Make 5 - Seysyo No Tao

Nivozwaw na ni Yeso o nikomovot do tao a aro a kalamsoyan ni Satan

¹ Mangay sira do katovangan no rako a meybebneng a ranom a meyngaran so Cyadidi. Do dang rana am ili da no tao do Kelasen.

² Kapakaranes ni Yeso do pamsan na am makasazi so tao apo do kanitwan. O tao rana am kovotan no kalamsoyan ni Satan.

³ Amyamyan ori do kanitwan. Abo makataid do tao ang. Tana vaoden da no vahalang am ji da vaod.

⁴ Ta to na zavazavata o ivaod da sya. So ikabo no tao a makavaod sya.

⁵ Mangday so araw o kalololos na do kanitwan a kado taketakey a kapangap na so vato a izaza na so kataotao na.

⁶ Macita na si Yeso do marai pa am malalayo a mangay a kapeylilitod na do tangain ni Yeso,

⁷ a kalolos na. Maniring am, “Ikongo mo gogadan nyaken, mo Yeso a Anak no ney manokdwan na Tao do to. Ko ipanci do Tao do to o kaji mo pasingsingtan jyaken.”

⁸ O pancyan na no nang am nipanci na ni Yeso o kapakowbot na rana no kalamsoyan ni Satan do kataotao na.

⁹ Maniring si Yeso am, “Sino ngaran mo.” Maniring am, “O ngaran ko am Si Malavong, ta namen malavong.”

¹⁰ To mapasyasi ji Yeso a manci no kaji na vozwawan sira do dang.

¹¹ No kanang am amyan do tokon so aro a kois a meykoskos.

¹² Maniring o aro a kalamsoyan ni Satan a mapasyasi ji Yeso am, “To mo rana novoya yamen do aro a kois ang a kangay namen a komovot jira.”

¹³ Makarahan am apyahen na sira ni Yeso. Am ori o nipakowbot da na do kataotao na no tao ang a kangay da komovot do aro a kois. Ala adwa zivo (2000) o kois a nikomsoz do alalasyas a kangay da mehmes do rako a meybebneng a ranom a kamimin da mawakwak.

¹⁴ Mina tongsoz rana o tomita so kois a tao kangay da na do ili a meylimwang no akman sang a vazay. Mamizing da no aro a tao am meypakokowbot sira tomita so vazay ang.

¹⁵ Makaranes sira ji Yeso am macita da o nikovotan no aro a kalamsoyan ni Satan a amlisna do dang a apiya rana so ayob a makownong rana do nakenakem na. Am ori o nikarahet da so onowned a to rana nyahey, ta tey arako oyowyat ni Yeso.

¹⁶ O nimakacita so nikovotan a tao a kano nikomsoz a kois am ononongan da rana do aro a tao o panpandan na.

¹⁷ Am ori o nipancyan da rana ni Yeso a komaro do dang.

¹⁸ Zomagpit do vazangay si Yeso am mangay mapasyasi ji Yeso o nikovotan a tao a manci no kapehza na sya.

¹⁹ Am ji na mya ni Yeso. Maniring jya am, “Angay rana do vahay nyo a kapanci mo nya do zipozipos nyo so na mina vazay jimo ni Ama ta do to a yamarilaw nimo.”

²⁰ Mangay rana o tao ori am ipeylimwang na rana o ngaran ni Yeso do ngaranan da Meykasa ngarnan a ili, do kanimvozwaw na rana so kalamsoyan ni Satan do kataotao na. O makamizing sya aro a tao am isavasavak da o akman sang a vazay ni Yeso.

Rarwa ka tao a manoyong a nimeyhanhan ni Yeso

²¹ Somakay si Yeso do vazangay am mangay do katovangan no rako a meybebneng a ranom. Makaranes am meylovolovot o aro a tao do tangain na.

²² Amyan do dang so asa ka meymatmatngeh no peyneynozyan a meyngaran so Yalo a nimacizavoz do aro a tao. Macita na si Yeso am mangay meylilitod do tangain ni Yeso a mapasyasi jya.

²³ Maniring am, “Yatey makdeng o ingingnen no anak ko a mavakes. Mangay mo pa parapongen o lima mo jya keywakwak mo jya kapya na rana.”

²⁴ Makarahan am macihza si Yeso jya mangay. Aro tao a meysilisilin a macihza jya.

²⁵ Amyan do dang so asa ka mavakes a makadwa so icyarwa (12) so awawan a to makaliliw so kataotao na gomcin no rala.

²⁶ Nipasowsow na o kangangay na do pangavavawan am ji na apyan no ingingnen na, ta ipeypeyparahet na.

²⁷ Mamizing na o vazay ni Yeso am ori o nipacislin na do aro a tao a kangay na do likod ni Yeso a minan do talili na.

²⁸ O nakenakem na am, “No si pinanan ko o ayob na am jya todapya rana o kataotao ko a.”

²⁹ Makarahan am mina todapya rana o kataotao na do pakaliliwan na sya.

³⁰ Am to na rana tenngi ni Yeso o oyowyat a makowbot do kataotao na. Am ori o nipaolyan na so mata na do aro a tao. Maniring am, “Sino yaminan do ayob ko ang.”

³¹ Maniring sira o macinanao jya am, “Mo panangangayan nya. Mo jyacita o aro a tao a meysilisilin a mangay jimo? Mo kapanahes no niminan jimo.”

³² Am ori o nicittan na so sirisiri na. Cittan na so tao a niminan jya.

³³ Katenngan na rana no mavakes o kapya na rana no kataotao na am to rana zikzik a manyahey. Am ori o nipeylilitod na do tangain ni Yeso a manci no kaniminan na jya.

³⁴ Maniring jya si Yeso am, “Manganako, ka manoyong a yameyhanhan nyaken. Makapiya ka so onowned a mangay rana, ta yarana apya o ingingnen mo.”

³⁵ Ji pa vitos o ciring ni Yeso am mai o tao apo do vahay ni Yalo. Maniring sira ji Yalo am, “Ji mo na mancyan si Yeso, ta yarana nimawakwak o anak mo.”

³⁶ Am ji na ngazidan ni Yeso o ciring da. Maniring rana si Yeso do meymatmatngeh no peyneynozyan am, “Ji ka nyahey. Anoyngan mo yaken.”

³⁷ Makarahan am palolwen na si Pite a kani Yake a kano kakteh na ni Yake a meyngaran so Yowani a mangay. Am ji na mya ni Yeso o tarek a tao a macihza jya.

³⁸ Makaranes sira do vahay no meymatmatngeh no peyneynozyan am macita na sira o aro a tao a meykabakabayo a omlavi jya.

³⁹ Somdep si Yeso am maniring jira am, “Ji kamo lavi, ta yamitkeh. Nimakongo kwan nyo.”

⁴⁰ Mamizing da o ciring ni Yeso am no mangay o kaming da am mangay o kapeyoyaoya da. Makarahan am powboten na sira ni Yeso o aro a tao. O inyapwan na kano tatlo a macinanao jya o amyan do sahad na.

⁴¹ Makarahan am ahapen na o lima no kanakan. Maniring jya am, “Tadita komi.” O peypeypangayan na no nang am, “Ko ipanci imo a meyvangon, manganako.”

⁴² Makarahan am meyvangon rana o kanakan a kalam na rana. No kano nang am adwa o ikasikarwa na no kakawakawan na no kanakan ang. So nipeyzokaban da no vazay ang no inyapwan na.

⁴³ Maniring jira si Yeso am, “Ji nyo meyvehvehyan do tao o akman sang a vazay,” kapanci na rana nira a mantan nya so kanen na.