Make 2 - Seysyo No Tao

Niwakwakan na ni Yeso o ji makapeyvangon a tao

¹ Makanateng do araraw am meysinaoli si Yeso a mangay do Cyapaynong. Katenngan da no aro a tao o keyyan na do asa ka vahay am,

² meysilisilin sira o aro a tao a mangay ji Yeso. So nikabo rana no yanan da do vahay ang. Akman sang do ngoso no vahay. Ta manicit o tao. Mangononong si Yeso do aro a tao am,

³ amyan so papat a ka tao a mangai so asa ka tao a ji makapeyvangon.

⁴ Ikongo do tey yaro o tao, am ori o ji da makaslislini a mangay nya do tangain ni Yeso, kato da rana ngalatan do atep no ji makapeyvangon a tao a kakabkab da so atep no vahay a katonton da so tao a mangay pazomtaden do yanan ni Yeso.

⁵ Macita na ni Yeso o kakdekdeng no onowned da am maniring do ji makapeyvangon a tao am, “Yarana nimavonas, mo keypong, o raraten mo.”

⁶ O amlisna do dang a mangnanao no iwawalam ni Ama ta do to am ikazyak da.

⁷ “Asyo ori a jyaninig ni Ama ta do to a yato manci no akman sang a ciring. Si Ama ta do to saon o makavonas so raraten am.”

⁸ Mahaw na ni Yeso o onowned da. Maniring jira am, “Ikongo nyo ikakman sang so nakenakem.

⁹ Masalisalit o kapanci ko no kavonas na rana no raraten no yameyngen eyto an? No apyapya o kapanci ko no, ‘Peyvangon rana kapaciralay mo na do ititkehan mo a mangay rana.’

¹⁰ Ko ipacita jinyo o oyowyat ko a Nipamnekan na ni Ama ta do to a tao a manvonas so raraten no tao do karawan.” Makarahan am maniring do ji makapeyvangon a tao am,

¹¹ “Ko ipanci jimo am, Peyvangon rana kahap mo rana so yamo nirayan a mangay do vahay nyo.”

¹² So nipeyvangon na rana no tao a omahap so nirayan na a kapakowbot na rana. Pacimatan da no aro a tao am ori o nisavasavakan da nya a kazwazway da na si Ama ta do to. Maniring sira am, “Namen pa jya nimakacita so akman sya vazay.”

Rarahen na ni Yeso si Diwey

¹³ Ipirwa na kangay ni Yeso do rako a meybebneng a ranom a ngaranan da Cyadidi am aro sira o tao a meylovolovot do tangain na. Am ori o ninanawan na sira.

¹⁴ Mangonong am macita na o mapeyvazay so deyking a tao. Iya rana am anak ni Alevey a meyngaran so Diwey a omlisna do torotorwan no deyking a vahay. Maniring jya si Yeso am, “Macilolo ka jyaken an.” Makarahan am meytatanek rana si Diwey a kapacilolo na rana ji Yeso.

¹⁵ Mavitos o vazay ori am mangay rana koman si Yeso do vahay ni Diwey. No kano nang am aro sira o mapeyvazay so deyking a kano aro a meyraraten a tao a macihza jya. O karwan da am macihza ji Yeso a kano macinanao jya a kahahanghang da rana koman.

¹⁶ Macita da si Yeso no tao a macyagom do Vadisay a mangnanao no iwawalam ni Ama ta do to a macihanghang do meyraraten a tao am ahesen da rana sira o macinanao jya. Maniring sira am, “Ikongo na ipacihanghang do mapeyvazay so deyking a kano aro a yameyraraten a tao ang.”

¹⁷ Mamizing na ni Yeso am nanawen na sira. Maniring am, “O apya so kataotao a tao am ji da ngala o mangavavaw a tao an. Ta o meyngen a tao o komala so koysang. O peypeypangayan no ko nyai am beken a ko manara so ji meyraraten a tao. Ta o yameyraraten a tao am ori o yako nyai.”

Ciring na ni Yeso do ji peyzavoza o vayo a nanao na kano adan a icicirawat no tao no kakwa

¹⁸ Ipisa am o macinanao ji Yowani a kano tao a macyagom do Vadisay am ji sira mangakaday no tomakatakaw amnakenakem si Ama ta do to. Maniring o tao ji Yeso am, “Ikongo da ji mangakadai no yamacinanao ji Yowani a kano tao a macyagom do Vadisay. Am asyo sira o yamacinanao jimo a yamangakaday.”

¹⁹ Maniring si Yeso am, “No macikaop pa do pamaringan da so kanen no matarek so vahay a mahakay am manngwa, koman sira o cinirara na tao an? Jyabo kaji da nganan do ipacihanghang na jira.

²⁰ Am no marateng rana o araraw a irakep da so mahakay ori am manoyong rana kaji da mangakadayan do kasinalaw da nya.

²¹ “Abo tao a mapatapang so vayo a milakayob do adan a ayob. Ta ji macimangno. So ikapising no adan a ayob ang. So ikarakorako na pa no kazamitan na.

²² Abo tao a mangap so vayo a potaw cyo a paglowen do adan a kolit no baka, ta zombak. Am ori an o paglowan so vayo a potaw cyo do vayo a kolit no baka an.”

Nanao na ni Yeso a omagaz do araraw no ipeywalam no tao

²³ Ipisa kapeywalam no tao am mangonong si Yeso a kano macinanao jya do nihakawan a mogi. Am to sira mangoztod so aknatahen da no macinanao ji Yeso.

²⁴ Maniring sira o tao a macyagom do Vadisay ji Yeso am, “Adan rana o akman sang a vazay do ipeywalam no tao!”

²⁵ Maniring jira si Yeso am, “Ikongo o mina vazay ni Tawey no kakcin na. Ji nyo pa nivilangan? No kano nang am makcin si Tawey a kano kararay na.

²⁶ Am ori o nisdep da do raralayan da ni Ama ta do to a koman so nipatanang da myanpaw. No kano nang am panirsirngen no mapatanatanang so nakem da si Ama ta do to o meyngaran so Apiyata. O iwawalam ta am o mapatanatanang so nakem da si Ama ta do to am ori o koman so sang. Am nikoman si Tawey so nipatanang da kanen a katoro na pa nya do nimacihza jya tao do kakcin da.”

²⁷ Maniring pa jira si Yeso am, “O araraw no ipeywalam no tao am omaing jinyo a tao a ikapya nyo. Am beken a cinatazak nyo a tao o kahap nyo so makakaday a icicirawat nyo do ipeywalam no tao.

²⁸ Am ori an o Nipamnekan na ni Ama ta do to a tao am iya o meymatmatngeh no ipeywalam no tao.”