Nimlivolivon 11 - Seysyo No Tao

Ononongan na ni Pite o vazay na do Yelosaleng

¹ O nipamnekan ni Yeso a omlivolivon no ciriciring na kano aro a sinjya do Yotay am mamizing da o beken a tao do Yotay a omanoyong rana do ciriciring na ni Ama ta do to.

² Meysinaoli si Pite do Yelosaleng am nioya da no tey makdeng a omahap so iwawalam da no tao do Yotay.

³ Maniring sira am, “Ikongo o yamo nisan do vahay da no beken a tao do Yotay. Ikongo mo ipacihanghang jira.”

⁴ Karahan am ononongan na rana jira o niyapoyapwan no akman sang a vazay.

⁵ Maniring jira am, “Meynozi ko do Yepey am nimakacita ko so apo ji Ama ta do to a milakayob a tontonen da apo do teyngato.

⁶ Citahen ko am amyan do sahad na so meycyamadadayan a omalalam a kano volay a kano meyyasasalap,

⁷ a kapakamizing ko so macisirsiring jyaken. Maniring am, ‘Mo Pite, peytatanek rana kapanzakat mo so yakan mo.’

⁸ Am maniring ko am, ‘Mo Panirsirngen, taosya, ta ji ko nikoman so sang, ta ji namen ngangana ori a tao do Yotay.’

⁹ Pirwa na so kapanci na nya jyaken am maniring am, ‘O ipanci ni Ama ta do to a apya kanen am ji mo mancyan a ji ngangana.’

¹⁰ O akman rana sang a vazay am ipitlo a mavahangso a kahap da rana sya do hanit.

¹¹ Todey macinao sira makasasnad do nisanan ko a vahay o tatlo a ka beken a tao do Yotay a nitovoy da apo do Kaysadiya a nikomala jyaken.

¹² So nipancyan na nyaken no Seyzi so kaji ko ratan so kapacihza ko jira. O ananem eya akma tey kakteh do cinai a mina kararay ko a nyo macita eya am nipehza ko sira jyaken a mangay do Kaysadiya kasdep namen do vahay da Kenaylyo.

¹³ Ipanci na jyamen ni Kenaylyo o nimacita na asa ka tinsi a nimeytatanek do vahay da. Maniring jya am, ‘Manovoy ka so tao a mangay do Yepey a manci no asa ka tao a meyngaran si Simong Pite a mai jya.

¹⁴ Ta yamyan so na ipanci jinyo a omagaz do kapatazadang na jinyo do teyngato ni Ama ta do to a asa ka vahay.’

¹⁵ Nanawen ko sira am to meyhekas jira o Seyzi akman no ka ori pa so kapeyhekas na jyaten no Seyzi.

¹⁶ Ori o nipakanakman ko so mina ciring na no Panirsirngen ta a si Yeso. Maniring am, ‘Si Yowani rana am nitaktakan na inyo no ranom. Am do kadadayan no araraw am meyhekas jinyo o Seyzi.’

¹⁷ So nikanoyong ni Ama ta do to a yatomoro no Seyzi do beken a tao do Yotay, akman jyaten a nipanta na so Seyzi no kanoyong ta ji Yeso Kizisto a Panirsirngen ta. A yako ikongo a kato ko makazazatan do vazay ni Ama ta do to.”

¹⁸ Mamizing da o ciring na jira am ji da rana namwada, ta isaray da si Ama ta do to. Maniring sira am, “Yamanoyong si Ama ta do to a yamarilaw no beken a tao do Yotay a nimamlis rana a na torwan no to meyyonong a ikavyay no pahad da.”

Amraralay ni Yeso a tao do Antia

¹⁹ Wakwaken da si Setiven am peyvwaken da na o omraralay ni Yeso a tao. Am ori o nikarwan da do Yelosaleng a mangay tomayo do Vongnise a kado Saypolose a kado Antia a kapeylimwang da no ciriciring na ni Ama ta do to do tao do Yotay.

²⁰ Am o tatasa ka tao do Saypolose a pongso a kado Cidinay am nimangay sira do Antia a meylimwang no ciriciring ni Yeso do beken a Yotay.

²¹ Amyan jira o oyowyat ni Ama ta do to. Am ori o nipeyparo da no tao a omraralay ni Yeso.

²² Mamizing da no omraralay ni Yeso do Yelosaleng o akman sang a vazay am tovoin da si Parnapo a mangay do Antia.

²³ Makaranes rana am tey masaray, ta nimacita na o aryarilaw na sira ni Ama ta do to. Ori o nipaitan na sira to ngotokot so nakenakem ji Yeso.

²⁴ Si Parnapo rana am tey yapya o nakenakem na, ta nioyatan no Seyzi. Am ori o ikakdeng na meyhanhan ni Ama ta do to. Ori nipeyparo da no tao a omanoyong ji Yeso.

²⁵ Meyratateng am mangay rana si Parnapo do Tasose a komala si Sawlo.

²⁶ Makala na rana am palolwen na mangay do Antia. So nipakasa kawan da macikaop do aro a sinjya amnanao sira. Nimacipinda no kano nang o kangaran da rana jira a “omraralay ni Kizisto” do Antia.

²⁷ No kanang rana am amyan so manoyonoyo so ciring ni Ama ta do to a apo do Yelosaleng a mangay do Antia.

²⁸ Amyan jira so asa ka tao a meyngaran si Acyapo. Maniring do aro a tao am, “Nipaziman na jyaken no Seyzi o keyyan no omanam a rako a abcil do karawan.” (So nipangononong no ciring na no kapeypanirsirngen da si Kelawti.)

²⁹ Am ori o nikamimin da no amraralay ni Yeso a tao a mapeysinsinmo so nizpi a itoro da do akma dey kakteh do cinai a meyvahay do Yotay. To da palololwa do karwaro no nizpi da o panaoben da.

³⁰ O nilovot da na nizpi am nipahanhan da si Parnapo a kani Sawlo a mangay nya do panipanirsirngen da do kyokay do Yelosaleng.