Matay 24 - Seysyo No Tao

Pazimanen na o kabalinas no rako a panaralayan

¹ Makowbot si Yeso a apo do rako a panaralayan am mangay sira o macinanao jya do tangain na kapanci da no katey yapya no kamamaogan na no rako a panaralayan.

² Maniring si Yeso jira am, “O nyo macita panaralayan eya am to ko na macitangayan jinyo am mamimin o vato a da nyamaog sya mazdazday a kabwata na rana no asa ka veysen a mavezed do dang.”

Omanam a alalaw

³ Amyan si Yeso do tokon a meyngaran so Kanlan am mangay sira o macinanao jya a mapacici sya. Maniring sira am, “Ipanci mo pala jyamen o araraw no ipakaranes no nang. Akman so wanjin no mai ka. Akman so wanjin o pangavosan no karawan.”

⁴ Maniring si Yeso am, “Makapzat kamo an. Ji kamo a litai an.

⁵ Ta aro o tao a amvood so ngaran ko a manci no, ‘Yaken am si Kizisto ko,’ a ilita da do aro a tao.

⁶ Makamizing kamo na do katangked no ili nyo so meyyarap a kapakamizing nyo do marai a ili so meyyarap. No si manoyong o kakman na so sang am ji kamo anyahey, ta kangay na no akman sang a vazay. Am beken a pangavosan na ori no karawan.

⁷ Meyyarap sira o meytarek so iteytetngehan a kapeyyarap da no teyhesa ka mahataw. So iyan na no rako a kanini a kano abcil do karawan.

⁸ Am ori rana am papwan na rana so kapakaranes na rana no alalaw.

⁹ “No marateng ori am rakpen da inyo a pakakasin a kawakwak da jinyo. So pacioyyan da jinyo a mahap so vazay ko.

¹⁰ Aro o tao a ji rana manaralay. O karwan da am masipatwatolin do kapanaralay da kaji da manaralayan. So ipeykaokaoya da rana omalalas so kadwan jira.

¹¹ Meyparo sira o malas so ipangnanao a tao a mapeycyakawad so onowned no tao.

¹² Ikongo do to meyzangkap o meyraraten a tao, am ori o ikabo na rana no pangangarilawan no tao.

¹³ Am o to ngotokot a jyahayo so nakem a omraralay nyaken am mahap da o to meyyonong a ikavyay no pahad da.

¹⁴ O Mapasaray a Ciriciring a omaing do italamozong na ni Ama ta do to am manmanma a meylimwang do karawan a peyyamyamizngan da no tao do peycyamahamahatawan na a kapakaranes na rana no pangavosan no karawan.

Tey manganyahey a alalaw

¹⁵ “Macita nyo no makwa o nipanci ni Taniar a mapaoya a somazovaz si Ama ta do to a mangay da patneken do ji nyo mamyapyan a tankan na. (No vilangan nyo o ciring eya am to nyo na naknakma o peypeypangayan na.)

¹⁶ O meyvahay do Yotay am mangay sira do takey a somazok.

¹⁷ So ji da ranandepi no tao do vahay da a mangap so apzapzatan da.

¹⁸ O amyan do nihakawan da am ji rana ngoli sira mangap so ayob da.

¹⁹ Do araraw no nang am to sira makasi o mamlis so kanen a kano mangahanas a mavakes.

²⁰ Mapasyasi kamo ji Ama ta do to a kaji na mapasarawan sya do ahemyan a kado ipeywalam no tao.

²¹ Ta o alalaw rana ori am ney makdeng na pa ori a alalaw do na cinamaog no karawan. No makwa am ji rana meytotoro o akman so sang a vazay.

²² No ji na pazikenkeni ni Ama ta do to o araraw no alalaw no tao ori am abo o tao a mavyay. Am na kapakanakem so na nipamnekan a tao a yamraralay nya. Am ori o na pazikenkenan do araraw no ipakaranes no alalaw ang.

²³ “No amyan so tao a manci nya jinyo so, ‘Oya si Kizisto do jya,’ ‘Ori do kwang si Kizisto,’ am ji nyo nganoyngi.

²⁴ Ta amyan so tao no makwa a manci no ka si Kizisto da tao a kano malas so ipangnanao a tao. Sira rana am meyvazay sira so mapangyangyalak a vazay a ipeycyakawad da so tao. So icyakman da so sang a mapeycyakawad so nipamnekan na ni Ama ta do to a yamraralay nya tao.

²⁵ No makwa am manakem nyo o ko rana nipaziman jinyo a ciring eya.

²⁶ “No amyan so tao a manci nya jinyo so, ‘Yamyan si Kizisto do kabwan no nihakawan no tao,’ am ji kamo angay. No amyan so manci no, ‘Yamyan si Kizisto do sahad no vahay,’ am ji nyo to nganoyngi.

²⁷ Ta no mai o Nipamnekan na ni Ama ta do to a tao am abo ji makacita sya tao akmey meycicilat a maniray.

²⁸ O yanan no nimawakwak a omalalam am ori o pacilolwan da no meyyasasalap.

No meygegcin o Nipamnekan na ni Ama ta do to a tao

²⁹ “No si mavitos rana o aro a alalaw do teyrahem am to rana kedep o araw. Ji rana manikap o vehan. Makas rana o mata no hanit. Mablis rana o masamasaod no hanit.

³⁰ No si marateng ori am meytotwaw rana o tovil no Nipamnekan na ni Ama ta do to a tao a meygegcin do karawan. Amzikzik rana sira manyahey o aro a tao do karawan. Ta macita da rana yaken a Nipamnekan na ni Ama ta do to a tao a meygegcin do cinalab no rako a oyowyat ko a kano azwazway ko.

³¹ Manovoy ko so aro a tinsi a meyzapa a ipatao ko so tao do peycyavanovanwan na a mapeylovolovot so nipanop ni Ama ta do to a tao do teyhesa ka mahataw.

³² “To nyo na nita o ovako a kayo. No to naod rana do yangayangaw na o tomyok am to nyo na tenngi o ka teyteyka na rana.

³³ Akman sang, ta no macita nyo o makakaday a alalaw do teyrahem am to nyo na tenngi o kakeykai ko na mai.

³⁴ Naknakmen nyo an. Amyan so tao sicyaikwaya a makapis pa so vazay ang.

³⁵ Mabalinas o hanit a kano teyrahem. Am jyablis o ciring ko a mangay do kaidan no karawan.

³⁶ “Abo o tao a makateneng do araraw no yai ko. Tana tinsi do teyngato a tana Anak na ni Ama ta do to am ji da tenngi. Ta si Ama ta do to o makateneng jya.

³⁷ No meygegcin o Nipamnekan na ni Ama ta do to a tao am akman so cinasasaodan da da Noya no kakwa.

³⁸ No kaji na pa meykehnepan am to sirangned so ninyakan a mapazagzagpit, mangay do araraw no isdep da rana da Noya do avang da.

³⁹ Ji da azyaziman o kapakaranes rana no henep. Am ori o nikabalinas da rana. Akman sang o araraw no yai ko a Nipamnekan na ni Ama ta do to a jyaziman.

⁴⁰ Si marateng ori am o rarwa ka mahakay a amyan do nihakawan da am asa jira o ahapen ko. Asa o vezeden ko do dang.

⁴¹ O rarwa ka mavakes a manworod so kanen da am asa o ahapen ko. Asa o vezeden ko.

⁴² Am ori o ipeytataziman nyo, ta ji nyo a tenngi o araraw no yai ko a Panirsirngen nyo.

⁴³ Naknakmen nyo o yameykasayan. Ta no katenngan no mapeyvahay sya o araraw no yai na no manakaw a tao am jyabo kaji na nazimanan jya kaji na makasdepan no manakaw a tao.

⁴⁴ Am ori o ipeytataziman nyo an. Ta no ji nyo aktoktwan am makaranes ko rana a Nipamnekan na ni Ama ta do to a tao.

Ipeyhanhan a kano ji meyhanhanan a lamlamsoy

⁴⁵ “Sino ipeyhanhan a tey mapatak a lamlamsoy. Iya rana am ipeyhanhan no lawpan a omaponged no vahay na do kapeyyangangay na so isovo da kanen no karwan no lamlamsoy na.

⁴⁶ No mai o lawpan a kapakacita na so lamlamsoy na a makapeyvazay so vazay na am manoyong ori o ipanlanlag na.

⁴⁷ To ko na macitangayan jinyo am manoyong rana o akman so sang a lamlamsoy a pahanhanen no lawpan a tomalamozong no peymeymasaodan na.

⁴⁸ Am no maniring o onowned no lamlamsoy na am, ‘Cyaha, ta yapa mahay o lawpan ko a yamai.

⁴⁹ So sipsipzotan ko do aro a lamlamsoy na a kapaciyoyop ko so saki,’

⁵⁰ am ji na aktoktwan am to rana makaranes o lawpan.

⁵¹ Jyabo kaji na bakbakan do dang a pazanoden do yatanwasiwasi a tao a yamlavi a mapeygazicigit so ngepen a maneneseh.