Nimlivolivon 10 - Seysyo No Tao

Si Pite a kani Kenaylyo

¹ Amyan so asa ka tao do Kaysadiya a ili a meyngaran si Kenaylyo a panirsirngen da no asa lipenpenan a itaysang do Itadi.

² Tana beken a tao do Yotay ori am manoyong o nakenakem na ji Ama ta do to a ka nira asa ka vahay. Rako o sidongan na so ji makahakaw a tao do Yotay a kasangib na meynozi ji Ama ta do to.

³ Ipisa do makoyab do ikatlo no toki am nimapacita jya o asa ka tinsi ni Ama ta do to. Maniring am, “Mo Kenaylyo.”

⁴ To na nita o tinsi, ta ikamogaw na. Maniring am, “Mo Panirsirngen, ikongo mo ipanci ang.” Maniring o tinsi am, “Na imo manakem ni Ama do to, ta nimamizing na o inozi mo. Na katenngan o mo panidongan so ji makahakaw a tao.

⁵ Am ori o ipanovoy mo so tao a mangay do Yepey a manci no meyngaran so Simong Pite a mai.

⁶ Yamyan do vahay ni Simong a mapakapkapya so nihab da kolit no baka. Yamasngen do pasalan o vahay da.”

⁷ Karwan na rana no tinsi am ipanci ni Kenaylyo o rarwa ka lamlamsoy na mai a kano asa ka itaysang do Itadi a manoyong so nakenakem ji Ama ta do to,

⁸ kapanci na nya jira so ciring no tinsi a katovoy na sira mangay do Yepey.

⁹ Mararaw do ikadwa na araw am masngen rana sira do Yepey o nitovoy ni Kenaylyo. Si Pite rana am meynozi do atep no vahay da.

¹⁰ Makcin rana am naknakmen na o kakan na. Manotong pa sira am to ngyan so nipacita na jya ni Ama ta do to do akmey tateynep na.

¹¹ So nipakacita na so hanit a meywang a kakasan no akmey tontonen da milakayob do teyrahem.

¹² Do avak na am amyan so meycyamadadayan a omalalam a kano volay a kano meyyasasalap.

¹³ Amyan so meyzezyak a manci nya. Maniring am, “Mo Pite, peytatanek rana kapanzakat mo so yakan mo.”

¹⁴ Am maniring si Pite am, “Mo Panirsirngen, taosya, ta ji ko pa nikoman so sang, ta oya am ji namen ngangana a tao do Yotay.”

¹⁵ Maniring pa jya am, “O ipanci ni Ama ta do to apya kanen am ji mo mancyan a ji ngangana an.”

¹⁶ So nikeypitlo na makamizing sya makacita sya a kahap na rana sya ni Ama ta do to do teyngato.

¹⁷ Naknakmen na ni Pite do onowned na o peypeypangayan no nimacita na am to sira makaranes o nitovoy na ni Kenaylyo a tao do vahay ni Simong.

¹⁸ Maniring sira am, “Yamyan so asa ka tao a meyngaran so Simong Pite a yamisan do jya?”

¹⁹ Naknakmen na pa ni Pite o peypeypangayan no nimacita na ori am maniring jya o Seyzi am, “Yamyan so yatatlo a ka tao a yakomala jimo.

²⁰ Meyhekas ka kapacihza mo jira. Ji mo a ratan, ta yaken o nitomovoy sira do jya.”

²¹ Am ori o nipeyhekas na ni Pite. Maniring jira am, “Yaken o nyo kalahen ang. Ikongo nyo ipanci.”

²² Maniring sira am, “Na nitovoy yamen ni Kenaylyo a panirsirngen da no asa lipenpenan a itaysang do Itadi. Iya rana am na iraralay si Ama ta do to. Da ikanig no tao do Yotay, ta tey yapya o nakenakem na so tao. Nipaziman na rana jya no asa ka tinsi o kai mo do vahay na. Ta amizngen na o inanao mo sya.”

²³ Am ori o nipasdepan na sira ni Pite a kapeysan na sira. Ikadwa na araw am macihza jira si Pite a kano tatasa akma ney kakteh do cinai a meyili do Yepey.

²⁴ Ikatlo na araw am makaranes rana sira do Kaysadiya. Am amyan rana do dang si Kenaylyo a kano zipozipos na kano kagakagagan na amnanala sya.

²⁵ Somdep si Pite am mangay si Kenaylyo do tangain na kapeylilitod na amraralay nya.

²⁶ Maniring si Pite jya am, “Peytatanek rana. Ji ka akman sang, ta meyyangay ta tao.”

²⁷ So nipeysirisiring da somdep do vahay ni Kenaylyo. Meyratatang am macita na ni Pite o aro a tao a meylovolovot do sahad na.

²⁸ Maniring jira am, “Nyo katenngan an, ta do iwawalam namen a tao do Yotay am ji namen a mya o kangay namen a komawalam jinyo a beken a tao do Yotay. Am kanimanci na nya jyaken ni Ama ta do to no kakyab. Ta maniring am, ‘Ji mo a ratan sira o beken a tao do Yotay. Ta ji meycyapyapinpinan o nyamamaog ko a tao do karawan.’

²⁹ Am ori o ko na ji raci so ko kapacikaop jinyo do jya. Am ikongo nyo pancyan nyaken a mai do jya.”

³⁰ Maniring si Kenaylyo am, “Yakapat araw rana o hanga na no nipeynozi ko do vahay namen do ikatlo no toki do makoyab am to ngyan so asa ka tao a maniray so ayob a meytatanek do tangain ko.

³¹ Maniring am, ‘Mo Kenaylyo, na nimamizing ni Ama ta do to o inozi mo. Na katenngan imo a yamanidong so tao.

³² So ipanovoy mo so tao a mangay do Yepey a manci no meyngaran si Simong Pite a mai. Iya rana am yamisan do vahay ni Simong a mapakapkapya so nihab da kolit no baka. Yamasngen do pasalan o vahay da.’

³³ Am ori o nipanovoy ko so tao a manci nimo. Ko masaray, ta ka nimai rana. Yamen rana sicyaikwaya am namen malovot do tangain ni Ama ta do to a yaomamizing so nipanci na jimo a inanao na jyamen.”

Nipangnanao na ni Pite

³⁴ Maniring si Pite am, “Ko katenngan si Ama ta do to a mapeyyangangay so tao.

³⁵ Tana tao do Yotay a tana beken a tao do Yotay am miminen na sira ikaglaw o omraralay nya a tao a mangononong do ciring na.

³⁶ Nyo katenngan rana o Mapasaray a Ciriciring na ni Ama ta do to a nipeylimwang na jyamen a Isedi a tao. Ori rana am na ipanta yaten so ikapiya no onowned ta. So ikabo na rana no oyyan na nyaten ni Ama ta do to, ta nitovoy na si Yeso Kizisto a Panirsirngen no tao do peycyamahamahatawan na.

³⁷ Nyo na katenngan an, mateyka si Yowani a omononong do kapanaktak na am papwen na rana do Cyadidi a macinapnap do Yotay o keyyan no mapeyzokab a vazay.

³⁸ Nioyatan na no Seyzi si Yeso a tao do Nasale. So nilivolivon na mangiwakwak so meykeyngeyngen a tao a mamozwaw so kalamsoyan ni Satan a komovot do tao, do kapacikaop na jya ni Ama ta do to.

³⁹ Yamen rana am yongkad na, ta nimacita namen o vazay ni Yeso do Yelosaleng a kado peycyeylilyan na do Yotay. Nipadket da do jyojika si Yeso kawakwak na.

⁴⁰ Am ikatlo na araw am nivyay na ni Ama ta do to a kapacita na nya jyamen,

⁴¹ a kapacihanghang namen jya koman no keypirwa na mavyay. Beken a mamimin o tao a nimakacita sya, ta yamen a nipamnekan ni Ama ta do to o nimakacita sya a meylimwang nya.

⁴² Nipakoyokoy na jyamen o kapeylimwang namen no kanoyong na ni Yeso a nipamnekan ni Ama ta do to a mapacici so mavyay a kano nimawakwak a tao.

⁴³ Si Yeso o pakacirngan da so ciring da no panoyonoywan na so ciring ni Ama ta do to no kakwa. Ipanci da o ka si Yeso no makavonas so raraten no omanoyong jya tao.”

Nioyatan no Seyzi o beken a tao do Yotay

⁴⁴ Mangononong si Pite am oyatan no Seyzi o omamizing so ciring na tao.

⁴⁵ Am ori o nipeyzokab da no tao do Yepey a omraralay ni Yeso a nimacihza ji Pite, ta nipanta na sira ni Ama ta do to so Seyzi o beken a tao do Yotay.

⁴⁶ Ta nimamizing da o kapeyzezyak da so macitarek a ciring a apo do Seyzi a somaray ni Ama ta do to. Maniring si Pite am,

⁴⁷ “Yana nioyatan sira no Seyzi akman jyaten. Am ori o ji ta raci sira taktakan.”

⁴⁸ So pancyan na nira ni Pite a mangozay do ngaran ni Yeso Kizisto a tomaktak jira.