Make 8 - Seysyo No Tao

Nibsoy na o kakapatan a ranaw (4000) a tao

¹ Ji meyyonownay am amyan pa so aro a tao a mangay do tangain ni Yeso. Meyratateng am abo rana o kanen da. Maniring si Yeso do macinanao jya am,

² “Ko ikabo no nakem sira o aro a tao. Ta yamakatlo rana araw sira a yanimacilovot jyaken am yabo rana o kanen da sicyaraw eya.

³ No si to ko na novoya sira mangay am jyabo kajya lingowngawan jira makcin a. Ta yatatasa jira o yapo do yamarai a ili.”

⁴ Maniring o macinanao jya am, “Do wanjin o mangay ta pangapan so kanen da ibsoy ta sira, do yabo panazangan do jya.”

⁵ Maniring si Yeso jira am, “Yapira myanpaw o yamyan jinyo.” Maniring sira am, “Yapito a ka myanpaw.”

⁶ Makarahan am ipanci na o aro a tao a amlisna kahap na rana so apito a myanpaw a isaray ji Ama ta do to a kakcikcil na rana sya itoro do macinanao jya a kavonong da rana sya do aro a tao.

⁷ Amyan so ji makanateng a lilikta among. Akman sang ta isaray na ji Ama ta do to ni Yeso a kapanci na rana no macinanao jya amvonong sya do aro a tao.

⁸ Abo jya nimabsoy a nikoman do aro a tao ang. O vilang da no nikoman a tao am kakapatan sira ranaw (4000).

⁹ Peykakasahen da no macinanao ji Yeso o atda da am nipno da o apito a ka rako a yala. Makarahan am tovoin na rana sira ni Yeso a mangay rana do vahay da,

¹⁰ a kapacyavang na rana do macinanao jya meypangay do meyngaran so Tamanota.

Kakzeben da no tao a macyagom do Vadisay o kapanita da so mapeyzokab a vazay

¹¹ Amyan so tao a macyagom do Vadisay a nimangay ji Yeso a macinekad jya. Naknakmen da o keyleylamdam da sya. Am ori o pasonsonan da sya mapeyvazay so mapeyzokab a vazay. Ta yongkad na no kanoyong na apo ji Ama ta do to.

¹² Am ori o nikarahet na so aktokto. Maniring jira am, “Ikeykongo kamo a tao sicyaikwaya yakomakzeb so yamapeyzokab a vazay. To ko na macitangayan jinyo am abo o ipacita ko jinyo a mapeyzokab a vazay.”

¹³ Makarahan am karwan na rana sira a kasakay na rana do vazangay a meypangay do katovangan no rako a meybebneng a ranom.

Ji da tenngi no macinanao jya o kapwan no oyowyat ni Yeso

¹⁴ Nikahamangan da no macinanao ji Yeso o kapalolo da so kanen no kanang. So ikasa na myanpaw amyan do vazangay da.

¹⁵ Maniring si Yeso jira am, “Azimanen nyo o akmey kosozi no odong a yamyan do tao a macyagom do Vadisay a kani Helote.”

¹⁶ Makarahan am ikazyak da. Maniring sira do kadwan jira am, “Ala na pakacirngen ori do yata kajya nimapalolwan so kanen eya.”

¹⁷ To na rana tenngi ni Yeso o amyan do onowned da. Maniring jira am, “Ikongo nyo kazyakan no nyo kajya nimapalolwan so kanen. Manngwa, nyo jyazab? Nyo jyatenngi o na nikapwan no oyowyat ko? Kamo manoyong a yajyapatapatak a tao.

¹⁸ Manoyong ta yamyan so mata nyo am kamo ji makacita. Yamyan so talinga nyo am kamo ji makamizing. Manngwa, nyo na todahamangi?

¹⁹ No kakcikcil ko so alima ka myanpaw a nibsoy ko so kakaliman a ranaw (5000) a tao am apira ka yala o nikpeh nyo a atda da.” Maniring sira am, “Adwa o icyarwa na.”

²⁰ Maniring pa si Yeso am, “No kakcikcil ko so apito a ka myanpaw a ipakan so kakapatan a ranaw (4000) a tao am apira ka yala o nikpeh nyo a atda da.” Maniring sira am, “Apito a ka yala.”

²¹ Makarahan am maniring si Yeso jira am, “No manoyong ori am manngwa, nyo pa jyatenngi o na nikapwan no oyowyat ko?”

Niwakwakan na o mavota tao do Peysayta ili

²² Makaranes sira do Peysayta ili am amyan so tao a omalak so mavota tao a mangay do tangain ni Yeso a komakzeb sya minan jya no lima na.

²³ Makarahan am kalain na o mavota tao ni Yeso a mangay do siri no ili a kacipa na do mata na a kapaopta na so lima na jya. Maniring si Yeso jya am, “Manngwa, yamyan so mo macita an?”

²⁴ Citahen na am maniring am, “Ko makacita rana so tao. Am sira akmey kayo a yaomalam.”

²⁵ Makarahan am pinanan na ni Yeso o mata no tao am to rana makacita a kabo na rana no ji na pengpengkad a makakaday.

²⁶ Makarahan am tovoin na rana ni Yeso do vahay da kapanci na nya ji rana meysinaoli do ili ang.

Nipanci na ni Pite o ka Misayya ni Yeso

²⁷ Meypangay si Yeso a kano macinanao jya do Kaysadiya Veydipi a ili am pacicin na sira do rarahan o macinanao jya. Maniring jira am, “Sino kwan da yaken no tao.”

²⁸ Maniring sira am, “Yamyan so tao a yamanci nimo a nimanaktak a si Yowani. Yamyan so tao a yamanci nimo a Idiya. Yamyan so tao a yamanci nimo a panoyonoywan na so ciring ni Ama ta do to no kakwa pa.”

²⁹ Maniring pa si Yeso jira am, “Sino kwan nyo yaken.” Maniring si Pite am, “Misayya ka.”

³⁰ Makarahan am ipanci na jira o kaji da meycicicyan nya do tao so ka Misayya na.

Pazimanen na o kawakwak da sya

³¹ Makarahan am papwen na rana o kananao na so macinanao jya ni Yeso do kakeykai na rana no alalaw na makaranes jya. Maniring jira am, “Mangay o kapakasazi ko so aro a alalaw ko a Nipamnekan na ni Ama ta do to a tao, do kataosya da jyaken no kamanrarakehan a kano panipanirsirngen no mapatanatanang so nakem da si Ama ta do to a kano mangnanao no iwawalam ni Ama ta do to a kawakwak da rana jyaken. Am no ikatlo na araw am mirwa ko a mavyay.”

³² So ji na rana nitomayoi so akman sang a vazay a nipanci jira. Am ori o to na ranay ngalai sya ni Pite a pasyain jira a omza sya.

³³ Meyvazingowngaw si Yeso a tomita so macinanao jya am maniring ji Pite am, “Kazey mo Satan. O nakenakem mo am beken a nakenakem ni Ama ta do to, ta monganay do tao.”

³⁴ Makarahan am lovoten na rana ni Yeso o aro a tao a kano macinanao jya do tangain na. Maniring jira am, “No amyan so tao a omonot jyaken am to na pangawawan o kataotao na a somabway no jyojika na macihza jyaken.

³⁵ Ta o amnakenakem so kataotao na am maraherahet, ta mawakwak ori. Am o tao a to ngawaw pa no kataotao na a mahap so vazay ko a meylimwang no Mapasaray a Ciriciring na ni Ama ta do to am mahap na o to meyyonong a ikavyay no pahad na.

³⁶ Tana mahap no tao o peymeymasaodan do karawan a kaji na makahapan so to meyyonong a ikavyay no pahad na am ikongo peypeypangayan no nang!

³⁷ Ikongo ipalit na pa so to meyyonong a ikavyay no pahad na.

³⁸ O tao rana do karawan sicyaikwaya am yatey yaro rana o raraten da. No amyan so tao a macimanig nyaken a kano ciring ko am no meysinaoli ko a Nipamnekan na ni Ama ta do to a tao a macihza do azwazway ni Ama ta do to a kano aro a tinsi am abo nakenakem ko sya.