Matay 15 - Seysyo No Tao

Tey manginanawa o kownot do icicirawat no ineynapo a beken a Ciriciring na ni Ama ta do to

¹ Amyan so tao a macyagom do Vadisay a kano mangnanao no iwawalam ni Ama ta do to a nimapo do Yelosaleng a mangay ji Yeso. Maniring sira jya am,

² “Ikongo da ji ngapi so iwawalam no ineynapo ta no macinanao jimo, do da kaji mavanawan no omanam sira a koman.”

³ Maniring si Yeso am, “Ikongo nyo apyapyan pa so Ciriciring ni Ama ta do to a yataosyahen a yanyo kahap so iwawalam no ineynapo nyo.

⁴ No maniring si Ama ta do to am, ‘Ikaglaw nyo a ikanig o inyapwan nyo.’ Maniring pa am, ‘O omavay so inyapwan na am to rana wakwaka.’

⁵ Am nyo kajya pasovoyan a amya so tao a jyaglaw no inyapwan na. O ciring nyo am, ‘No myan so tao a tomoro nya do Tao do to so ipakan na so inyapwan na am apyapya o kaji na rana pakanan so inyapwan na.’

⁶ Nyo tongbowa no iwawalam nyo o Ciriciring ni Ama ta do to, do yanyo kapyapya pa so iwawalam no ineynapo nyo.

⁷ Inyo rana yatanwasiwasi am yamanoyong o ciring no panoyonoywan na so ciring ni Ama ta do to a meyngaran so Isayya a pakacirngen na jinyo. Ta maniring am,

⁸ ‘O aro a tao am da admadmain yaken no ciring da. Am onowned da am yameyparai jyaken.

⁹ Da ipanci o ciring no tao a ciring ko. So yana ikabo no peypeypangayan no da kararalay nyaken.’ ”

Manoyong a raraten do tangain ni Ama ta do to

¹⁰ Lovoten na ni Yeso o aro a tao do tangain na am maniring jira am, “Amizngen nyo a kapakateneng nyo jya.

¹¹ O apo do ngoso no tao a mangay do velek am ji mapeyraraten so tao, ta o makowbot do ngoso a apo do onowned am ori o mapeyraraten so tao.”

¹² Makarahan am maniring sira o macinanao ji Yeso am, “Da mamizing no tao a macyagom do Vadisay o ciring mo am sira ji makamyamya. Manngwa, mo katenngan an?”

¹³ Maniring si Yeso am, “O ji na nipamowa ni Ama ta do to a mowamowa am miminen ori a botboten.

¹⁴ Ji nyo ngazidan sira, ta sira rana am kapalangayan da o mavota tao a mangonong no tao. No mangalay so mavota o mavota tao am mangay o kangay da matazangeb no rarwa ang.”

¹⁵ Maniring si Pite am, “Ipanci mo pa jyamen o peypeypangayan no mo pehngehngain a ciring mo ang.”

¹⁶ Maniring si Yeso am, “Kamo pa meyyangay a kano karwan no tao a yaji makateneng jya sicyaikwaya?

¹⁷ Manngwa, nyo jyatenngi o isovo a kanen am mangay do velek a kapeywadwad rana nya?

¹⁸ Am o makowbot do ngoso am apo do onowned. Ori o mapeyraraten so tao.

¹⁹ O mapo do onowned am amyan dang so makakaday a nakenakem no tao a ipeyraraten a mangap so tao, mangzakza, manakaw, mangalalas, manamwad.

²⁰ O yamakakaday ori am manoyong ori a mapeyraraten so tao. Am o ji mavanaw a koman am ji mapeyraraten so tao o akman sang.”

Nakenakem no asa ka mavakes si Ama ta do to

²¹ Karwan na do dang ni Yeso am mangay do meyngaran so Tayar a kano Siton a ili.

²² Amyan dang so asa ka mavakes a tao do Cyanan a mangay ji Yeso. Maniring a amlololos am, “Mo Panirsirngen a sivovoong ni Tawey, ikarilaw mo pa yaken, ta na kovotan no kalamsoyan ni Satan o anak ko a mavakes. So na ikatey makasi.”

²³ Abo o asa ka ciring a nitovis na jya ni Yeso. Mai sira o macinanao jya am mapasyasi sira ji Yeso. Maniring sira am, “Tovoy rana o mavakes ang, ta yamanilo a yaomonot jyaten.”

²⁴ Maniring si Yeso do mavakes am, “O na pahanhanan jyaken ni Ama ta do to am ko sidongen o Isedi a tao a yakmey nimavozaw a kagling na.”

²⁵ Mamizing na o ciring ni Yeso am meylilitod do tangain na. Maniring am, “Mo Panirsirngen, sidongen mo pa yaken.”

²⁶ Maniring si Yeso am, “No ahapen o kanen no anak a itoro do ino am malas o akman sang.”

²⁷ Maniring o mavakes am, “Yamanoyong ori mo Panirsirngen. Am o meycyakakas do nyakanan da no mapavahay sya am kanen no ino.”

²⁸ Maniring si Yeso am, “Mo kavakes, yatey arako o nakenakem mo si Ama ta do to. So to na rana mangononongi no mo kakdain ang.” So nikapya na rana no anak na no kapanci na nya ni Yeso.

Niwakwakan na o meykeyngeyngen a tao

²⁹ Karwan na do dang ni Yeso am mangay do pamsan no rako a meybebneng a ranom a meyngaran so Cyadidi. So nyangay na do tokon a kahezsad na do dang.

³⁰ Aro tao a komala pa sya. Sira rana am nipalolo da o mapilay a kano mavota kano nimakasapa kano ji makabnebnek a kano makasazi so meycyamadadayan a ingingnen a yangay do tangain na ni Yeso. So niteyteyhesan na sira niwakwakan ni Yeso.

³¹ Macita da no aro a tao o ji makabnebnek a kano nimakasapa kano mapilay a kano mavota a to rana apya am isavasavak da. So nyazwazwayan da rana so Tao do to da no Isedi a tao.

Nibsoy na sira o kakapatan a ranaw (4000) a tao

³² Rarahen na ni Yeso sira o macinanao jya. Maniring jira am, “Ko ikabo sira no nakem o aro a tao, do da kapakatlo araw rana do jya. So nikabo rana no kanen da sicyaikwaya. Am ko ji mamyapyan sira meykakcin a omrateng do vahay da, do ko kahawa nira kalingongawan do rarahan a makcin.”

³³ Maniring sira o macinanao jya am, “Do wanjin o angayan namen a pangapan so kanen a ibsoy ta so aro a tao, do yabo panazangan do jya.”

³⁴ Maniring jira si Yeso am, “Yapira o myanpaw a yamyan jinyo.” Maniring sira am, “Yapito a ka myanpaw a kano yapeleh a lilikta among.”

³⁵ Makarahan am ipanci na rana ni Yeso o aro a tao a amlisna,

³⁶ kahap na rana so apito a ka myanpaw a kano among a isaray ji Ama ta do to a kakcikcil na rana sya patodahen do macinanao jya a kavonong da rana sya do aro a tao.

³⁷ Nimamimin sira nikoman a kabobsoy da rana. Peykakasahen da no macinanao jya o atda da am nipno da o apito a ka yala.

³⁸ O nikoman a tao am kakapatan na ranaw (4000) sira. Am ji da nipavilang sira o mavakes a kano kanakan.

³⁹ Makarahan am tovoin na rana sira o aro a tao a mangay rana, a kazagpit na rana do vazangay a meypangay do Macyatan a ili.