. No si ji nyo meyhanhanan si Yeso am jyavonas o raraten nyo. O iwawalam na ni Moyse am ji na agag inyo do peyraratenan nyo an. Am yaomanoyong ji Yeso a tao am oyatan na sira a komaro do peyraratenan da.

⁴⁰ Am ori o apzatan nyo do onowned nyo. Ta meydedna jinyo o peyoyaoyyan na ni Ama ta do to a domket do vakong da no panoyonoywan na so ciring ni Ama ta do to. Maniring sira am,

⁴¹ ‘Inyo a yamangolala a tao am amizngen nyo an. Amyan so macita nyo a ikanyahey nyo a vazay a pasingsingtan ko jinyo. Tana yamyan so tao a mapaziman sya jinyo am nyo ji nganoyngi.’ ”

⁴² Mateyka rana mangononong si Pawlo am karwan da rana kani Parnapo o peyneynozyan. Maniring sira o niomamizing sya a tao am, “Si ipisa kapeywalam no tao am mai kamo pa omnanao jyamen.”

⁴³ Meysyasyay rana sira am aro tao a macilolo ji Pawlo a kani Parnapo. Ipait da sira a to ngotokot so nakem a meyhanhan ni Ama ta do to a yasomidong sira. Sira rana am tao do Yotay a kano beken a tao do Yotay a mahap rana so iwawalam no tao do Yotay.

⁴⁴ Ipisa kapeywalam no tao am mamimin sira o tao a nimangay a omamizing so ciriciring na ni Ama ta do to.

⁴⁵ Am macita da no tao do Yotay o karo da no meylovolovot a tao am ikeynanahet da sira. Am ori o rehrehtan da si Pawlo a kano ciriciring na.

⁴⁶ Am ikakdekdeng ni Pawlo a kani Parnapo a meyzezyak a omnanao sira. Maniring sira am, “O ciriciring na ni Ama ta do to am nimanma kamo a peylimwangan nya. Am nyo kaji nganoyngan jya. Nyo to nazibwan o na kapanta ninyo ni Ama ta do to so to meyyonong a ikavyay no pahad nyo. Am ori o namen karwan rana jinyo a mangay do beken a tao do Yotay.

⁴⁷ Ta yamyan so na nipakolivava rana jyamen ni Ama ta do to a ciring na. Maniring jyamen am, ‘Ko na nipamnekan inyo a akma dey zezngang no beken a tao do Yotay. Ipeylimwang nyo do peycyamahamahatawan na o kapatazadang ko sira do teyngato.’ ”

⁴⁸ Mamizing da no beken a tao do Yotay am masaray sira. Ori o nyazwazwayan da so ciring na ni Ama ta do to. Sira rana aro a tao am nakenakem na ni Ama ta do to o kapamnek na jira a mahap so to meyyonong a ikavyay no pahad da, do kanoyong da rana ji Yeso.

⁴⁹ So nikamimin da rana do peycyeylilyan na makamizing so ciriciring na ni Ama ta do to.

⁵⁰ Am pasozisozin da no tao do Yotay o maizay a mahakay a kano meynakem a mavakes a omraralay ni Ama ta do to a mapakakasi si Pawlo a kani Parnapo. Ori o nipowbotan da sira do ili da.

⁵¹ Am ori o nitoktokan da so tana do ai da da Pawlo a kani Parnapo a itovil da jira meyraraten a ji mamlis so nakenakem. Meyratateng am karwan da rana sira a mangay do Ikenyan.

⁵² Masasaray sira o amraralay ni Yeso a tao do Antia do kowyat na jira no Seyzi.