Make 16 - Seysyo No Tao

Mirwa mavyay si Yeso

¹ Komavos o ipeywalam no tao am manazang si Matelyan Madiya kani Madiya a ina na ni Yake a kani Salomey so mahangno a haneng, mangay da ikoris do kataotao ni Yeso.

² Apnezak do niciyo do ipeyzengazengang na rana am mangay sira do nipayan da so kataotao ni Yeso.

³ Amyan sira do rarahan am naknakmen da o kabo no tao a somidong sira a mapeylis so rako a veysen a nipaneb da.

⁴ Am citahen da am nimalolog rana o rako a vato.

⁵ Somdep sira do heseb na am macita da o mowva tao a omlisna do kawanan no nipayan da si Yeso a meyyayob so malavang a ayob. Ori o niogto da.

⁶ Maniring o mowva tao ori am, “Ji kamo ogto a mavokahaw. Ta ko katenngan inyo a yakomala so yada nipadket do jyojika tao do Nasale a si Yeso. Am yana ji ngyan do jya, ta yarana nimirwa mavyay. To nyo nita o yada nipayan sya ito,

⁷ a kangay nyo na manci nya do macinanao jya. Ipanci nyo ji Pite, ta o ciring na ni Yeso am manmanma pa ka nira a mangay do Cyadidi. So ipakacita da sya do dang. So na ipangononong no mina ciring na jira.”

⁸ No mangay kanyahey da am mangay keyyak da nya a malalayo a komaro rana do heseb na. Am ji da nipanci do tao. Ta manyahey sira.

Mapacita si Yeso ji Matelyan Madiya

⁹ [Apnezak do niciyo am mirwa mavyay si Yeso. O ney manma na nipacittan na no kataotao na am si Matelyan Madiya. Iya rana am nipamozwawan na ni Yeso so apito a kalamsoyan ni Satan.

¹⁰ Iya am nimangay manci nya do mazabab so onowned a mina kararay ni Yeso.

¹¹ Mamizing da si Yeso a nimavyay rana a kapakamizing da pa si Madiya nimakacita rana sya am ji da nganoyngi.

Mapacita si Yeso do mina kararay na

¹² Mavitos o vazay ori am macitarek rana o pacittan na no kataotao na ni Yeso do rarwa ka mina kararay na a meypangay do ili da.

¹³ Ipanci da do karwan da macinanao ji Yeso am ji da pa nganoyngi.

Mapacita si Yeso do asa so ikakarwan a macinanao jya

¹⁴ Ney manowji na am mapacita si Yeso do koman a asa so ikakarwan a macinanao jya. Am nioya na sira, ta malma sira so nakenakem ji Ama ta do to a akmey vato so onowned a ji nganoyong do ciring da no tao a nimakacita sya a nimirwa a mavyay.

Tovoin na o macinanao jya meylimwang nya do aro a tao

¹⁵ Maniring si Yeso jira am, “Mangay kamo do peycyamahamahatawan na a meylimwang no Mapasaray a Ciriciring na ni Ama ta do to do tao do karawan.

¹⁶ O omanoyong jyaken a omya so kataktak do kataotao da am patazadangen ko sira. Am o ji manganoyong a tao am pasyain ko sira a pasingsingtan.

¹⁷ O manganoyong a tao am ipanta na sira ni Ama ta do to so oyowyat da mapeyvazay so mapeyzokab a vazay. No pangozayan da o ngaran ko am mavozwaw da o kalamsoyan ni Satan a kapeyzezyak da so macitarek a ciring.

¹⁸ Tana to da minani o tokza, omyop so makazazakat a kosozi am apya sira. No paoptahen da o lima da so meyngen a tao am todapya sira.”

Mangay rana si Yeso do teyngato

¹⁹ Teyka na ni Yeso o aro a ciring a ipanci jira am meycyakavat rana mangay do teyngato a omlisna do wanan na ni Ama ta do to,

²⁰ kangay da rana no nimacinanao ji Yeso a meylimwang no Mapasaray a Ciriciring na ni Ama ta do to do peycyeylilyan na. So ikanoyong ni Yeso a macikaop jira a manta nira so oyowyat da a mapeyvazay so mapeyzokab a vazay. Ori rana am yongkad no kanoyong no Mapasaray a Ciriciring na ni Ama ta do to a ipeylimwang da.]