Matay 27 - Seysyo No Tao

Yangay da a itoro si Yeso ji Pilato

¹ Apnezak am malovot sira o panipanirsirngen no mapatanatanang so nakem da si Ama ta do to a kano kamanrarakehan da no tao do Yotay a meykaygi no kawakwak da si Yeso.

² Ahapen da si Yeso am vaoden da yangay a itoro do panirsirngen da no Loma a meyngaran so Pilato.

Mawakwak si Yota

³ Katenngan na rana si Yeso no nimanazang nya a meyngaran so Yota a wakwaken da am maneneseh rana. Karahan am mangay na paolin o atlo a poo (30) a nizpi do panipanirsirngen da no mapatanatanang so nakem da si Ama ta do to a kano kamanrarakehan da no tao do Yotay.

⁴ Maniring am, “Ko meyraraten a yatodey manazang no inawan no yabo so raraten a tao.” Maniring sira am, “Vazay mo saon am. Namen macivazay jimo.”

⁵ Karahan am iwalit na o nizpi do rako a panaralayan a kapakowbot na rana amvitkeh so kataotao na lalavicinen do kayo.

⁶ O panipanirsirngen no mapatanatanang so nakem da si Ama ta do to am peysinsinmowen da rana o nizpi. Maniring sira am, “Ngina no inawan na ya. Am ori o ji palovoci sya do kingking a itoro ji Ama ta do to, ta marahet.”

⁷ Meykaygi sira am akmey yasa sira ommya so kasazang da do nihakawan no meyteytanatana tao a mangay da bobwan no ji macikeylyan jira tao.

⁸ So na todangai sicyaikwaya no yada pancyan no nihakawan ori a “Nivoyogan no rala no tao.”

⁹ O vazay rana ya am yatodey mangononong do mina ciring no panoyonoywan na so ciring ni Ama ta do to a meyngaran so Yedimi. Ta maniring am, “Nyahap da o atlo a poo (30) a nizpi a nipamnekan da no Isedi a ipalit da so inawan no tao,

¹⁰ a nipamalit da so nihakawan no meyteytanatana tao. Ori rana am nakenakem na jyaken ori ni Ama ta do to.”

Pacicin da si Yeso do tangain ni Pilato

¹¹ Yangay da si Yeso do tangain ni Pilato. Maniring jya am, “Manngwa, panirsirngen da imo no tao do Yotay?” Maniring si Yeso am, “Noon, manoyong ori.”

¹² O iraherahet da sya no panipanirsirngen no mapatanatanang so nakem da si Ama ta do to a kano kamanrarakehan am abo nipasapa na ni Yeso.

¹³ Maniring si Pilato jya am, “Yabo cicilwan mo do da iraherahet jimo a vazay ang?”

¹⁴ Akman sang ta abo o asa ka ciring a pasapahen na ni Yeso. Ori o nisavasavakan na nya ni Pilato.

¹⁵ Mangday do Iyeci o kato na mangozayan jya no panirsirngen do pamnekan da no tao a mapasaway so asa ka nyaneban da tao.

¹⁶ No kanang am amyan so asa ka nyaneban da meyngaran so Palapa katenngan da ori no tao a tey marahet so iyangay.

¹⁷ Nimalovot o aro a tao. Maniring si Pilato jira am, “Sino nyo kakzeben a pasawain ko. Si Palapa o pasawain ko an? No si Yeso a ipanci da Misayya o pasawain ko.”

¹⁸ Katenngan ni Pilato o nyahapan da si Yeso a itoro jya do keynanahet da nya.

¹⁹ Pacicin ni Pilato am manovoy o mavakes na so tao a mangay manci nya jya so kaji na manaptan do abo so kararatan a tao, ta tey manganyahey o tatateynep na.

²⁰ Am kapasozisozi da so aro a tao no panipanirsirngen no mapatanatanang so nakem da si Ama ta do to a kano kamanrarakehan a manci ni Pilato a mapasaway si Palapa a kawakwak da si Yeso.

²¹ Maniring si Pilato jira am, “Sira rana o yararwa eya am sino jira ya o apyapyahen nyo a pasawain ko.” Maniring sira am, “Si Palapa.”

²² Maniring jira si Pilato am, “Kongwen ko so wanjin si Yeso a da ipanci no tao a Misayya.”

²³ Maniring sira o aro a tao am, “Padketen do jyojika.” Maniring si Pilato am, “Ikongo na mina vazay a marahet.” Meyratateng am ikeykavevek da amlololos no aro a tao a manci no kapadket sya do jyojika.

²⁴ Ileylamdamen na sira ni Pilato am katenngan na rana o kabo na rana no pasapahen na jira ciring, ta ikanyahey na kapeyzavozavoz da no aro a tao. Meyratateng am mangap so ranom a pangain na do tangain no aro a tao a kapavanaw na. Maniring am, “No si mawakwak ya am cyaha, ta beken a raraten ko, ta monganay jinyo.”

²⁵ Karahan am akma sirey asa o tao a manci no, “No si mawakwak o tao ori am cyaha, ta monganay jyamen a kano sivosivovoong namen o mapeyraraten sya.”

²⁶ Meyratateng am pasawain na ni Pilato si Palapa a kapanci na rana no tao a somipsipzot ji Yeso a katoro na rana nya jira a padketen do jyojika.

Peyyaliliman da no itaysang si Yeso

²⁷ O imong ni Pilato a itaysang no Loma am yangay da na si Yeso do pantaw no vahay ni Pilato a limoten.

²⁸ Meyratateng am opsowen da o ayob ni Yeso a kapayob da jya so akmey ayob no panirsirngen,

²⁹ kapamalikawag da so tazici a pasakopen da jya a kapakemkem da sya do wanan na so vazit a kapeylilitod da do tangain na meykeykaming nya. Maniring sira am, “Makapintek a Panirsirngen da no tao do Yotay,”

³⁰ a kacicipa da jya a sipsipzotan no vazit so oo.

³¹ Teyka da peyyaliliman am opsowen da o nipeyyayob da sya akmey ayob no panirsirngen a kapayob da rana so meyngongyod a ayob na a kangay da rana mapadket sya do jyojika.

Padketen da si Yeso do jyojika

³² Makowbot sira am makasinmo sira so tao do Cidinay a meyngaran so Simong. Karahan am gacigatan da somabway no jyojika ni Yeso,

³³ a kangay da nya do meyngaran so Keketa. O peypeypangayan na am Yanga no oo no tao.

³⁴ Meyratateng am mangap sira so nipazavozan da so kosozi a makopad a ranom a ipeyyop da si Yeso. Am mina kataham na jya a ji na niyop.

³⁵ Padketen da rana si Yeso do jyojika am macipangoyongoyot sira amvonong so mina ayob na.

³⁶ Karahan am amlisna sira do dang a omzat jya.

³⁷ Amyan so nivatvatkan da do kayo a nipayoray da do jyojika a raraten na. O nivatvatkan da ciring am, “Iya ya am Panirsirngen da no tao do Yotay,”

³⁸ a kapazasing da so rarwa nimanakaw a tao do wanan na kado ozi na a padketen do jyojika.

³⁹ O meyhatay jya tao am to da ligaligana o oo da mapasnesnek si Yeso.

⁴⁰ “Ipanci mo asyo o kakava mo so rako a panaralayan a kapakatlo na araw no ipatnek mo sya. No ka manoyong a Anak ni Ama ta do to am avyay pala o kataotao mo. Peyhekas pala do jyojika.”

⁴¹ O panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to a kano kamanrarakehan am akman sang sira meykeykaming nya. Maniring sira am,

⁴² “Na mavyay o karwan no tao a na jyatenngi o kataotao na na avyain. No manoyong a Panirsirngen no Isedi am na ji meyhekasi do jyojika. Ta ori o anoyngan ta jya.

⁴³ Na ipeyhanhan si Ama ta do to. Na ipanci o kataotao na Anak no Tao do to. No komwan am citahen ta pala. Manngwa, ala avyain na ni Ama ta do to an?”

⁴⁴ Akman sang sira o yamacitazing jya do jyojika nimanakaw a tao a mapeyleylak sya.

No kawakwak ni Yeso

⁴⁵ Meyigen o araw am mina todakedep o teyrahem so atlo a ka vatvatek.

⁴⁶ Ikatlo na ka vatvatek do makoyab am amlololos si Yeso. Maniring am, “Idi, Idi, lama sapahetani.” O peypeypangayan na am, “Mo Ama do to, mo Ama do to, mo peymakarwan jyaken.”

⁴⁷ Maniring sira o makamizing sya tao am, “Na tawagan si Idiya.”

⁴⁸ Amyan so asa ka tao a mina to malalayo a mangay mangap so akmey tapaik a katahem na sya do makopad a ranom a kapalibed na sya do anaro a avyao a itoro ji Yeso a ipeyyop na sya.

⁴⁹ Maniring sira o karwan no tao am, “Nanalahen ta pala. Ala mai si Idiya mahap sya ang.”

⁵⁰ Ipirwa na kalolos ni Yeso am mazavat o inawan na.

⁵¹ No kanang am o bengbeng no rako a panaralayan a milakayob am mina todapising a kapeykanini na kapeykezi no pongow.

⁵² So mina to na iwangi no heseb da a mina todavyai rana no amraralay ni Ama ta do to a tao.

⁵³ Mirwa mavyay si Yeso am karwan da o heseb da a mangay rana do Yelosaleng. So ikaro no tao a nimakacita sira ang.

⁵⁴ Macita na no panirsirngen no itaysang no Loma kano kararay na nimamzat ji Yeso o nimeykanini a kano makakaday a vazay am manyahey sira. Maniring sira am, “Yamanoyong ya Anak no Tao do to.”

⁵⁵ Amyan dang so aro a mavakes a makacita sya a macyatovang jya. Sira rana am apo sira do Cyadidi a nimacihza ji Yeso a mapeyveyveken sya.

⁵⁶ O amyan do dang am Matelyan Madiya kano asa ka Madiya a ina da Yake a kani Yoseyvo a kano mavakes ni Sipitay.

Nipakakasa da si Yeso

⁵⁷ Maseyrem rana am amyan so meynakem a tao a nimapo do Adimatay a meyngaran so Yoseyvo. Iya rana am nimacinanao ori ji Yeso.

⁵⁸ So nyangay na ji Pilato a manci no kakas na so kataotao ni Yeso. Karahan am manovoy si Pilato so lamlamsoy na a manci no kapya na mangay da hapen no kataotao ni Yeso,

⁵⁹ a kahap na rana sya ni Yoseyvo a kapongos na jya no malavang a milakayob,

⁶⁰ a mey pakakasahen do nidokdokan da rako a mao a akmey azcip. Ori rana am vayo pa ori a nidokdokan na, a kalolog na so rako a vato a pazevngen na do ngoso na a kangay na rana.

⁶¹ Si Matelyan Madiya kano asa ka tao a meyngaran si Madiya am amhezsad sira do katovangan no ngoso no heseb ni Yeso.

⁶² Ikadwa na araw am araraw no ipeywalam no tao do Yotay. O panipanirsirngen no mapatanatanang so nakem da si Ama ta do to a kano tao a macyagom do Vadisay am mangay sira ji Pilato.

⁶³ Maniring sira am, “Mo maran, namen pa manakem o ciring no yamangalalas a tao no kavyay na pa manci no, ‘Ikatlo na araw am mavyay ko pa.’

⁶⁴ Am ori o pancyan mo no tao a makapzat do heseb na so katlo araw a kaji da makatakawan so kataotao na no macinanao jya, ta todey mancyan do tao o kanimirwa na mavyay. Ta manginanawa o ciring da a malalas pa kano ciring na no kakwa.”

⁶⁵ Maniring jira si Pilato am, “Palolo kamo so mamzamzat a itaysang kapakapya nyo a mamzat do heseb na.”

⁶⁶ Karahan am pangayan da so itovil da jya do vato a somengseng do ngoso no heseb na a kato da rana vezedan do dang no itaysang a mamzat do heseb na.