Matay 20 - Seysyo No Tao

Panizpin a meyvazay do nihakawan a tao

¹ “O italamozong ni Ama ta do to am akman so yamalavat a yapehngehngain a ciring eya. Amyan so tao a mangay a meykala so peyvazain na tao do nihakawan na.

² Ipanci na jira o kateyhesa ka nizpi no ipanizpi na sira do kateyhesa araw. Makarahan am ipanci na rana sira mangay meyvazay.

³ Ikasyam na no vatvatek do apnezak am mangay pa meykala so tao. Karahan am to na cita sira o tatasa ka tao a abo so vazavazay.

⁴ Maniring jira am, ‘Mai kamo a meyvazay do nihakawan ko an. Cyaha, ta panizpin ko inyo.’

⁵ Karahan am mangay sira meyvazay. Meyigen o araw a kado ikatlo no vatvatek do makoyab am makakala pa so tao a meyvazay do nihakawan na.

⁶ Ikalima no vatvatek do ikakoyab na rana am nimakacita so tao a meytatanek a abo so vazay. Maniring jira am, ‘Ikongo nyo to meytatanki do jya yabo so vazay.’

⁷ Maniring sira am, ‘Yabo yamanci nyamen a yameyvazay.’ Maniring jira am, ‘No komwan am to kamo nangai a meyvazay do nihakawan ko.’

⁸ “Maseyrem rana am ipanci no mapeynihakawan sya o lamlamsoy na. Maniring am, ‘Rarahen mo sira o yanimeyvazay a tao, katoro mo nya jira so nizpi da. Papwen mo do ney manowji na nimeyvazay o torwan mo, kato mo ngatwatontonan sira do ney manmanma na nimeyvazay.’

⁹ O nimapapo so kapeyvazay da do ikalima no vatvatek am maponged sira no teyhesa ka nizpi.

¹⁰ Itoro na o nizpi da no ney manma na nimeyvazay a tao am masaray sira, ta ipanci da o kapahama na so nizpi da. Am jya nimakman sang, ta to sira meyyangangay a teyhesa ka nizpi.

¹¹ Mahap da o nizpi da am maoya sira so aktokto.

¹² Maniring rana sira do mapeynihakawan sya am, ‘Yasa ka vatvatek da nipeyvazay no yanimanownowji a ka nyamen. Am yamen am namen kasaraw a yameyzizikna no vazay mo. Am mo todey pehngaya sira jyamen so nizpi.’

¹³ Maniring rana o mapeynihakawan sya do asa ka tao jira am, ‘Mo kahakay, jyabo ko kaniomapit jinyo a. O nipamnekan ko a nizpi nyo no kapeysirsiring tamo asyo am asa ka nizpi o itoro ko jinyo.

¹⁴ So ahapan nyo so nizpi nyo an. Ta nakenakem ko o ko to peyyangangain jinyo a yanimeyvazay a tao.

¹⁵ Manngwa, abo onowned ko komakaday so angayan no nizpi ko? Nyo kazyakan nyaken a yamangazaw no nizpi ko.’ ”

¹⁶ Karahan am maniring si Yeso am, “O yamasipanownowji sicyaikwaya am masipanmanma rana sira no makwa do teyngato. O nimasipanomanoma am masipanownowji rana sira.”

Ikeypitlo na ni Yeso a mapaziman so kawakwak na

¹⁷ Mangay sira do Yelosaleng am lovoten na ni Yeso o rarwa so ikakarwan a macinanao jya. Maniring jira am,

¹⁸ “Amizngen nyo an, do tamo ipeypangay do Yelosaleng sicyaikwaya an, da kapanazang nyaken a Nipamnekan na ni Ama ta do to a tao no panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to, kapanci da no tao a omzakat jyaken,

¹⁹ a katoro da nyaken do beken a tao do Yotay. So peyyaliliman da jyaken a bakbakan a padketen do jyojika. Ikatlo na araw am mirwa ko pa a mavyay.”

Kakzeben no mavakes ni Sipitay

²⁰ O mavakes ni Sipitay a kano rarwa ka anak na mahakay am mangay sira ji Yeso a kapeylilitod no mavakes do tangain ni Yeso a mapasyasi jya.

²¹ Maniring jya si Yeso am, “Ikongo mo kakzeben.” Maniring am, “No si amyan ka do peypanirsirngen mo am to mo na mancyan o anak ko a macipeyvik do wanan mo a kado ozi mo a meypanirsirngen.”

²² Maniring si Yeso am, “Nyo jyatenngi o yanyo kakzeben. Manngwa, mahap nyo o rako a alalaw ko an?” Maniring sira am, “Noon, mahap namen.”

²³ Maniring jira si Yeso am, “Manoyong kahap nyo so alalaw ko. Am beken a yaken o mamnek do tao a omlisna do wanan ko a kado ozi ko a meypanirsirngen. Ta si Ama ta do to o mamnek do amlisna do dang.”

²⁴ Mamizing da ori no asa ngarnan a macinanao jya am ikaoya da sira o meyketeh ang.

²⁵ Karahan am lovoten na sira do tangain na ni Yeso o macinanao jya. Maniring jira am, “O panirsirngen rana do teyrahem am abo ji ngamizing sya a tao an. So pancyan da no nang a makayokod nira a tao.

²⁶ Am inyo rana am ji nyo nginara o akman sang. No si amyan jinyo so makza no kaizay na am pavevehen nyo o kataotao nyo a manidong so icyatatao nyo an.

²⁷ Si myan so tao a makza no kaizay na am inarahen na o lamlamsoy a mapeylamnay so tao.

²⁸ Akman so Nipamnekan na ni Ama ta do to a tao. Ta o na nyai am beken a ilamnain no tao. Ta mapeylamnay so aro a tao a kangay na mapasansan so kataotao na yagag na sira do peyraratenan da.”

Niwakwakan na o rarwa ka mavota tao

²⁹ Karwan da do Yedike a ili am aro tao a omonot ji Yeso.

³⁰ Amyan so rarwa ka mavota tao a omlisna do siri no rarahan. Mamizing da si Yeso a meyliktaw do dang am amlololos sira. Maniring sira am, “Imo rana macikownongan ji Tawey am ikarilaw mo pa yamen.”

³¹ Ikaoya da sira no aro a tao. Ji da mya sira meyzezyak. Am ikeykavevek da amlololos a manci no, “Mo Panirsirngen a macikownongan ji Tawey, ikarilaw mo pa yamen.”

³² Mina to neyked si Yeso a kapanci na nira mai. Maniring jira am, “Ikongo o nyo kakzeben a sidongan ko jinyo.”

³³ Maniring sira am, “Mo Panirsirngen, sidongen mo pa yamen do mata namen a kapakacita namen rana.”

³⁴ Ikarilaw na sira ni Yeso. Am ori o nipinanan na do mata da. Karahan am jya nimeyyahahay sira nimakacita a kapacihza da rana ji Yeso.