Matay 7 - Seysyo No Tao

Ji manraherahet so icyatatao

¹ “Ji kamo manraherahet so icyatatao nyo, ta no si manraherahet kamo so icyatatao nyo am akman kamo sang a raheraheten da.

² Ta o ahahapan nyo so panraherahetan nyo so icyatatao nyo am akman sang o ahapan da sya no tao a amraherahet jinyo. To macilocilolo do kakdekdeng no iraherahet nyo so icyatatao nyo o raherahetan da jinyo.

³ Ikongo nyo pacivalalan do da karatan no kadwan jinyo a yanyo kaji makalavatan so nyo karatan.

⁴ Yanyo kapanci no kakteh nyo do cinai a amlis do marahet a nakenakem da am nyo jiblisi o yamarahet a nakenakem nyo.

⁵ Inyo rana mapakapyapya so nakenakem a tao am manmanma o kablis nyo so karatan nyo. Ta ori o ipakacita nyo so karatan no kadwan jinyo an.

⁶ “Ji norwan do ino o apya kanekanen, ta olin na imo a songiten. Jya to norwan do kois o vowawan, ta ingbeywan a saganeyan na.

Makowyat kamo a meynozi

⁷ “Makowyat kamo a meynozi, ta ori o ipakahap nyo so apyahen nyo no nakem. Makowyat kamo a komala si Ama ta do to, ta iya o yanan no kakzeben nyo no nakem. Makowyat kamo a tomawag ji Ama ta do to, ta iya o makasidong jinyo.

⁸ Ta o mapasyasi jya, komala sya, tomawag jya am mahap da o isidong na sira.

^9-10 Sino jinyo o manta no minapodpod jinyo so vato a kano mavowaw no macyami sira so myanpaw a kano among.

¹¹ Kakwakwan nyo a meyraraten a tao a yamakateneng do kapanta no anak nyo so pipya kanekanen a imanngo rana si Ama ta do to. Ta jyabo kaji na norwan nya jinyo no amin nyo o ikeykakza nyo a.

¹² No si kakzeben nyo o kapya da so nakem jinyo no icyatatao nyo am akman kamo sang so nakem jira. Ta ori o na agagazan no nivatvatkan ni Moyse a kano panoyonoywan na so ciring ni Ama ta do to.

Alikey a asdesdepan

¹³ “Somdep kamo do alikey a asdesdepan. Ta o asdesdepan a rarahan a meypangay do kararatan am mowvong ori a jyasalit a pangonongan. So ikaro no tao a mangonong do dang.

¹⁴ O asdesdepan a rarahan a meypangay do kavyayan no pahad am meylid ori a masalit a pangonongan. Apereh o tao a makakala so sang.

Kayo a kano asi na

¹⁵ “Azimanen nyo o malas so ipangnanao a tao. Ta akmey apiya o ipangnanao da am jyakman sang, ta tey manginanawa sira a mangalalas so ciring.

¹⁶ To nyo na tovili o iwawalam da. Jyabo kato nyo mamozasan do tazici so potaw a. O tamek am ji to meyyasi so vazacinok.

¹⁷ O pipya kayo o makapeyyasi so apya so kakanan. O mararahet a kayo am meyyasi so marahet so kakanan.

¹⁸ Ji meyyasi o pipya kayo so marahet a asi no kayo an. O marahet a kayo am ji to meyyasi so pipya asi no kayo an.

¹⁹ O ji meyyasi a kayo am to rananba kasleb sya do apoy.

²⁰ Am ori o to rana makatenngi do iwawalam da no malas so nanao a tao.

O makasdep do teyngato

²¹ “O tomawag jyaken a tao a manci no, ‘Mo Panirsirngen, mo Panirsirngen,’ am jyamimin sira macikaop do italamozong ni Ama ta do to. Ta o mahap so nanao ni Ama ta do to o macikaop jya.

²² No masngen rana o araraw no kapeykapyapinpin na so tao ni Ama ta do to am aro o tao a manci nya jyaken so, ‘Mo Panirsirngen, mo Panirsirngen, nipangozayan namen o ngaran mo asyo a meylimwang no nanao ni Ama ta do to. Nipangozayan namen o ngaran mo asyo a mamozwaw so kalamsoyan ni Satan. Aro o mapeyzokab a vazay a mina vazay namen asyo.’

²³ No si maniring ko jira am, ‘Ko jyatenngi inyo. Kazey kamo a yameyraraten a tao.’

Meytarek so ipangamaog so vahay a tao

²⁴ “O tao a omamizing so ciring ko a mapeyvazay sya am akman so mapatak a tao a mapatnek so vahay na do lalitan.

²⁵ Tana meykawan a macimoy am ji na kava ori, ta nipatnek na do lalitan.

²⁶ Am o makamizing so ciring ko a tao a ji ngahap sya am akman so jyapatapatak a tao a mangay mapatnek so vahay na do kananayan.

²⁷ No meykawan a macimoy am ji meyyahahay o vahay a makavakava.”

²⁸ Mateyka ni Yeso o ciring na am isavasavak da no makamizing so nipangnanao na.

²⁹ Ta tey rako oyowyat na no ipangnanao na, do kapacitarek na no ipangnanao na kano aro a mangnanao no iwawalam ni Ama ta do to a tao.