Make 14 - Seysyo No Tao

Naknakmen da o kawakwak da si Yeso

¹ Kadwa araw pa kapamaring da so kanen a koman so ji nimimway a pang do Iyeci. Am o panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to am naknakmen da o ahahapan da si Yeso, do rakpan da sya do ikabo no tao a wakwaken.

² Maniring sira am, “Taosya o karakep ta sya do ipamaring so kanen, ta meyvonag sira o aro a tao.”

No kapaglo ni Madiya so mahangno a haneng do oo ni Yeso

³ Amyan si Yeso do Potani do vahay da da Simong a omlabyab so kolit no kakwa. Koman sira am mangai o asa ka mavakes so tagaw a kapnowan no masingat a mahangno a haneng. Karahan am aspin na o tagaw a kapaglo na sya do oo ni Yeso.

⁴ Macita da no maciwalam ji Yeso a tao am maoya sira so aktokto. Maniring rana sira am, “To na gagidan ori am ikongo peypeypangayan no akman sang.

⁵ Jingbeywani o yatey masingat a haneng ang. Apyapya rana o kapamalit nya so nizpi a ipanidong so ikasi a tao am.” Am ori o nioyyan da no mavakes ang.

⁶ Am maniring si Yeso am, “To nyo macipanadngi. Nyo kazyakan no yapiya vazay na jyaken.

⁷ Yamasangib sira o makasi a tao a yamacikaop jinyo. Jyasalit jinyo o kasidong nyo sira. Am yaken am ko jyasangib, ta yalikey rana o ipacikaop ko jinyo.

⁸ Am iya rana am na paminmindan rana ya no nakem na jyaken an, a yamapaglo do kataotao ko so yamahangno a haneng. Ta ori rana am yavat na ori do bobwan da jyaken.

⁹ To ko na macitangayan jinyo am no ipeylimwang o Mapasaray a Ciriciring na ni Ama ta do to do karawan eya am abo ji makalavat so mina vazay na jyaken no mavakes eya.”

Naknakmen na ni Yota o kapanazang na ni Yeso

¹⁰ O rarwa so ikakarwan a macinanao ji Yeso am amyan so asa ka tao a meyngaran so Yota a tao do Isecyadi. Iya rana am mangay ori do panipanirsirngen da no mapatanatanang so nakem da si Ama ta do to a manazang ni Yeso jira.

¹¹ Mamizing da o ciring ni Yota am masaray sira. Karahan am ninoon da o kapanta da nya so nizpi. Ori o nipacipinda na rana no sapan na so araraw a torwan na rana ni Yeso jira.

Tomalakanen sira so pamaringan da so kanen

¹² Omanam o kasaraw do ipamaring da so kanen a iyakan da so ji nimimway a pang am manwakwak sira so kagling. Maniring sira ji Yeso o macinanao jya am, “Do wanjin mo tovoyan jyamen a tomalakanen so pamaringan ta so kanen do Iyeci.”

¹³ Karahan am mapahanhan si Yeso so rarwa ka macinanao jya. Maniring jira am, “Angay kamo do ili. Si makasinmo kamo so asa ka mahakay a omoli rana no ranom da am macihza kamo jya.

¹⁴ No si somdep do asa ka vahay am somdep kamo do asdepan na. No si maniring kamo do mapeyvahay sya am, ‘Na ipanci no yamnanao jyamen am: Wanjin o vahay a kalovotan namen a yamamaring so kanen do Iyeci,’ kwan nyo an,

¹⁵ a kangay na ninyo do cinavat no vahay na nipingsanan na. So to nyo rana ngyani do dang a mapeykakasa so kanen ta.”

¹⁶ Mangay sira do ili o rarwa ka macinanao jya am todey mangononong o ciring na jira ni Yeso. Am ori o niyan da rana do dang a mapeykakasa so yaven da.

Pazimanen ni Yeso o keyyan no manazang nya

¹⁷ Maseyrem rana am malovot rana sira Yeso a kano rarwa so ikakarwan a macinanao jya.

¹⁸ Maniring si Yeso do ikalimot da koman am, “To ko na macitangayan jinyo am yamyan jinyo so yasa ka tao a yamacihanghang jyaten a yamanazang nyaken.”

¹⁹ Mamizing da ori am marahet sira so onowned o macinanao jya. Am ori o nikateyteyras da manangangay nya ji Yeso. Maniring sira am, “Yaken an?”

²⁰ Maniring si Yeso am, “O yasa ka tao jinyo do yararwa so ikakarwan o macizanod jyaken a tomahem so kanen na am iya ori.

²¹ O ciring rana do Seysyo am wakwaken da o Nipamnekan na ni Ama ta do to a tao. Am o manazang nya tao am to makasi. Apyapya rana kaji na nimatazakan a tao do karawan.”

Ney manowji rana pamaringan da so kanen ni Yeso a kano macinanao jya

²² Koman sira am ahapen na ni Yeso o pang a isaray na ji Ama ta do to a kakcikcil na sya a itoro do macinanao jya. Maniring am, “Kanen nyo ya, ta kataotao ko ya.”

²³ Karahan am ahapen na rana o kopo a yanan no potaw cyo a kasaray na nya ji Ama ta do to a katoro na rana nya do macinanao jya a keyyop da rana sya.

²⁴ Maniring si Yeso am, “Oya rana am rala ko a nimvoyog a omaing do aro a tao. O rala ko rana ya am yongkad nyo do avayo a pangozayan nyo a ciring na ni Ama ta do to a mapatastas so omanoyong jya tao.

²⁵ To ko na macitangayan jinyo am ji ko rana ngyop so potaw cyo mangay no marateng o araraw na no kapacikaop ko jinyo a omyop do teyngato, no si papwen na ni Ama ta do to o katalamozong na no vayo a karawan.”

²⁶ Teyka da o asa ka anwanood a sarayan da ni Ama ta do to a peyyanwanooden am mangay rana sira do tokon a meyngaran so Kanlan.

Pazimanen na ni Yeso ji Pite o kalalas na jya

²⁷ Maniring si Yeso jira am, “Mangay o kapacisyay nyo jyaken. Ta maniring do Seysyo am, ‘Wakwaken ko o mapamangan so kagling a tao a kapeyvwak da no kagling.’

²⁸ Am si mirwa ko a mavyay am manmanma ko a ka ninyo a mangay do Cyadidi.”

²⁹ Maniring si Pite am, “Tana peymakarwan da imo no tao am jyabo kakaro ko jimo a.”

³⁰ Maniring si Yeso ji Pite am, “To ko na macitangayan jimo am si ipidwa o manok a tomazokokok do ji na pa araw eya am mangay keypitlo mo a omalalas jyaken.”

³¹ Karahan am mavezkat si Pite a meyzezyak. Maniring am, “Ji ko macizanod jimo a mawakwak a. Jyabo kato ko ngalalasan jimo a.” So nikakman da sang so ciring no kadwan jira macinanao jya.

Inozi ni Yeso do Kesimani

³² Makaranes sira do meyngaran so Kesimani a peymowamowan da am maniring si Yeso do macinanao jya am, “To kamo ngyan jya, ta mangay ko pa meynozi.”

³³ Karahan am rarahen na si Pite a kani Yake a kani Yowani. So nyapo na rana dang no keyngen na rana so onowned.

³⁴ Maniring jira am, “Ko mazabab so onowned a toda jyawakwak. To kamo ngyan do jya. Am meytataziman kamo an.”

³⁵ Meyratateng am karwan na sira ni Yeso so kabneng no keytan so karairai a kapeyrorokma na a mapasyasi ji Ama ta do to. Maniring am, “No si apyahen mo am pakarwen mo o yatey rako a alalaw ko an.”

³⁶ Maniring pa am, “Mo Ama, yabo mo jya peyvazay. So pakarwan mo so alalaw eya an. Am ji mo na mangozai o nakenakem ko. Ta ahahapan mo na sya.”

³⁷ Meysinaoli a mangay jira am macita na o tatlo a ka macinanao jya makapya mitkeh. Maniring rana ji Pite am, “Mo Simong, ka mitkeh? Manngwa, ji nyo nahap o asa ka vatvatek a ji nyo ngitkehi?”

³⁸ Maniring pa jira am, “Meytataziman kamo a meynozi. Ta kalittan kamo an. Tana nyo apyahen do onowned nyo am nyo jyapakongo o nyo kapeynozi.”

³⁹ Akman sang a komaro jira mangay a meynozi. Am akman sang o ciring na ji Ama ta do to.

⁴⁰ Karahan am meysinaoli a mangay do macinanao jya. Am akman sang, ta mitkeh sira, ta tey makaha rana sira. Am ori o ji da makatenngi ji Yeso a pacisirsirngan.

⁴¹ Ipitlo si Yeso a mangay jira am maniring jira am, “Yakamo pa mitkeh? Cyana, manga ovay. Ta yarana makeykai o Nipamnekan na ni Ama ta do to a tao a ipanazang da do meyraraten a tao.

⁴² Kayokay kamo na, kangay tamo rana. Cita kamo o yamanazang nyaken a tao a yarana mai.”

Rakpen da si Yeso

⁴³ Ji pa vitos o ciring ni Yeso am mai rana si Yota a pacihzan da no meyhavit so takzes a kano sisipzot a tao. Sira ori am nitovoy da no panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to a kano kamanrarakehan.

⁴⁴ O manazang ni Yeso a tao am nipanci na rana jira o ahahapan na sya. Maniring si Yota jira am, “O rapongen ko a tao am iya ori. So rakpan nyo sya a kangay nyo na nya.”

⁴⁵ Kapakaranes na ni Yota am mangay na rapongen si Yeso a manci no, “Mo Mangnanao.”

⁴⁶ Karahan am rakpen da na si Yeso.

⁴⁷ O meytatanek do katangked da tao am amyan so asa ka tao a to baba so takzes na kangay na mapacipas so talinga no kalamsoyan no panirsirngen da no mapatanatanang so nakem da si Ama ta do to a kakas na no asa ka talinga na.

⁴⁸ Maniring si Yeso jira am, “Kamo mapalolo so takzes nyo a kano sisipzot nyo a yakomala jyaken? Nyo ipanci yaken a manakaw a tao?

⁴⁹ Ko mangday so araw a yamangnanao so tao do rako a panaralayan. Kamo masangib a yamacikaop jyaken am nyo ji rakpi jyaken. Am kangay na mangononong no ciring do Seysyo.”

⁵⁰ No kano nang am nimamimin sira o macinanao jya nikomaro jya a meyvwak.

⁵¹ Amyan so asa ka mowva tao a mapayob sya do kataotao na so zaping a nimacilolo ji Yeso. Naknakmen da o karakep da sya.

⁵² Am to na rana wasikan o ayob na zaping kapalalayo na rana mangay somazok.

Pacicin da si Yeso do peykeykaygyan da

⁵³ Yangay da si Yeso do vahay na no panirsirngen da no mapatanatanang so nakem da si Ama ta do to. O amyan rana do dang am panipanirsirngen da no mapatanatanang so nakem da si Ama ta do to a kano kamanrarakehan a kano mangnanao no iwawalam ni Ama ta do to.

⁵⁴ To na macyazizazawi si Yeso ni Pite a mangay do tezantehed no vahay no panirsirngen da no mapatanatanang so nakem da si Ama ta do to. Meyratateng am to rana macizavoz do mamzat a tao a omlisna macipanangdang jira.

⁵⁵ O panipanirsirngen no mapatanatanang so nakem da si Ama ta do to a kano aro a meykaygi a tao am meykala sira so tao a mangamaog so iraherahet da si Yeso a ciring a iwakwak da sya. Am ji sira makakala.

⁵⁶ Tana aro sira o tao a mangitao nya so malas a ciring a iraherahet da sya am ji meyyangangay o ipanci da.

⁵⁷ Karahan am tatasa ka tao jira o to rana meytatanek a mangamaog so malas a ciring a iraherahet da si Yeso. Maniring sira am,

⁵⁸ “Namen nimamizing ori a yanimanci no yana kakavakava so yanyamaog no lima no tao a rako a panaralayan. Si katlo araw am mapatnek so asa ka panaralayan a jya nyamaog no lima no tao.”

⁵⁹ Am tana akman rana sang a ciring a iraherahet da si Yeso am ji sira meyyangangay so ciriciring.

⁶⁰ Karahan am meytatanek o panirsirngen da no mapatanatanang so nakem da si Ama ta do to. Maniring ji Yeso am, “Manngwa, yamyan so ciring mo do da iraherahet jimo ang?”

⁶¹ Abo o asa ka ciring a nipanci na ni Yeso. Maniring pa ji Yeso o panirsirngen da no mapatanatanang so nakem da si Ama ta do to am, “Manngwa, manoyong ka ya Misayya a Anak ni Ama ta do to?”

⁶² Maniring si Yeso am, “Noon. Manoyong. Mamimin kamo a makacita so Nipamnekan na ni Ama ta do to a tao a omlisna do wanan na ni Ama ta do to a meygegcin do cinalab a mai do teyrahem.”

⁶³ Mamizing na no panirsirngen da no mapatanatanang so nakem da si Ama ta do to am to na rana misipisinga o talili na. Maniring am, “Tana abo rana tao a manci no karatan na am cyaha.

⁶⁴ Ta nyo na nimamizing o ciring na na iraherahet si Ama ta do to. Pancyan kamo pala, kongwen takamo ya.” Mamimin sira manci no kawakwak sya.

⁶⁵ O tatasa jira am cicippan da si Yeso a kabengbeng da so mata na a bakbakan. Maniring sira ji Yeso am, “Pancyan pala. Sino yanimbakbak jimo ang.” O tatasa ka mamzat a tao am siplangen da si Yeso.

Alalasan ni Pite si Yeso

⁶⁶ Amyan pa si Pite do pantaw no vahay no panirsirngen da no mapatanatanang so nakem da si Ama ta do to am amyan so lamlamsoy da a mavakes a mai.

⁶⁷ Macita na si Pite a manangdang am to na ningkaji. Maniring ji Pite am, “Imo asyo o kararay na no tao do Nasale a si Yeso?”

⁶⁸ Maniring si Pite am, “Ko jyasingkaji o yamo ipanci a tao ang.” Teyka na o ciring na am meyparai jira.

⁶⁹ Makarahan am macita na pa si Pite no mavakes ang. Maniring do meytatanek do katangked da tao am, “Iya rana ito am yamacinanao jya ori.”

⁷⁰ Mamizing ni Pite am alalasan na. Makarahan am o meytatanek do siri da tao am maniring sira ji Pite am, “Ji mo naywa o mo kapacikaop jira. Ta imo rana am tao ka do Cyadidi.”

⁷¹ Maniring si Pite am, “Tana to ko mangavay am ko jyatenngi o tao a nyo ipanci ang. No yamalas o ciring ko am cyaha, ta yamyan si Ama ta do to a mapasingesinget jyaken.”

⁷² Teyka na ori a ciring am ipirwa na so katazokokok no manok. Karahan am manakem na rana ni Pite o mina ciring ni Yeso do keypitlo na omalalas jya no keypidwa na tomazokokok o manok. Ji na pariparing o onowned na am to rana zezezeng a omlavi.