Matay 17 - Seysyo No Tao

Nimablis o keyteytawan ni Yeso

¹ Ikanem na araw am palolwen ni Yeso si Pite a kani Yake a kani Yowani a meyketeh a mangay do makarang a tokon.

² No kanang am todablis o keyteytawan ni Yeso do tangain da. So nicyakma ney araw no moing na maniray. Akman sang o talili na.

³ Makarahan am macita da no tatlo a ka macinanao jya si Moyse a kani Idiya a tao no kakwa pa, a macisirsiring ji Yeso.

⁴ Maniring si Pite ji Yeso am, “Mo Panirsirngen, yata tey yapya do jya. No si apyahen mo am to ko na mamaring do jya so atlo a ka sarwap, asa jimo a asa ji Moyse a asa ji Idiya.”

⁵ Ji na pa teyka ni Pite o ciring na am to ngyan so cinalab a ombengbeng sira a keyyan no ciring a maciralay do cinalab ang. Maniring am, “Iya rana am ney kaglaw ko Anak ko. So sarayan ko nya. Amizngan nyo sya.”

⁶ Mamizing da o ciring no macinanao jya am to rana sira meyrorokma do teyrahem a manyahey.

⁷ Karahan am mangay jira si Yeso a mapadnadna so nakem da. Maniring am, “Tanek kamo na. Ji kamo anyahey.”

⁸ Citahen da am si Yeso rana o macita da.

⁹ Omosok sira apo do tokon am maniring jira si Yeso am, “Do ji ko pa nimirwai a mavyay a Nipamnekan na ni Ama ta do to a tao am ji nyo pa meycicicyan o yanyo nimacita vazay an.”

¹⁰ Karahan am pacicin da no macinanao jya si Yeso. Maniring sira am, “Ikongo da pancyan nya no yamangnanao no iwawalam na ni Ama ta do to o kapanmanma na mai ni Idiya.”

¹¹ Maniring si Yeso am, “Si Idiya rana am manmanma mai a mapeyyalalap so nakem no meykaoya tao.

¹² Am ko ipanci pa jinyo am yarana nimai si Idiya am da jyatenngi no tao. Am ori o to da naziboi nya no tao. So ikakman na sang no Nipamnekan na ni Ama ta do to a tao a peyraraheten da.”

¹³ Ori rana o nipakateneng da rana jya no macinanao ji Yeso so pakacirngen na do nimanaktak a si Yowani.

Nivozwaw ni Yeso o komovot do kanakan a kalamsoyan ni Satan

¹⁴ Makaranes sira do aro a tao am amyan so asa ka tao a nimai a mangay meylilitod do tangain na ni Yeso.

¹⁵ Maniring am, “Mo Panirsirngen, ikarilaw mo pa o anak ko. Ta yamamezamezay. So na ipangasi a yamaleklektek do apoy a kado ranom.

¹⁶ Nyangay ko na do macinanao jimo am ji da vonas jya.”

¹⁷ Maniring si Yeso am, “Kamo tey yalikey pa so nakenakem ji Ama ta do to a tao sicyaikwaya do yanyo kapeyraraten. Akman rana so wanjin o kownownay ko a macikaop jinyo. Akman ko rana so wanjin a marilaw ninyo. Ayyan kamo o kanakan do jya.”

¹⁸ Karahan am ioya na o kalamsoyan ni Satan a kapakowbot na rana. So nikapiya na rana no anak na.

¹⁹ Karahan am pacicin da si Yeso no macinanao jya. Maniring sira am, “Ikongo namen ji makavozwawi so kalamsoyan ni Satan ang.”

²⁰ Maniring si Yeso am, “O nyo ikakman sang am yaji makanet pa o nakenakem nyo si Ama ta do to. To ko na macitangayan jinyo am tana akman kamo so alikey a vettow no nappa so kakdekdeng no nakem am tana to nyo nirsirnga o tokon a meylis do yanan na kangay na do kwang am meylis ori an. So ikabo no ji nyo a peyvazay a vazay.

²¹ [To nyo peykakasa o onowned nyo a meynozi a ji mangakaday. Ta ori o ikavozwaw no akman so sang a kalamsoyan ni Satan.”]

Ipirwa na pazimanen ni Yeso o kawakwak na

²² Malovot o macinanao ji Yeso do Cyadidi am maniring si Yeso jira am, “Itoro da o Nipamnekan na ni Ama ta do to a tao do macioya jya tao,

²³ a kawakwak da sya. Am ikatlo na araw am mirwa pa mavyay.” Mamizing da ori no macinanao jya am marahet sira so aktokto.

Tomoro so deyking do rako a panaralayan

²⁴ Makaranes si Yeso a kano macinanao jya do Cyapaynong am amyan so mangangap so deyking no rako a panaralayan a tao a mangay ji Pite. Maniring sira jya am, “Manngwa, tomoro so deyking do rako a panaralayan o Sinsi nyo an?”

²⁵ Maniring si Pite jira am, “Ta ji na noroi.” Somdep do vahay si Pite am panmahen na pacicin ni Yeso. Maniring jya am, “Mo Simong, sino o pangangapan no panirsirngen do karawan so deyking. Mangap do anak na? No mangap do karwan no tao. Manngo ka dang.”

²⁶ Maniring si Pite am, “Mangap do karwan no tao.” Maniring si Yeso jya am, “No ori o nakem mo am ji noroi saon o anak na am.

²⁷ Am taosya o kakma tey mapasobsobna. So to mo rana angai a mamasil. Si citahen mo o ngoso no ney manma na among mo am makacita ka so asa ka nizpi. Makanet rana ori a itoro ta deyking do rako a panaralayan.”