Matay 12 - Seysyo No Tao

Nanao ni Yeso a omagaz do araraw no ipeywalam no tao

¹ Ipisa do ipeywalam no tao am mangonong si Yeso a kano macinanao jya do nihakawan a mogi. Makcin sira o macinanao jya am to sira mangoztod so aknatahen da.

² Macita da no tatasa ka tao a macyagom do Vadisay am maniring sira ji Yeso am, “Cita pala sira o yamacinanao jimo a yaji mangozay do iwawalam ta, a yato meyvazay do ipeywalam no tao.”

³ Maniring si Yeso jira am, “Manngwa, ji nyo pa nivilangan o vazay da da Tawey a kano kararay na tao no kakcin da?

⁴ Ta nisomdep si Tawey do raralayan da ni Ama ta do to a kapangap na so nipatanang da ji Ama ta do to a myanpaw a kanen a katoro na pa nya do kararay na. So nyakanan da sya. Ta o myanpaw rana ori am ji da mya kanen no tao. O mapatanatanang so nakem da si Ama ta do to o apya koman sya. Am beken a raraten da o mina kakan da sya.

⁵ Manngwa, nyo pa jya nivilangan o yadomket a ciring do iwawalam ni Moyse, do kapangday da do ipeyweywalam no tao o kaji da mangozayan do araraw no ipeyweywalam no tao no mapatanatanang so nakem do rako a panaralayan? Am beken a raraten da ori.

⁶ To ko na macitangayan jinyo am yamyan jya so yamakdekdeng pa kano rako a panaralayan.

⁷ Ta o ciring do Seysyo am, ‘O ko kakzeben am apiya so nakenakem do icyatatao. Ko jyakzan o yapatanangen a makakaday.’ No si manoyong kamo a makateneng do peypeypangayan no ciring eya am jyabo nyo kato mancyan no yapya so nakenakem a tao a meyraraten a.

⁸ Ta o Nipamnekan na ni Ama ta do to a tao o yameymatmatngeh no araraw no ipeyweywalam no tao.”

Niwakwakan na ni Yeso o meykazakazain so lima tao

⁹ Makarahan am karwan na rana do dang ni Yeso a kangay na do peyneynozyan da no tao do Yotay.

¹⁰ Amyan do dang so asa ka tao a meykazakazain so lima. Ikongo do naknakmen da no tatasa ka tao o kapeykala da so karatan ni Yeso. Maniring sira ji Yeso am, “Manngwa, iwawalam ta o kapangiwakwak so tao do ipeyweywalam no tao an?”

¹¹ Maniring si Yeso jira am, “No si myan jinyo so mangonong so kagling a kakas na no kagling do gazawagaw do ipeywalam no tao am manngwa, ahapen nyo ori an?

¹² Manngwa, makdekdeng pa o kagling a kano inawan no tao? Am ori o ikapya no mangiwakwak do ipeywalam no tao.”

¹³ Maniring rana si Yeso do meykazakazain so lima tao am, “Zanet pala o lima mo.” Zaneten na am todapya rana, kapeyyangay na rana no lima na.

¹⁴ Makowbot sira o tao a macyagom do Vadisay do peyneynozyan am ipeysirsiring da o kacivet da ji Yeso.

Si Yeso o panaptan ta so pahad

¹⁵ Mamizing ni Yeso o kapacioya da jya am karwan na do dang. Am aro sira o tao a macihza jya. Ori o niwakwakan na do meykeyngeyngen a tao.

¹⁶ Meyratateng am ipanci na jira o kaji da meylimwangan no mina vazay na jira.

¹⁷ So ikanoyong na mangononong no mina ciring no panoyonoywan na so ciring ni Ama ta do to a meyngaran si Isayya. Ta maniring am,

¹⁸ “Cita kamo, ta iya rana am ko nipamnekan a lamlamsoy ko. So ko kaglawan nya. Ko sarayan nya. Itoro ko jya o Seyzi ko. Ipeylimwang na do tao o kapatazadang ko sira do teyngato.

¹⁹ Iya rana am ji meyzezyak a gomalagal. Ji lololos do rarahan.

²⁰ Ikarilaw na sira o ji rana teneng a tomala sya a tey arako so alalaw a tao. So icyakman na sang a somidong so ji rana teneng a meyvevyay a tao. Ji na lilis o nakem na mapeyvazay so manoyong a vazay, mangay do ipangononong no ahahapan na sya.

²¹ Mamimin o tao do karawan a manapet jya so pahad.”

Si Yeso a kani Peysepo

²² No kanang am amyan so tao a mangay nya ji Yeso so kovotan no kalamsoyan ni Satan a ji makabnebnek a mavota tao. Makarahan am iwakwakan na kapakabnebnek na rana kapakacita na rana.

²³ Nisavasavak da no aro a tao. Maniring sira am, “Ala iya ya o sivovoong ni Tawey.”

²⁴ Mamizing da no tao a macyagom do Vadisay am maniring sira am, “O na ipakavozwaw so kalamsoyan ni Satan am na oyatan ni Satan a meyngaran so Peysepo.”

²⁵ Katenngan na ni Yeso o keyleylamdam da sya. Maniring jira am, “Abwata asa ka mahataw a macizakazakat. So icyakman na sang no asa ka vahay a ji macizakazakat.

²⁶ No si meyyarap sira Satan a kano kalamsoyan na am ji da rana pakongo o kabedbed da. So to da ranavwaki.

²⁷ Nyo panci yaken a na oyatan ni Peysepo. Ikongo o nyo ji mancii no kararay nyo a nipantan na ni Peysepo so oyowyat na.

²⁸ No si manoyong ko a mamozwaw no oyowyat ni Ama ta do to am yamanoyong rana si Ama ta do to a tomalamozong no omanoyong jya tao sicyaikwaya.

²⁹ “Abo tao a tondep do yanan no makapya meykalokal a tao a mangay tomakaw so apzapzatan na. No si myan saon so makavaod so meykalokal a tao am ori o ipakatakaw na so apzapzatan na am.”

³⁰ Nipanci na pa ni Yeso am, “O ji nganod jyaken am mapasobna jyaken. O ji nidong jyaken am zazatan na o vazay ko.

³¹ Am ori o ko pancyan nya jinyo an. O raraten no tao a kano kakolala da si Ama ta do to am mavonas ori. Am omraherahet so Seyzi na ni Ama ta do to a tao am jyavonas o akman sang a raraten na.

³² O komolala jyaken a Nipamnekan na ni Ama ta do to a tao am mavonas o akman sang a raraten. Am omraherahet so Seyzi na ni Ama ta do to a tao am to rana meyyonong a jyavonas o akman sang a raraten.

Kayo a kano asi na

³³ “O kakanen so asi a kayo am kanen o asi na. O ji ngangana so asi a kayo am ji nganna o asi na. So to na macilociloloi do kakayokayo na no asi na.

³⁴ Inyo rana macitapas do tokza so onowned a tao am abo o apya ciring a powboten nyo.

³⁵ O apya so nakenakem a tao am apya o icicirawat na. O marahet so nakenakem a tao am marahet o icicirawat na. Ta to macilocilolo do kapyan no onowned nyo a karahet no onowned nyo o powboten nyo a ciring.

³⁶ To ko na macitangayan jinyo am no marateng o araraw no peykapyapinpinan na ni Ama ta do to so tao am abo rana o taywen da ciring da.

³⁷ Ta to na palololwa ni Ama ta do to do mina ciring nyo o keyyan no raraten nyo a kabo no raraten nyo.”

Kakzeben da o mapeyzokab a vazay

³⁸ No kanang am amyan so mangnanao no iwawalam ni Ama ta do to a kano tao a macyagom do Vadisay a manci nya ji Yeso. Maniring sira am, “Mo Mangnanao, namen kakzeben o kapakacita namen jimo a meyvazay so mapeyzokab a vazay.”

³⁹ Maniring si Yeso jira am, “Yatey makdeng o raraten no tao sicyakwaya. Ikongo o da kakzeban so da kapakacita so oyowyat na ni Ama ta do to. Am o akman so mina vazay na ni Ama ta do to do panoyonoywan na so ciring na a meyngaran si Yena o macita nyo. So ikabo no maharahara pa kano nang a macita nyo.

⁴⁰ Mina katlo araw a kano katlo ahep si Yena nimyan do velek no rako a among. Akman ko sang a Nipamnekan na ni Ama ta do to a tao a amyan do oned no tana so makatlo araw a kano katlo ahep.

⁴¹ No marateng o araraw no ipacici na a mapeykapyapinpin so tao ni Ama ta do to am meytatanek sira o tao do Niniwey a omraherahet jinyo a tao sicyakwaya. Ta mamizing da o ciring ni Yena am mamlis rana sira. To ko na macitangayan jinyo am amyan jya so rakorako pa so vazay a kani Yena. Am yanyo ji ngapa o nanao na jinyo.

⁴² No marateng o araraw no ipacici na a mapeykapyapinpin so tao ni Ama ta do to am meytatanek o panirsirngen a mavakes a meyvahay do Siba no kakwa pa a omraherahet jinyo a tao sicyaikwaya. Ta iya rana am nimapo do marai a ili da a mangay a omamizing so ciring ni Solomen. To ko na macitangayan jinyo am yamyan jya so yarakorako pa so vazay a kani Solomen am yanyo ji ngamiznga.

Meysinaoli pa do tao o kalamsoyan ni Satan

⁴³ “Mavozwaw o kalamsoyan ni Satan do nikovotan na tao am omlivolivon a meykala so peywalaman na. Am ji makakala.

⁴⁴ Maniring am, ‘Yapyapya rana o kapeysinaoli ko pa mangay komovot do nikovotan ko a tao.’ Meysinaoli rana am macita na o tao ang a makownong rana jya, ta abo nimacipalit a nikomovot jya.

⁴⁵ So nyangay na manara so papito a masozisozi pa ka nya a kalamsoyan ni Satan a mangay komovot jya. Manngo o tao ori a. Jyabo kaji na raherahetan pa sicyaikwaya kano kakwa no nakenakem na. To ko macitangayan jinyo am o raraten da rana no tao sicyaikwaya am maraherahet pa kano kakwa.”

Ina na kada wari na ni Yeso

⁴⁶ Mangononong pa si Yeso do aro a tao am mai si ina na kada wari na mahakay a komakzeb so kapacisirsiring da jya.

⁴⁷ Maniring o tao ji Yeso am, “Ana, yamyan so da ipanci ni ina mo a kada wari mo do pantaw.”

⁴⁸ Maniring si Yeso am, “Sino ina ko a kano kakakteh ko.”

⁴⁹ Makarahan am maniring rana do macinanao am, “Cita kamo, ta sira rana ito am ina ko a kada kakakteh ko.

⁵⁰ Ta o mahap so vazay ni Ama do to a tao am ori o abneken ko a kakakteh ko a kano ina ko.”