Make 12 - Seysyo No Tao

Pehngehngayan na so ciring na do marahet so nakem a tao a nimvood so nihakawan

¹ Nanawen na sira ni Yeso am mangononong so pehngehngayan na so ciring na. Maniring am, “Amyan so asa ka tao a nimeymowa so asa lan a potaw. Makarahan am zazacitan na o livolivon na a kapamaring na so pangatesan na so potaw a kapatnek na so tagakal a panitan na so manakaw a tao. Mateyka na am itoro na do tao a vooden da peymowan a kangay na rana do marai a ili.

² Marateng rana o araraw na no ikazako no asi no kayo am manovoy so asa ka lamlamsoy na mangay mahap so akma ney vonong.

³ Macita da no nimvood so nihakawan na tao o lamlamsoy na am vitkehen da o zagaw na a kabakbak da jya. So nikabo no nimahap na a meysinaoli do nitomovoy sya tao.

⁴ Makarahan am manovoy pa o mapeymowamowa sya so asa ka lamlamsoy na mangay. Mangay ori am cikcikan da a peyleylaken.

⁵ Makarahan am manovoy pa so asa ka lamlamsoy na mangay. Mangay ori am zakaten da. So nikamimin da no nitovoy na tao a nibakbakan da a kapakakasi da so karwan da a wakwaken.

⁶ Ney manowji na am to na rana novoya o ney kaglaw na anak a mangay a macisirsiring do nimvood so nihakawan na, ta manakenakem o mapeymowamowa sya am, ‘Jyabo kaji dasnekan no minapodpod jyaken a.’

⁷ Meysirisiring rana sira o nimvood so hakawan na tao am maniring rana sira am, ‘Iya ya o yaomamoon so nihakawan na. To ta na wakwaka kamoon ta so nihakawan na.’

⁸ Karahan am rakpen da o anak na a kawakwak da sya, kawasik da nya do asked no nihakawan da.”

⁹ Maniring rana si Yeso am, “Meypeypanngonngo paro o meyngongyod a mapeymowamowa sya tao. Jyabo kavyay na sira so nimvood so nihakawan na tao a ji na ngaolya jira o peymowamowan na, katoro na nya vooden da no matarek a tao a.

¹⁰ Nyo pa jyatenngi o akman sya ciring do Seysyo? ‘O Vato a niwalit da no mapakapya so vahay am yarana meyvoga a ney makdeng na aslet no ai no vahay.

¹¹ So ikanoyong no vazay ni Ama ta do to a mapeyzokab.’ ”

¹² Makazazap da no panipanirsirngen no tao do Yotay o pakacirngen na jira. Am ori o naknakman da si Yeso a rakpen. Am kanyahey da no aro a tao. Ori o to da rana angai.

Tomoro ji Kaysa so deyking

¹³ O tatasa ka tao a macyagom do Vadisay a kano macikagom ji Helote a tao am nipahanhan da sira mangay ji Yeso. Naknakmen da o kapeykala da so malas a ciring na ipatwaw da so kalasan na.

¹⁴ Maniring sira ji Yeso am, “Mo Mangnanao, namen katenngan imo a yaji mangalalas a tao. Namen katenngan imo a yamapeyyangangay so tao a nanawen, do mo kapeylimwang no ciriciring na ni Ama ta do to. Am pancyan pala jyamen. Manngwa, apya do iwawalam ta o katoro ta do panirsirngen no Loma si Kaysa an? Manngwa, tomoro namen an? No ji namen noro.”

¹⁵ To na rana tenngi ni Yeso o keyleylamdam da sya. Maniring jira am, “Ikongo nyo ileylamdaman jyaken. Inya kamo pala so asa ka nizpi. Ta citahen ko.”

¹⁶ Karahan am ipanta da so asa ka nizpi. Maniring si Yeso jira am, “Sino o asyasing a kano ngaran a yadomket do nizpi eya.” Maniring sira am, “Si Kaysa.”

¹⁷ Maniring si Yeso am, “No komwan am o monganay ji Kaysa am itoro nyo jya. Akman sang ta o monganay ji Ama ta do to am itoro nyo ji Ama ta do to.” Mamizing da o ciring ni Yeso am isavasavak da.

Nanao na ni Yeso so keypirwa na pa mavyay no nimawakwak rana tao

¹⁸ O tao a macyagom do Satokay a ji nganoyong do kavyay pa no nimawakwak a tao am mangay sira ji Yeso.

¹⁹ Maniring sira am, “Mo Mangnanao, o nanao ni Moyse am no mawakwak o tao a kabo no anak na am pasakain no kakteh na o mavakes na a keyyan no komownongan no kakteh na rakeh do karawan.

²⁰ No kakwa am amyan so papito a meyketeketeh. Mapapapen o rakeh jira am abo taodtod na no kawakwak na.

²¹ Karahan am papenen no tomonton jira. Mawakwak ori am akman sang a abo so taodtod. O ikatlo da am akman sang,

²² a kato da twatontonan a meyketeketeh a mapapapen so mina mavakes no rakeh jira. Am abo taodtod da. Mownay am mawakwak rana o mavakes ang.

²³ Manngwa, no marateng o araraw no ikeypirwa mavyay no tao am sino jira ang o manoyong a mapeykahanghangan so sang. Ta nimamimin sira o papito a meyketeketeh ori a nimapasakay sya.”

²⁴ Maniring si Yeso jira am, “Kamo tey malas an. Ta nyo jyatenngi o Seysyo. Nyo jyatenngi o oyowyat ni Ama ta do to.

²⁵ No si mirwa a mavyay o tao a apo do heseb da am akman sira so tinsi do teyngato a ji macivahavahay.

²⁶ O vazay rana ano mirwa a mavyay o nimawakwak a tao am manngwa, nyo jya nivilangan o vakong ni Moyse do jyasleb a kayo? Maniring ji Moyse si Ama ta do to am, ‘Yaken rana am Tao do to na yaken ni Apolahan a kani Isa kani Yakebo.’

²⁷ O peypeypangayan no nang am Tao do to da si Ama ta do to no mavyay a tao a omanoyong jya. Ta o tao rana do tangain ni Ama ta do to am mamimin a mavyay sira. So yanyo ikanoyong a yamalas a manci no kaji da mirwan a mavyay no nimawakwak rana tao.”

Ney makdeng na nanao na

²⁸ Mamizing na no asa ka mangnanao no iwawalam ni Ama ta do to a tao o ciring da am isaray na o nitovis ni Yeso do tao a macyagom do Satokay. Am ori o nyangay na mapacici si Yeso. Maniring am, “Ikongo ney makdeng na do nanao ni Ama ta do to.”

²⁹ Maniring si Yeso am, “O ney makdeng na am, ‘Inyo rana Isedi a tao am amizngen nyo. O Panirsirngen ta Tao do to ta am yabo ikararwa na a Panirsirngen ta.

³⁰ O onowned mo a kano pahad mo a kano nakenakem mo a kano oyowyat mo am to mo peykasa a omraralay ni Ama ta do to a Tao do to mo.’

³¹ Ikadwa na am, ‘Ikarilaw mo o icyatatao mo. So to mo peyyangai so aryarilaw mo so kataotao mo a marilaw no icyatatao mo.’ So ikabo na rana no makataha so sya so kakdekdeng.”

³² Maniring ji Yeso o mangnanao no iwawalam ni Ama ta do to a tao am, “Mo Mangnanao, yabo mo kalasan. So na ikanoyong no ciring mo, do yana kasa ka tao ni Ama ta do to a yabo so ikararwa.

³³ So raralayan ta ni Ama ta do to no onowned ta kano nakenakem ta kano oyowyat ta, a kato peyyangayan so aryarilaw so kataotao a marilaw no icyatatao. So ikakdekdeng no nya kano nakem ta sya vinyay a kano makakaday a patanangen ji Ama ta do to.”

³⁴ Meylamdam na ni Yeso o tao ori a mateneng a mapasapa jya am maniring jya si Yeso am, “Ka na makeykai a macikaop do italamozong na ni Ama ta do to.” Nimacipinda no kanang o kabo rana no makadket ji Yeso a pacicin.

Sivovoong na ni Tawey o Misayya

³⁵ Mangnanao si Yeso do rako a panaralayan am mapacici no asa ka ciring. Maniring am, “Ikongo da pancyan no mangnanao no iwawalam ni Ama ta do to so kapeysivovoong na so Misayya ni Tawey.

³⁶ Oyatan no Seyzi si Tawey am maniring am, ‘Yamaniring si Ama ta do to do Panirsirngen ko am: Amlisna ka do wanan ko mangay si balinasen ko sira o macioya jimo a tao.’

³⁷ Abneken na ni Tawey a Panirsirngen na o Misayya. Am ikongo peysivovoongan na syaha.” So ikatey yaro no tao a masaray a omamizing so ciring ni Yeso.

Marahet a iyangay da no mangnanao no iwawalam ni Ama ta do to

³⁸ Maniring pa si Yeso do nanawan na sira am, “Azimanen nyo sira o mangnanao no iwawalam ni Ama ta do to a tao. Sira rana am da ikakza o da kapeyyayob so pipya ayob a yamangonong do rarahan. Ikakza da o kararalay da nira no tao do karwarwan no tao.

³⁹ No mangay sira do peyneynozyan a kado pamarmarngan so kanen am ikakza da o kalisna da do pamanongan na.

⁴⁰ Littan da sira o vao a mavakes ahapen so iheyhakaw a kato da ngidan so inozi da. Mangay o kapeydedna na jira no makdeng a ipasingsingkad na sira ni Ama ta do to.”

Kingking no vao a mavakes

⁴¹ Amlisna si Yeso do rako a panaralayan a tomita so aro a meykingking a tao a mapangay so kingking da do kavangan. Aro sira o meynizpi a tao a komozong so aro a kingking da.

⁴² Karahan am amyan so asa ka vao a mavakes a mangay mapangay so adwa ka nizpi.

⁴³ Karahan am lovoten ni Yeso o macinanao jya. Maniring jira am, “To ko na macitangayan jinyo am yarwaro pa o na nipangay a kingking na no vao a kano aro a tao.

⁴⁴ O karwan no tao am da ipeykingking o hepan da. Am tana yamavak o velek no vao ori am na to mimina o na ipangakaday a nizpi na yaipeykingking.”