Matay 13 - Seysyo No Tao

Pehngehngain na o ciring na do manokos a tao

¹ Araw no nang am karwan na ni Yeso o vahay ori a kangay na do pamsan na no rako a meybebneng a ranom a omlisna do dang a mangnanao.

² Aro tao a meylovolovot do tangain na. Am ori o nizagpit na do vazangay a omlisna. O aro a tao am meytatanek sira do pamsan na.

³ Makarahan am mangononong so pehngehngayan na so aro a ciring na. Maniring am, “Amyan so asa ka tao a mangay a manokos.

⁴ Manokos ori am amyan so zomsi do rarahan. Am mangay da toktokan no meyyasasalap.

⁵ Karwan na am zomsi do kavatovatwan. Am amlida, ta amyan so aliket a tana.

⁶ No amdada o araw am mapseng, do kaji na makayamotan, ta alikey o tana.

⁷ O zomsi do katamtamkan na am tana amlida am ji malasi. Ta kaongongan no aro a tamek.

⁸ O zomsi do apya so tanatana am apiya o kalidalida na a kapakapya na rana malasi. So iyan no makapoo (100) a kano sikanem a ngarnan (60) a kano sikatlo a ngarnan (30) so kasahasahang.”

⁹ Maniring si Yeso am, “Amizngen nyo an, peyyanen nyo do onowned nyo ori an.”

¹⁰ Mai sira o macinanao ji Yeso am maniring sira jya am, “No mo nanawen sira o tao am ikongo o mo pehngehngayan so ciring mo.”

¹¹ Tovisan ni Yeso am, “O ji na nipatwaw pa a peypeypangayan na do talamozongan na ninyo ni Ama ta do to o nipanci ko jinyo. Am o karwan no tao am da pa jyatenngi ori.

¹² Ta o tao a omamizing so ciriciring na ni Ama ta do to am arwaro pa o makarapa jira ciring. So icyakma ney kanen a to meypanpani. Am o ji ngamizing so ciriciring ni Ama ta do to am tana amyan so alikey a katenngan da am to meykabobo pa jira ori.

¹³ Ori o ko pehngehngayan so ciring ko a yamnanao sira. Ta tana da citahen am akma dey jyacita. Tana da amizngen am akma dey jyamizing. Da jyatenngi.

¹⁴ Am ori o na todey mangononong do mina ciring no panoyonoywan na so ciring ni Ama ta do to a meyngaran so Isayya. Ta maniring am, ‘Manoyong o kamizing nyo sya am ji nyo a tenngi. Macita nyo am ji nyo a pengkad.

¹⁵ Ta tey masalit o onowned da no tao eya. O cicilwan da am yakacilcilan. O mata da am yameyreket. Ta no sira macipayok so onowned am makacita o mata da. Makamizing o cicilwan da. Makazazap da no onowned a kapeysinaoli da rana jyaken. Ta ori o ipatazadang ko sira do teyngato.’

¹⁶ “Am inyo am kamo tey yapya. Ta yamakacita o mata nyo. Yamakamizing o cicilwan nyo.

¹⁷ To ko na macitangayan jinyo am aro o panoyonoywan na so ciring ni Ama ta do to a kano omraralay ni Ama ta do to no kakwa a makza no kapakacita da so nyo macita kano kapakamizing da so nyo mamizing. Am da jya nimacita. Da jya nimamizing.

Ipanci na o peypeypangayan no manokos ang

¹⁸ “Amizngen nyo o peypeypangayan no manokos ang.

¹⁹ O tao a makamizing so nanao a omagaz do italamozong na ni Ama ta do to a kaji makatenngan jya am akman so nizomsi do rarahan ang. No mai si Satan am pehsen na jya o ciring na ni Ama ta do to amyan do onowned na.

²⁰ O nizomsi do kavatovatwan am katonodan no masaray a omamizing so ciring na ni Ama ta do to a tao.

²¹ Am ikongo do ji makayamot do onowned na, am no masazi na o alalaw na kano peyrarehtan da sya do kahap na so nanao ni Ama ta do to am makeykai a mablis o onowned na.

²² O nizomsi do katamtamkan am katonodan no tao a omamizing so nanao ni Ama ta do to. Am masanga no vazay na do karawan a kalita jya no peymeymasaodan na. Am ori o ikabengbeng no ciring na ni Ama ta do to do onowned na.

²³ O nizomsi do apya so tanatana am katonodan no tao a omamizing so ciring na ni Ama ta do to a makateneng rana jya a pangozayan a peyvazain. So icyakma ney malasi so makapoo (100) a kano sikanem a ngarnan (60) a kano sikatlo a ngarnan (30) so kasahasahang.”

Pehngehngain na o ciring na do tamek a macilida do mogi

²⁴ Mangononong pa si Yeso so asa ka pehngehngayan na so ciring na. Maniring am, “O italamozong na ni Ama ta do to am akman so tao a mangay a meymowa do nihakawan da.

²⁵ Mitkeh o tao ori am mangay o kavosoyan na a mangay a meymowa so tamek a kangay na rana a moli.

²⁶ Amlida o mogi am amrawa rana. Amlida o tamek am to rana singkaji a malas a amrawa.

²⁷ Mai sira o lamlamsoy no mapeynihakawan sya am maniring sira am, ‘Mo maran, mina kapeymowa mo so apipiya mogi asyo am. Am asyo o tamek ang!’

²⁸ Maniring o mapeynihakawan sya am, ‘Ori am na mina vazay no kavosoyan ko.’ Maniring o lamlamsoy na jya am, ‘Manngwa, to namen rana botbota o tamek ori an?’

²⁹ Maniring jira o mapeynihakawan sya am, ‘Taosya, ta to nyo pazaksa o mogi a botboten.

³⁰ To nyo macipanadngi a mamno. Cyaha, ta no langin ko na am ipanci ko do lamlamsoy ko o kapanma da so tamek a botboten a kapeykabedbed da sya asleben. O mogi am ahapen da a mangay a sokzen do panonokzan ko.’ ”

Pehngehngain na o ciring na do vettow no nappa

³¹ Ipanci na pa jira ni Yeso o asa ka pehngehngayan na so ciring na. Maniring am, “O ipeyparo da no tao a macikaop do italamozong ni Ama ta do to am akman so asa ka vettow no nappa a tokosen no tao do peymowamowan na.

³² O vettow rana am ney likey ori. Am no amlida ori am abo makataha sya so karakorako. So icyakma ney kayo a panagzan da no meyyasasalap.”

Pehngehngain na o ciring na do nimimway a odong

³³ Ipanci na pa ni Yeso o asa ka pehngehngayan na so ciring na. Maniring am, “O ipeyparo da no tao a macikaop do italamozong na ni Ama ta do to am akman rana so kosozi no odong a ahapen no mavakes a pazavozen do odong a ipeymway na sya.”

³⁴ Mangononong si Yeso so pehngehngayan na so ciring na do aro a vazay na. No abo pehngehngayan na so ciring na am abo inanao na sira so aro a tao.

³⁵ O ikakman na sang am todey mangononong o mina ciring no panoyonoywan na so ciring ni Ama ta do to. Ta maniring am, “Mangamaog ko so pehngehngayan ko so ciring ko a pancyan ko no ji pa nipatwaw a vazay ko, nimakalapo no kapangamaog ko so karawan.”

Peypeypangayan no tamek a pehngehngayan na so ciring na

³⁶ Karwan ni Yeso o aro a tao am somdep do vahay. Maniring sira o macinanao jya am, “Pancyan pala jyamen o peypeypangayan no mo pehngehngayan so ciring mo a omagaz do tamek do nihakawan.”

³⁷ Maniring si Yeso am, “O manokos a tao ori am yaken a Nipamnekan na ni Ama ta do to a tao.

³⁸ O nihakawan ori am karawan. O nitokos ori am monganay do italamozong ni Ama ta do to a tao. O tamek am aro a tao a italamozong ni Satan.

³⁹ O mapasakoy so tamek a kavosoyan ori am si Satan. O peypeypangayan no mangay mangap rana sya ori am kavosan no karawan. O mangap sya a tao ori am tinsi.

⁴⁰ No komavos o karawan am o meyraraten a tao am akman sira so tamek ang a botboten a pasleben do lila no apoy.

⁴¹ Yaken rana a Nipamnekan na ni Ama ta do to a tao am manovoy ko so tinsi a mangay omrakep so tomirara so tao a meyraraten a kano marahet so ahahapan sya,

⁴² a kapasleb ko sira do apoy a kapeylavilavi da a mapeygazicigit so ngepen da a maneneseh.

⁴³ No si marateng rana ori am o ji meylimoteng so nakem do italamozong ni Ama ta do to am akman sira so araw a maniray. So amizngan nyo sya an, peyyanen nyo do onowned nyo ori an.

Pehngehngain na o ciring na do nitayo a ovay

⁴⁴ “O italamozong na ni Ama ta do to am akman so ovay a nibobo do tana. Makala no asa ka tao am bonbonan na kasaray na mamalit no kangangay na isazang na do nihakawan ang.

Pehngehngain na o ciring na do mazaponay

⁴⁵ “O italamozong na ni Ama ta do to am akman so tao a meykala so mazaponay a sazangan na.

⁴⁶ No makakala so mazaponay am ipamalit na o kangangay na so nizpi a mangay na isazang do mazaponay ang.

Pehngehngain na o ciring na do tawaz

⁴⁷ “O italamozong na ni Ama ta do to am akman so tawaz a pazaten do awa a ipanawaz so makakaday a among.

⁴⁸ No aro rana o among am ngingiten da rana no mangahahap a tao a kapeykapyapinpin da sya do pamsan na. O pipya among am pangain da do aomas a kawalit da no ji ngangana a among.

⁴⁹ Akman sang no komavos o karawan. Ta mai o aro a tinsi a mapapinpin so ji meyraraten a tao a kapapinpin da so meyraraten a tao,

⁵⁰ a kawalit da no meyraraten a tao do apoy a kapeylavilavi da do dang a meygazicigit so ngepen a maneneseh.”

Vayo a kano adan a nanao

⁵¹ Maniring si Yeso jira am, “Nyo mamimin o ciring eya yakatenngan?” Maniring sira am, “Namen todamimin a yakatenngan.”

⁵² Maniring si Yeso am, “O mangnanao no iwawalam ni Ama ta do to a tao a kapacikaop na rana do italamozong ni Ama ta do to am akman so katenngan a tao a aro so peymeymasaodan. Ta beken a o adan a nanao o katenngan na a ipangnanao, ta katenngan na o vayo a nanao ni Ama ta do to a patwawen.”

To da nazibwan no tao do Nasale si Yeso

⁵³ Teyka na ni Yeso o aro a pehngehngayan na so ciring na a ipanci am karwan na do dang,

⁵⁴ a kangay na rana do ili da. So nipangnanao na do peyneynozyan no tao. Abo ji meyzokab no ciring na a makamizing sya tao. Maniring sira am, “Do wanjin na niyapwan no teneng na ya. Yamyan pa so yamapeyzokab a vazay a na mina vazay.

⁵⁵ Beken a anak na ori no meykeykawaz asyo? Beken a ina na si Madiya asyo? Beken a wari na si Yake a kani Yoseyvo a kani Simong a kani Yota asyo?

⁵⁶ Da kapacikeylyan jyaten da wari na mavakes asyo. Am do wanjin na kapwan no oyowyat na kano teneteneng na.”

⁵⁷ Makarahan am ikaoya da rana si Yeso. Maniring si Yeso jira am, “O panoyonoywan na so ciring ni Ama ta do to am ikanig da sira no tao do peycyeylilyan na. Am kolalahen da sira no macikeylyan jya kano pacivahayan da tao.”

⁵⁸ Ikongo do ji da nganoyngi si Yeso, am ori o ji na nimeyvazai so aro a mapeyzokab a vazay do dang.