Matay 6 - Seysyo No Tao

Nanao so mangazaw a tao

¹ “Makapzat kamo. Ji nyo mapacitacittan o kakdekdeng nyo a manaralay do tangain no tao. Ta no si makman kamo so sang am ji nyo ngakzeba o keyyan no yazaw na jinyo ni Ama ta do to.

² No mangazaw ka am taosya o kapacita mo nya, akman so tanwasiwasi do peyneynozyan a kado rarahan a mapacita no kasidong da so tao. Ko ipanci pa jinyo am tana mahap da o kazwayan da do karawan am abo rana mahahap da a kadmayan da ji Ama ta do to.

³ Am ori an ji nyo meycicicyan do tao no mangazaw kamo. Tana ney yapya na kagagan nyo am ji nyo mancyan jya.

⁴ Ta si Ama ta do to a makacita jinyo a mapowzowzib so kapangazaw nyo am amyan so yazaw na jinyo.

Nanao so meynozi

⁵ “No meynozi kamo am ji nyo nginara o tanwasiwasi so nakenakem a makza no keyyan da do peyneynozyan a kado rararahan a meynozi a amngongyod so kapacita nya do tao. To ko na macitangayan jinyo am tana mahap da o kazwayan da do karawan am abo rana o mahahap da a kadmayan da ji Ama ta do to.

⁶ No meynozi kamo am somdep kamo do vahay a kapangneb nyo a mapasyasi ji Ama ta do to. Ta iya o makacita jinyo do sahad no vahay nyo. So amizngan na jinyo.

⁷ “No meynozi kamo am ji nyo nginara o ji manaralay a tao a omolioli so ciring da abo so peypeypangayan. Ta ipanci da o kamizing na ni Ama ta do to so anaro a ciring.

⁸ Ji nyo nginara sira, ta no ji kamo pa nimeynozi am katenngan na rana ni Ama ta do to o kalahen nyo no nakem.

⁹ No meynozi kamo am inarahen nyo ya an. ‘Mo Ama do to, inaoy no si mamimin o tao a zomwazway so meylimwang a ngaran mo.

¹⁰ Inaoy no italamozong mo o karawan. Inaoy no mai jyamen do teyrahem o apiya ahahapan mo sya do teyngato.

¹¹ O kanen namen sicyaraw eya am itoro mo jyamen.

¹² Vonasen mo o raraten namen, akman jyamen a ji mapeyyan sya do onowned so raten da jyamen no icyatatao namen.

¹³ Ji mo yamen amya kalittan. Apzatan mo yamen mo Ama do to, do kararatan do teyrahem. [Ta imo rana am ka tey mowyat a tey mazway a Tao do to a yatomalamozong nyamen a mangay do kaidan no karawan. Amin.]’

¹⁴ “No si peykabobwen nyo o raraten da jinyo no icyatatao nyo am akman sang si Ama ta do to a amvonas so raraten nyo.

¹⁵ No si ji nyo peykabobwa o raraten da jinyo no icyatatao nyo am akman sang si Ama ta do to a ji vonas so raraten nyo.

Nanao so ji mangakaday a meynozi

¹⁶ “No ji kamo mangakaday a meynozi am ji nyo nginara sira o tanwasiwasi a tao, do kakma dey mapasingat a mapacita no kaji da nimangakadayan a meynozi. To ko na macitangayan jinyo am tana mahap da o kazwayan da do karawan am abo rana o mahahap da a kadmayan da ji Ama ta do to.

¹⁷ Am inyo rana am no ji kamo mangakaday a meynozi am meysorod kamo. Meyramon kamo.

¹⁸ Taosya o kapakatovil da jinyo no tao a jya nimangakaday a meynozi, ta katenngan na inyo ni Ama ta do to. So iyan no yazaw na jinyo ni Ama ta do to.

Nanao so ji mangbeywan ji Ama ta do to

¹⁹ “Taosya o pangangagoman nyo so kangangay nyo do karawan, ta mavozsok ori, amraci ori, takawen da ori no manakaw a tao.

²⁰ Apyapya pa o kakzan nyo no kangangay nyo do teyngato. Ta abo do dang o vozsok a koman sya. Ji raci do dang. Abo dang o manakaw a tao.

²¹ Ta o yanan no peymeymasaodan nyo am pacilolwan no onowned nyo an.

Zezngang no kataotao

²² “O mata nyo am akmey zezngang no kataotao nyo an. No si apya o mata nyo am akmey mazngang o pangonongan nyo an.

²³ No si marahet rana o mata nyo am masari rana o citahen nyo. Akman sang, ta no si akmey mavota o onowned nyo am tey makasi o akman sang a tao.

Si Ama ta do to a kano peymeymasaodan

²⁴ “Abo o lamlamsoy a meyvazay do rarwa ka lawpan. No ikanig na o asa am ikaoya na o asa. No ikaoya na o asa am ikaglaw na o asa. Marahet o kapasaklang nyo ji Ama ta do to an, a tongdeng do peynizpi nyo an.”

²⁵ Maniring si Yeso do macinanao jya am, “Ko pa ciring jinyo am ji nyo a ratan o kanen nyo a kano ayob nyo. Ta maharahara pa o ipeyigegen nyo do karawan a kano kanen nyo. Meyneynakem pa o kataotao nyo a kano ayob nyo.

²⁶ To nyo nita o meyyasasalap an. Sira ji hakaw. Sira ji manlangi. Yabo da panonokozan so kankan da. Am na avyavyain sira ni Ama ta do to. Jyabo nyo kajyakdekdengan pa kano lapik a.

²⁷ Sino jinyo o to noib nya do karawan so pintek.

²⁸ “Ikongo nyo kalawan no ayob nyo. Cita kamo pala o vonitan do takey. Ta yaji meyvazay a yaji ninon so ayob na.

²⁹ Am ko pa ciring jinyo am apyapya pa o vonitan a citahen a kano mina aywayob na no meyngaran so Solomen a panirsirngen no kakwa.

³⁰ O tamek am amyan pa sicyaraw eya. Am simaraw am mahayo rana a kapasleb rana sya do apoy. Tana akman sang o tamek a ji meyyonownay do tana am yana padketan ni Ama ta do to so na ikazway a savong na. Kakwakwan na rana no tamek am imanngo kamo na. Ta jyabo kaji na mantan ninyo so ayob nyo a. Am nyo kaji makanetan so nakenakem ji Ama ta do to.

³¹ Am ori o ji nyo alawi no isovo nyo a kanen a kano yopen nyo a kano ayob nyo.

³² Ta o akman rana sang a vazay am da kalahen no yaji manaralay a tao. Na katenngan ni Ama ta do to o nyo kakzeben a makakaday.

³³ So ikapinsan na no kakza nyo no katalamozong na ninyo ni Ama ta do to a omahap so isaray na vazay. Ta ori o torwan na nya jinyo so apyahen nyo no nakem.

³⁴ Am ori o ji nyo alawi no vazay nyo simaraw. Ta mapinpin o vazay simaraw. So ji mapazavozi so ikeykalaw do kasaraw.