Nimlivolivon 12 - Seysyo No Tao

¹ No kanang rana am nipakakasi na no panirsirngen da a meyngaran so Helote o omraralay ni Yeso a tao,

² a kawakwak na sya no ipangan si Yake a kakteh na ni Yowani.

³ Macita na sira o tao do Yotay a masaray no akman sang a vazay am mey na rakpen pa si Pite. No kanang am mamaring sira so kanen a koman so jya nimimway a pang.

⁴ Marakep na si Pite am pasdepen na do pamemtengan a kapahanhan na so meykalsong a tomita sya. Amyan so meykapat a lipenpenan a teypapapat a mapalipalit a tomita sya. Ta naknakmen na ni Helote o kapacici na sya wakwaken do tangain no aro a tao, no mateyka rana sira mamaring so kanen do Iyeci.

⁵ Am ori o to na peyyani pa si Pite do pamemtengan. So ikakdeng da no omraralay ni Yeso a meynozi nya.

Nipasaway no tinsi si Pite do pamemtengan

⁶ Makasahep rana a kapowbot na si Pite ni Helote a pacicin a wakwaken am mitkeh si Pite do panavavakan da no rarwa meykalsong a mavaod no adwa ka vahalang. O pazevngen am amyan dang so mamzat a meykalsong.

⁷ Am to ngyan so asa ka tinsi ni Ama ta do to a meytatanek. So nicirayan na so pamemtengan a kapinan na do pakaw na ni Pite a yokain. Maniring am, “Kayokay rana.” Meyratateng am mina todazavat do lima na ni Pite o nivaod da sya.

⁸ Maniring pa o tinsi jya am, “Peyyabtek rana kapeytokap mo.” Karahan am meyyabtek rana kapeytokap na ni Pite. Maniring jya o tinsi am, “Peytalili rana o magorogod mo a kapacihza mo jyaken.”

⁹ So nionotan na jya ni Pite a makowbot do pamemtengan. Am ji na tenngi o kanoyong na no vazay na no tinsi, ta ipanci na tateynep na.

¹⁰ Peyliktawan da o manmanma mamzat a kano ikararwa na am makaranes rana sira do niparing da vahalang a pangengneban a macimingket do ili da. Mina todeywangi. Am ori o nipakowbotan da rana mangonong do asa ka rarahan. Am to na nangpawa ni Pite o tinsi, do kabo na rana do katangked na.

¹¹ Katenngan na rana ni Pite am maniring am, “Ko na katenngan sicyaikwaya o na kanoyong ni Ama ta do to a nimapahanhan so tinsi na a omahap jyaken a komaro do ahapan na so inawan ko ni Helote a kano peymetdehan da jyaken no aro a tao do Yotay.”

¹² Am ori o nyangay na do vahay da Madiya, ina na ni Yowani Make. Do dang rana am kalwalovotan da a meynozi nya.

¹³ Pokpoken na o pazevngen ni Pite am makowbot o asa ka mavakes a lamlamsoy da a meyngaran so Lota.

¹⁴ Katovilan na o izezyak na ni Pite am masaray. Am ori o nyangay na do karwan da. Maniring am, “Yamyan si Pite do pantaw.”

¹⁵ Maniring sira jya am, “Ka zomyak ang.” Am ji na ablisi o ipanci na. Maniring pa sira jya am, “Ala pahad na ori ni Pite.”

¹⁶ So nikownay ni Pite do pantaw. Iwangan da am manoyong a si Pite. Am ori o nipeyzokaban da nya.

¹⁷ Kasdep na ni Pite am patalahen na o lima na. Maniring jira am, “Ji kamo meyzezyak, ta ononongan ko na o panpandan no na nipasawayan jyaken ni Ama ta do to do pamemtengan.” Maniring pa jira am, “Ipanci nyo pa ji Yake a kano akma nyoy kakteh do cinai.” Teyka na ononongan ni Pite o cinasasaodan na am mangay rana do asa ka ili.

¹⁸ Pezak rana am ikazyak da no aro a meykalsong, ta ji da tenngi o nyangayan ni Pite.

¹⁹ Am ori o nipancyan na nira ni Helote a komala sya. Am ji da kala. Karahan am pacicin na sira o aro a mamzamzat. Maniring jira am, “Nyo nikongo ori ang.” Am abo o asa ka tao a mapasapa jya. Meyoyaoya am to rana manovoy so tao a amzakat sira. Meyratateng am karwan na rana ni Helote o Yotay a mangay a meyvahay do Kaysadiya.

No kazakat na ni Helote

²⁰ No kanang am nimakdeng si Helote a nimwoya no tao do Tayar a kado Siton. Am ori o nyangay da ji Polaseto a mapasyasi jya somidong sira macisirsiring ji Helote, ta si Polaseto rana am tomalamozong no vahay na ni Helote. Am ori o nipacihza na jira a mangay ji Helote a mapeyyalalap so nakem da ji Helote. Ta o kanekanen da am apo do ili ni Helote.

²¹ O araw no nipancyan na nira am meyyaywayob rana so ayob no panirsirngen amlisna do lilisnan no panirsirngen a kapangononong na do aro a tao.

²² Mamizing da o ciring na am amlololos o aro a tao. Maniring sira am, “Beken a izezyak no tao ya, ta izezyak no tao do to.”

²³ Nikakza na ni Helote o kararalay da nya no tao. Meyratateng am mina to meyhekas o tinsi ni Ama ta do to ambakbak jya, ta ji na azwazwaya si Ama ta do to. Am ori o nipanmanma na a nimowwed a kazakat na rana.

²⁴ Ori rana o nipeylimwang no ciriciring na ni Ama ta do to do dang.

²⁵ Mateyka da rana o vazay da da Parnapo a kani Sawlo do Yelosaleng am palolwen da si Yowani Make a kapeysinaoli da do Antia.