Make 4 - Seysyo No Tao

Pehngain na do manokos a tao

¹ Mangnanao si Yeso do rako a meybebneng a ranom a meyngaran so Cyadidi am tey yaro sira o tao a meysilisilin do katangked na. Am ori o to na rana zagpici do vazangay a amlisna a kahatahataw na do meybebneng a ranom no vazangay. O aro a tao am meytatanek sira do pamsan na.

² Makarahan am nanawen na sira no aro a ciring a pehngehngain na. Maniring jira am,

³ “Pakamizngen nyo an. Amyan so asa ka tao a mangay manokos.

⁴ Manokos am amyan so zomsi do rarahan. Am mangay da toktokan no meyyasasalap.

⁵ O karwan na am zomsi do kavatovatwan am amlida, ta amyan so alikey a tana do dang.

⁶ No amdada o araw am mapseng do kaji na makayamotan, ta alikey o tana do dang.

⁷ O zomsi do katamtamkan na am tana amlida am ji malasi, ta kaongongan no aro a tamek.

⁸ O zomsi do apya so tanatana am apiya o kalidalida na a kapakapya na rana malasi. So iyan no malasi so sikatlo a ngarnan (30) a kano sikanem a ngarnan (60) a kano makapoo (100) so asi.”

⁹ Maniring si Yeso am, “Amizngen nyo an, peyyanen nyo do onowned nyo ori an.”

Peypeypangayan no manokos a tao

¹⁰ Maveyvow si Yeso am o niomamizing so ciring na tao am macihza sira do rarwa so ikakarwan a macinanao ji Yeso a mangay manahes no peypeypangayan na.

¹¹ Maniring si Yeso am, “O ji na nipatwaw pa peypeypangayan na no katalamozong na ninyo ni Ama ta do to am ipanci ko jinyo an. O karwan da no tao am nanawen ko sira no pehngehngayan ko so ciring ko.

¹² Akman so ciring do Seysyo. Maniring am, ‘Tana citacitahen da am akma dey jyacita. Tana amyamizngen da am ji da tenngi. Yabo da kasngesngenan jyaken. Makongo ko so wanjin a amvonas so raraten da.’ ”

¹³ Maniring jira si Yeso am, “Nyo jyatenngi o ko pehngehngain a ciring ko? No si akman kamo so sang am jyabo kapakateneng nyo do karwan no pehngehngayan ko so ciring ko a.

¹⁴ O na ipanokos no tao ori am ciriciring na ni Ama ta do to.

¹⁵ O nizomsi do rarahan am kapalangayan ori no tao a ji meyyahahay so nimamizing a ciring na ni Ama ta do to ahapen ni Satan do onowned da.

¹⁶ O nizomsi do kavatovatwan am akman ori so tao a masaray a omamizing so ciring na ni Ama ta do to.

¹⁷ Am ji makayamot o ciring na ni Ama ta do to do onowned da. No masazi da o alalaw da kano peyrarehtan da sira, do kahap da so nanao ni Ama ta do to am makeykai a mablis o onowned da.

¹⁸ O nizomsi rana do katamtamkan am tana amizngen da o ciring na ni Ama ta do to am,

¹⁹ ji makapalasi, ta masanga sira no vazay da do karawan a kalita jira no peymeymasaodan da kano makakaday a ikeykakza da do karawan. Am ori o ikabengbeng no ciring na ni Ama ta do to do onowned da.

²⁰ O nizomsi rana do apya so tanatana am akman so tao a omamizing so ciring na ni Ama ta do a meyngongyod a meyhanhan nya do onowned da. So icyakman da so aro so asi a kayo.”

Pehngehngain na o ciring na do zampo

²¹ Maniring pa si Yeso am, “Sino o mapangay so zampo do teyrahem no ireyrayan. Ji na pangaya o zampo do pakacittan sya no tao a.

²² Abo ji meytotwaw a matayo a vazay. Akman sang, ta tana nyo jyatenngi sicyaikwaya o nanao ko jinyo am cyaha, ta katenngan nyo rana no makwa.

²³ Amizngen nyo an, peyyanen nyo do onowned nyo ori an.”

²⁴ Maniring pa jira am, “Peyyanen nyo do onowned nyo o yanyo nimamizing a ciring. O ahahapan nyo sya do icyatatao nyo am akman sang o ahahapan na sya jinyo ni Ama ta do to. So ikarwaro na pa no itoro na jinyo a yarana omamizing so nanao na ni Ama ta do to.

²⁵ Am ori o pakamizngan nyo sya an. Ta o mamizing so ciring na ni Ama ta do to am arwaro pa o makarapa jira ciring. Am o ji ngamizing so ciring na ni Ama ta do to am tana myan so alikey a katenngan da am to meykabobo jira ori.”

Pehngehngain na o ciring na do omlida rana nitokos

²⁶ Maniring pa si Yeso am, “O italamozong ni Ama ta do to am akman so manokos a tao.

²⁷ Mitkeh do mahep a kayokay na do maraw am ji na tenngi o ilida na rana no nitokos na.

²⁸ O tana am mapalida so makakaday a nipamowa na. No apiya rana o kalidalida na am mapka rana no asi na a kazako na rana.

²⁹ No mazako rana o nimowa na am langin na rana no mapeymowamowa sya no ingiten, do kazako na rana no mowamowa na.”

Pehngehngain na o ciring na do vettow no nappa

³⁰ Maniring si Yeso do pacicyan na sira am, “Akman so wanjin o italamozong na ni Ama ta do to. Ikongo pehngehngayan ta sya.

³¹ O italamozong ni Ama ta do to am akman so vettow no nappa so kalikelikey. No pamowahen no tao do tana am,

³² amlida rana no kadadayan no araw. No omlida rana ori am abo makataha so sang a nappa so karakorako a mangay da peyvahayan no meyyasasalap.”

³³ Aro o akman sang a payyaingen na ni Yeso a ciring na a inanao na so tao. To na mangozai o katenngan da no tao a inanao na sira.

³⁴ No myan do kalwalovotan am nanawen na sira no pehngehngain na a ciring. No maveyvow si Yeso a kano macinanao jya o pancyan na no peypeypangayan no nanao na.

Nipeyhanahanang na ni Yeso o rako abkas a kano pagpag

³⁵ Do ahep na no kasaraw am maniring si Yeso do macinanao jya am, “Mangay tamo do katovangan no rako a meybebneng a ranom eya.”

³⁶ Makarahan am karwan da o aro a tao. Am nimanmanma rana si Yeso a nisomakay do vazangay. Mangay rana sira am amyan so karwan no vazangay a macizavoz jira.

³⁷ Makarahan am to na ngirasa sira no rako a pagpag. Am ori o nipeykabkas na rana. Makarahan am lokolokongan na rana o vazangay da kaji na rana a tengpahan no vazangay da.

³⁸ No kanang am amyan do maoji na si Yeso a tomangen so oo na mitkeh. Am ori o niyokayan da sya. Maniring sira am, “Mo Mangnanao, tamo na marahet. Manngwa, ka jyalaw?”

³⁹ Meyvangon si Yeso am sirsirngen na rana o pagpag a kano paopaong na. So ji na nimeyyahahai a meyhanahanang.

⁴⁰ Maniring rana si Yeso do macinanao jya am, “Ikongo nyo ikanyahey. Nyo ji meyhanhanan si Ama ta do to?”

⁴¹ Mamizing da am yeyyak da. Maniring sira do kadwan jira am, “Sinosino ya, na to ngamiznga pa no pagpag a kano abkas.”