Matay 21 - Seysyo No Tao

No kazway na mangay do Yelosaleng

¹ Masngen rana sira do Yelosaleng am mangay sira do Peyvake a ili do asa ka tokon a meyngaran so Kanlan. Nimanovoy si Yeso so rarwa ka macinanao jya manma mangay do ili.

² Maniring jira am, “Angay kamo do ili eyto. Si makacita kamo so meyina baka makedked do dang am ovain nyo sira yai do jya.

³ No si amyan so macisirsiring jinyo am ipanci nyo o, ‘Yamyan so na patakan nya no Panirsirngen.’ No si mamizing na o ciring nyo am cyaha, ta itoro na jinyo.”

⁴ O icyakman na so sang am yatodey mangononong o ciring no panoyonoywan na so ciring ni Ama ta do to. Ta maniring am,

⁵ “Si maniring kamo do tao do Yelosaleng am, Cita kamo o Panirsirngen nyo a mai. Iya rana am na ji pakaranga o kataotao na a omavang do anak no baka.”

⁶ So to da mangozai do ciring ni Yeso no rarwa ka macinanao jya.

⁷ So nyalakan da so meyina baka yai a kaparasay da so ayob da do likod no baka a kapanci da rana ni Yeso a omapon do baka.

⁸ Aro tao a tomeytay so ayob da do rarahan. O karwan da am mangap sira so yangaw no nitba da kayo a teytain da do rarahan.

⁹ O omanop sya aro a tao am amlololos rana sira a manci no, “Inaoy si omaing o admadmay do sivovoong ni Tawey! Inaoy si ipanlanlag na ni Ama ta do to o nitovoy na a yarana nimai do teyrahem! Inaoy si mangay ji Ama ta do to o azwazway na!”

¹⁰ Mangay si Yeso do Yelosaleng am mina todagnoz o tao do ili ang. Maniring rana sira o tao am, “Sino o tao ang.”

¹¹ Maniring sira o aro a tao a macihza ji Yeso am, “Iya rana am yapo do Cyadidi a yameyvahay do Nasale a panoyonoywan na so ciring ni Ama ta do to a meyngaran so Yeso.”

Nipangzan na o rako a panaralayan

¹² Somdep si Yeso do rako a panaralayan am powboten na sira o tao a manazang no makakaday a warawara do dang a kapasakeb na sya ibokbok so peypalipalitan da so nizpi a kavangan a kano lilisnan da no manazang no hato a tao.

¹³ Maniring jira am, “O domket do Seysyo a ciring na ni Ama ta do to am, ‘O raralayan nyo nyaken a vahay am peyneynozyan ori no aro a tao.’ Am nyo to peyvaliw a da peyvahayan no manakaw a tao.”

¹⁴ Amyan so mavota kano makasapa tao a nimangay do tangain ni Yeso. Ori o niwakwakan na jira.

¹⁵ Macita da si Yeso no panipanirsirngen no mapatanatanang so nakem da si Ama ta do to a kano mangnanao no iwawalam ni Ama ta do to a nimapeyvazay so aro a mapeyzokab a vazay a kapakamizing da pa so aro a kanakan a amlololos do rako a panaralayan a manci no, “Inaoy si omaing o admadmay do sivovoong ni Tawey!” Mamizing da ori am ori o nipeyoyaoya da.

¹⁶ Maniring sira ji Yeso am, “Mo mamizing sira yamlololos a yameyzezyak ang?” Maniring si Yeso am, “Noon, ko mamizing. Ta maniring do Seysyo am, ‘Ninanao mo o kanakan a kano si Kekey pa so ngaran a mapatwaw so ney yapya na yadmadmay da si Ama ta do to.’ Manngwa, ji nyo pa nivilangan o akman sang a ciring?”

¹⁷ Karahan am karwan na rana sira ni Yeso a meypangay do Potani a keysan na do dang.

Nipanircirngan na o kayo a meyngaran so ovako

¹⁸ Apnezak do ikadwa na araw am mangonong sira meysinaoli do ili. No kanang am makcin si Yeso.

¹⁹ Macita na o meyngaran so ovako a kayo amyan do siri no rarahan am mangay a meykala so asi na. Am aboo, ta voong na o macita na. Karahan am to na rana manircirngi o kayo ang. Maniring am, “To ka rana meyyonong a ji rana malasi.” Meyratateng am jya nimeyyahahay o kayo a nimaoto.

²⁰ Macita da no macinanao jya am isavasavak da. Maniring sira am, “Asyo o kayo eya yaji ngahay a yamaoto.”

²¹ Maniring si Yeso am, “To ko na macitangayan jinyo am no manoyong kamo a meyhanhan ni Ama ta do to a ji meykarwa so nakem am akman kamo sang a makapeyvazay so yako mina vazay ang. Am beken a ori an. Ta tana to nyo nirsirnga o tokon a mangay do awa am mangay ori an.

²² No makdeng kamo so nakem ji Ama ta do to am o amin nyo do inozi nyo am mahap nyo.”

Ikazyak da o nikapwan no oyowyat ni Yeso

²³ Somdep do rako a panaralayan si Yeso am mangnanao so tao do dang. O panipanirsirngen no mapatanatanang so nakem da si Ama ta do to a kano kamanrarakehan da no tao do Yotay am mai sira ji Yeso. Maniring sira am, “Asyo oyowyat mo a yamapeyvazay so aro a vazay eya. Sino o yanitomoro nya jimo so sang.”

²⁴ Maniring si Yeso jira am, “Ko inyo pacicin no asa ka ciring. No si katenngan nyo yaken a tovisan am ori o pancyan ko no na nikapwan no oyowyat ko a yamapeyvazay so aro a vazay.

²⁵ Wanjin o nikapwan no oyowyat no nimanaktak a si Yowani. Yapo ji Ama ta do to an? No yapo do tao.” Makarahan am meykalakalavaten rana sira. Maniring sira am, “Ikongo o itovis ta dang. No si ipanci ta o kapo na ji Ama ta do to am ji na panenesha yaten ni Yeso a ji nganoyong ni Yowani a.

²⁶ No si kwan ta o kapo na do tao am jyabo kaji da oyyan nyaten no aro a tao a, do da kanoyong ji Yowani a panoyonoywan na so ciring ni Ama ta do to a.”

²⁷ Karahan am maniring rana sira ji Yeso am, “Namen jyatenngi.” Maniring si Yeso jira am, “No ori vata nyo am ji ko mancyan jinyo o na nikapwan no oyowyat ko a yameyvazay so aro a vazay.”

Pehngehngain na o ciring na do rarwa ka meyketeh

²⁸ Maniring si Yeso am, “Naknakmen nyo pala o ko pehngehngain a ciring. Ikongo ahahapan nyo sya. Amyan so asa ka tao a rarwa so anak. Maniring do rakerakeh am, ‘Mangay ka, manganako, do nihakawan ta an.’

²⁹ Maniring ori am, ‘Sino mangay.’ Manakenakem am, ‘Jyabo kaji ko angayan a.’ Karahan am mangay ori.

³⁰ Akman sang o ciring no ama na do ananak. Maniring o ananak am, ‘Noon. Mangay ko,’ am jya nimangay.

³¹ Manngwa, sino jira ang o nimahap so ciring no ama da.” Maniring sira am, “O rakerakeh ang.” Maniring si Yeso am, “To ko na macitangayan jinyo am manmanma pa sira ka ninyo o mapeyvazay so deyking a tao a kano somagpyan a mavakes a macikaop do italamozong ni Ama ta do to.

³² Ta yarana nimai o nimanaktak a si Yowani. Na rana nipanci jinyo o manoyong a rarahan nyo. Am nyo ji nganoyngi. Am sira rana mapeyvazay so deyking a tao a kano somagpyan a mavakes am da nyanoyngan. Tana nimacita nyo o mapeyvazay so deyking a tao a kano somagpyan a mavakes a yarana nimamlis am kamo ji mamlis a yaji nganoyong jya.”

Pehngehngain na o ciring na do marahet so nakem a tao a nimvood so nihakawan

³³ Maniring pa si Yeso am, “Amizngey nyo pala o pehngehngayan ko so ciring ko. Amyan so asa ka tao a nimeymowa so asa lan a potaw. Karahan am zazacitan na a kapamaring na do sahad na no nihakawan na so pangangatesan na so potaw a kapatnek na so makarang a tagakal a pamozimozyan na. Karahan am itoro na do tao a vooden da a kangay na rana do marai a ili.

³⁴ Mazako o asi na no mowamowa na am manovoy so lamlamsoy na omami so akma ney vonong.

³⁵ Karahan am vitkehen da o zagaw no nitovoy na lamlamsoy no nimvood so nihakawan na tao a kapakakasi da so asa, kazakat da so asa a kacikcik da do asa.

³⁶ Karahan am manovoy pa o mapeynihakawan sya so arwaro pa lamlamsoy na a kano nimanmanma mangay ang. Am akman sang o vazay da sira no nimvood so nihakawan na.

³⁷ Manowji rana am to na rana novoya o anak na. Manakenakem am, ‘Jyabo kaji dasnekan no minapodpod jyaken a.’

³⁸ Am macita da o anak na no nimvood so nihakawan na am maniring sira do kadwan jira am, ‘Iya ya o omamoon so nihakawan na. To ta na wakwaka kamoon ta so nihakawan na.’

³⁹ Karahan am vitkehen da a yangay do asked no nihakawan da a kawakwak da sya.

⁴⁰ “No mai o meyngongyod a mapeynihakawan sya am kongwen na paro sira o nimvood so nihakawan na tao.”

⁴¹ Maniring sira am, “Jyabo o kaji na wakwakan sira a katoro na no peymowamowan na do apiya so nakenakem a tao a omvood sya.”

⁴² Maniring si Yeso jira am, “Ji nyo nivilangan pa o ciring do Seysyo? Maniring am, ‘O Vato a niwalit da no mapatnek so vahay am yarana nimeyvaliw a ney makdeng na aslet no ai no vahay. So ikanoyong no vazay ni Ama ta do to a mapeyzokab.’

⁴³ “Am ori o ko pancyan nya jinyo so kaji na rana nalamozongan ninyo ni Ama ta do to, ta italamozong na o mangononong do ciring na a tao.

⁴⁴ O meyhabak rana do Vato ori am to rana zemek o tototowang na. O kakasan no Vato a tao am akman sang, ta to meyramis o kataotao na.”

⁴⁵ Mamizing da o ciring ni Yeso no panipanirsirngen no mapatanatanang so nakem da si Ama ta do to a kano tao a macyagom do Vadisay am makazazap da rana o kapakaciring na sya jira ni Yeso so ciring ang.

⁴⁶ Am ori o naknakman da rana so karakep da sya. Am kanyahey da no aro a tao. Ta anoyngan da no aro a tao si Yeso a panoyonoywan na so ciring ni Ama ta do to.