Matay 22 - Seysyo No Tao

Pehngehngain na o ciring na do mamaring so kanen a nimatarek so vahay

¹ Amyan pa so pehngehngain na ni Yeso a asa ka ciring na. Maniring am,

² “O italamozong na ni Ama ta do to am akman so asa ka panirsirngen a mamaring so kanen do katarek na rana so vahay no anak na.

³ So nipanovoy na so lamlamsoy na mangay a mapeykatokatoyo rana so nitaidan na tao a mai rana koman. Am ji sira key.

⁴ Ji makamyamya am manovoy pa so lamlamsoy na mangay a tomirara pa sira do kanimapeypanam na rana so kanekanen do kateyka da rana nimariparing so nyahap da vinyay da. Am ori o pabezbezan na sira mai.

⁵ Am to da nazibwan no nitaidan na tao, do kasanga da no vazay da. O asa am nimangay do nihakawan na. O asa am nimangay a tomita so pananazangan na.

⁶ O karwan da nitaidan na am rakpen da sira o lamlamsoy no panirsirngen a kapakakasi da sira wakwaken.

⁷ Mamizing no panirsirngen am nimakapya meyoyaoya. Am ori o nipanovoy na so itaysang a mangay a omwakwak so nimwakwak so lamlamsoy na tao a kasleb da so ili da.

⁸ Meyratateng am maniring do lamlamsoy na am, ‘Ko rana nipeypanam o kanekanen am sira rana o yaney manma ko nipanoyon a tao am abo nakenakem ko rana sira a mangay a koman.

⁹ Inyo rana am mangay kamo sicyaikwaya do rako a rarahan a o masazisazi nyo na a aro a tao o rarahen nyo.’

¹⁰ Meyratateng am mangay rana o lamlamsoy na do rako a rarahan a kacirara da so masazi da tao. Tana apya so nakenakem a tana marahet so nakenakem a tao am miminen da sira ipanci a mai a karo da no tao a nimai a koman.

¹¹ “Makowbot o panirsirngen a amrapong so nitaidan na tao am macita na o jya nimanglit a tao.

¹² Maniring jya am, ‘Mo kahakay, mo na ji nimanglici a mai.’ Am ji meyzezyak o tao ang.

¹³ Maniring rana o panirsirngen do lamlamsoy na am, ‘To nyo na vaoda o lima na kano ai na kapowbot nyo sya do pantaw a kasarisaryan a kalavi na meygazicigit so ngepen a maneneseh.’ ”

¹⁴ Maniring rana si Yeso am, “Aro tao a rarahen a macikaop do italamozong ni Ama ta do to am tatasa ka tao o omonot jya.”

Tomoro ji Kaysa so deyking

¹⁵ Makowbot o tao a macyagom do Vadisay am maniring sira do kadwan jira am, “Makongo tamo a meykala do ciring ni Yeso so karatan na.”

¹⁶ Meyratateng am mapahanhan sira so macinanao jira tao a macihza do macikagom ji Helote a tao a mangay ji Yeso. Maniring sira jya am, “Mo Mangnanao, namen katenngan imo a yaji mangalalas a tao. Ka ji mapeypilipili so tao no jyangowa Ciriciring na ni Ama ta do to.

¹⁷ Pancyan pala jyamen o mo ahahapan sya. Manngwa, apya do iwawalam ta o katoro so deyking ji Kaysa panirsirngen no Loma an?”

¹⁸ To na rana tenngi ni Yeso o keyleylamdam da sya. Am ori o nipancyan na no, “Inyo rana yatanwasiwasi a tao am ikongo nyo ileylamdaman jyaken.

¹⁹ Inney kamo pala so nizpi, ta citahen ko.” Karahan am ipanta da so asa ka nizpi.

²⁰ Maniring jira si Yeso am, “Sino o ngaran a kano asyasing a yadomket do nizpi ya.”

²¹ Maniring sira am, “Si Kaysa.” Maniring si Yeso jira am, “No komwan am o monganay ji Kaysa am itoro ji Kaysa. O monganay ji Ama ta do to am itoro ji Ama ta do to.”

²² Mamizing da o ciring na am isavasavak da a kangay da rana.

Nanao ni Yeso a omagaz do keypirwa a mavyay no nimawakwak rana tao

²³ Araw no nang am o ji nganoyong do keypirwa mavyay no tao a macyagom do Satokay am mangay sira ji Yeso. Maniring sira jya am,

²⁴ “Mo Mangnanao, o nanao ni Moyse am no mawakwak o tao a kabo no anak na am pasakain no kakteh na o mavakes na a keyyan no komownongan no kakteh na rakeh do karawan.

²⁵ No kakwa am amyan so papito a meyketeketeh. Mapapapen o rakeh jira am mawakwak am abo o mataid na do karawan.

²⁶ Karahan am papenen no tomonton jira. Mawakwak ori am akman sang a abo so taodtod. O ikatatlo da meyketeketeh am akman sang, a kato da twatontonan a meyketeketeh a mahap so mina kahanghangan no mina rakeh jira. Am mamimin sira abo so taid do karawan.

²⁷ Mownay am mawakwak rana o mavakes ang.

²⁸ Manngwa, no marateng o araraw no ikeypirwa mavyay no tao am sino jira ang o manoyong a mapeykahanghangan so sang, do kanimamimin da nimapasakay sya.”

²⁹ Maniring si Yeso jira am, “Yamalas nyo ahapan sya. Ta nyo jyatenngi o Seysyo. Nyo jyatenngi o oyowyat ni Ama ta do to.

³⁰ No marateng o araraw no ikeypirwa mavyay no tao am meyyangay rana sira kano tinsi do teyngato a ji macivahavahay.

³¹ O vazay rana omagaz do keypirwa mavyay no tao am manngwa, ji nyo pa nivilangan o Ciriciring na ni Ama ta do to?

³² O ciring na ni Ama ta do to am, ‘Yaken rana am Tao do to ko ni Apolahan a kani Isa kani Yakebo.’ O peypeypangayan no nang am Tao do to da si Ama ta do to no mavyay a tao a omanoyong jya. Ta o tao rana do tangain ni Ama ta do to am mamimin a mavyay sira.”

³³ Mamizing da no tao o nanao na ni Yeso am isavasavak da.

Ney makdeng na nanao

³⁴ Mamizing da no tao a macyagom do Vadisay si Yeso a ji da tenngi a pasapan so ciring no macyagom do Satokay am malovot sira.

³⁵ Amyan jira so asa ka mangnanao no iwawalam ni Ama ta do to a amnakenakem so keyleylamdam na si Yeso no asa ka ciring.

³⁶ Maniring ji Yeso am, “Mo Mangnanao, ikongo do iwawalam ni Moyse o ney makdeng na nanao.”

³⁷ Maniring si Yeso am, “ ‘Onowned mo a kano pahad mo a kano nakenakem mo am to mo peykasa a omraralay ni Ama ta do to a Tao do to mo.’

³⁸ Ta ori rana am ney makdeng na nanao.

³⁹ O ikadwa na am akman sang so kakdekdeng an. ‘Ikarilaw mo o icyatatao mo. To mo peyyangaya kano aryarilaw mo so kataotao mo o karilawan mo no icyatatao mo.’

⁴⁰ Yatodamimin o iwawalam ni Moyse a kano nanao no panoyonoywan na so ciring ni Ama ta do to a yamangozay do yameykadwa a nanao ang.”

Sivovoong na ni Tawey o Misayya

⁴¹ Malovot sira o tao a macyagom do Vadisay am pacicin na sira ni Yeso.

⁴² “Ikongo o nakenakem nyo do Misayya. Sino yamapeysivovoong sya.” Maniring sira am, “Iya rana am sivovoong ni Tawey.”

⁴³ Maniring si Yeso am, “No manoyong ori am ikongo nioyatan na ji Tawey no Seyzi a manci no, ‘Mo Panirsirngen.’ Ta maniring si Tawey am,

⁴⁴ ‘Maniring si Ama ta do to do Panirsirngen ko am: Amlisna ka do wanan ko mangay si balinasen ko sira o macioya jimo a tao.’

⁴⁵ No ipanci ni Tawey a Panirsirngen am ikongo o peysivovoongan na so Misayya ni Tawey.”

⁴⁶ Abo o asa ka tao a makateneng do ciring ni Yeso a pasapan. Nimacipinda no kanang o kaji da rana makadketan ji Yeso a pacicin.