Make 11 - Seysyo No Tao

Azwazwain da si Yeso a meypangay do Yelosaleng

¹ Masngen rana sira do Yelosaleng am mangay sira do tokon a meyngaran so Kanlan. O tokon rana am masngen ori do Peyvake a kado Potani a ili. Karahan am manovoy si Yeso so rarwa ka macinanao jya manma mangay.

² Maniring si Yeso jira am, “Angay kamo do ili. Si mangay kamo am amyan dang so asa ka baka ji pa nikaoranan no tao a makedked do dang. Si macita nyo am ovain nyo a kai nyo nya jya.

³ No si amyan so tao a manci no, ‘Nyo kongwen ori.’ Si maniring kamo jya am, ‘Yamyan so na patakan nya no Panirsirngen. Cyaha, ta makeykai na paolin jimo.’ ”

⁴ Makaranes sira am macita da do siri no rarahan o makedked a likta baka, kaovay da sya.

⁵ Maniring sira o tao a meytatanek do dang am, “Ikongo nyo ovayan so likta baka ang.”

⁶ Karahan am to da mangozai o ciring ni Yeso a itovis da jira. Am ori o nipyan da sira omovay sya.

⁷ Meyratateng am yangay da ji Yeso o likta baka a kaparasay da so ayob da do baka, a kaoran na rana ni Yeso do baka.

⁸ Aro o tao a tomeytay so ayob da do rarahan. Aro o nimanyangaw so yangaw no kayo a teytain da do rarahan.

⁹ Maniring sira o macihza jya tao am, “Azwazwain ta si Ama ta do to. Inaoy si ipanlanlag ni Ama ta do to o na nitovoy a tao.

¹⁰ Inaoy si ipanlanlag na ni Ama ta do to o yamakaranes a meypanirsirngen a macipalit do ineynapo ta si Tawey. Inaoy si mangay ji Ama ta do to o azwazway na.”

¹¹ Makaranes si Yeso do Yelosaleng am mangay do rako a panaralayan a tomita so makakaday a amyan do dang. Ikongo do mahep rana, am ori o nikarwan da rana do dang ni Yeso a kano macinanao jya mangay do Potani.

Nipanircirngan ni Yeso o kayo a meyngaran so ovako

¹² Ikadwa na araw am karwan da na o Potani a kapeysinaoli da rana do Yelosaleng. Amyan sira do rarahan am makcin si Yeso.

¹³ Macita na do anamen da angayan o meyngaran so ovako a kayo a mapka no voong na. Mangay do kayo a meykala so asi na am voong na o macita na. Ta beken pa vehavehan no ipalasi na.

¹⁴ Maniring do kayo si Yeso am, “Ko imo sirsirngen am macipinda sicyaraw eya o kabo rana no tao a koman so asi mo.” So nikamimin da no macinanao jya nimakamizing so ciring na.

Nipangzan ni Yeso o rako a panaralayan

¹⁵ Makaranes sira do Yelosaleng am mangay si Yeso do rako a panaralayan a mapowbot so manazang no makakaday a apzapzatan da a kapasakeb na sya ibokbok so peypalipalitan da so nizpi a kavangan a kano lilisnan da no manazang no hato a tao.

¹⁶ So ji na nimyai so tao do pantaw no rako a panaralayan a somdep no makakaday a warawara da ipanazang da do reryan no rako a panaralayan.

¹⁷ Maniring jira si Yeso am, “O domket do Seysyo a ciring na ni Ama ta do to am, ‘O raralayan nyo nyaken a vahay am peyneynozyan ori no aro a tao.’ Am nyo to peyvaliw a da peyvahayan no manakaw a tao.”

¹⁸ Mamizing da o ciring na no panipanirsirngen no mapatanatanang so nakem da si Ama ta do to a kano mangnanao no iwawalam ni Ama ta do to am naknakmen da o kawakwak da si Yeso. Am ikanyahey da si Yeso, ta tey yaro o tao a omanod do ciring na.

¹⁹ Maseyrem rana am karwan da o ili ang ni Yeso a kano macinanao jya.

Kapeyhanhan ni Ama ta do to

²⁰ Ikadwa na araw do apnezak am mangonong pa si Yeso a kano macinanao jya do rarahan ang. Karahan am macita da o ovako a kayo to rana hayo so voong a maoto.

²¹ So pakanakman na ni Pite so mina vazay na ni Yeso do kayo ang. Maniring ji Yeso am, “Mo Mangnanao, cita pala o kayo a nipanircirngan mo a yarana todaoto.”

²² Maniring jira si Yeso am, “To ko na macitangayan jinyo am no manoyong kamo a meyhanhan ni Ama ta do to am

²³ apya kapanci nyo no tokon a meylis a mangay do awa. No manoyong kamo a ji meykarwa so nakem ji Ama ta do to a omanoyong do ciring na am manoyong keyyan no akman sang a vazay nyo.

²⁴ Am ori o ko pancyan nya jinyo. No meynozi kamo a keyyan no amin nyo am anoyngan nyo o kapakahap nyo so sang. So ikabo no ji na norwan jinyo a amin nyo.

²⁵ No meytatanek kamo a meynozi am manmanma o kato nyongbowan so oyaoyyan nyo no maoya ninyo a tao. Ta ori o vonasan na ni Ama ta do to so raraten nyo.

²⁶ [No ji nyo peykabobwa o oyaoyyan nyo no icyatatao nyo am akman sang si Ama ta do to a ji vonas so raraten nyo.]”

Ikazyak da o nikapwan no oyowyat na ni Yeso

²⁷ Mirwa sira mangay do Yelosaleng. Omalam si Yeso do reryan no rako a panaralayan am mai sira o panipanirsirngen da no mapatanatanang so nakem da si Ama ta do to a kano mangnanao no iwawalam ni Ama ta do to a kano panipanirsirngen da.

²⁸ Maniring sira ji Yeso am, “Asyo oyowyat mo a yamapeyvazay so aro a vazay ang. Sino o yanitomoro no oyowyat jimo a yamapeyvazay so aro a vazay ang.”

²⁹ Maniring si Yeso am, “Pacicin ko pala inyo no asa ka ciring. No si tovisan nyo yaken am ori o pancyan ko no na nikapwan no oyowyat ko a yamapeyvazay so aro a vazay.

³⁰ Pancyan kamo pala jyaken o yana nikapwan no oyowyat ni Yowani a nimanaktak so tao. Yapo ji Ama ta do to oyowyat ori an? No yapo do tao.”

³¹ Karahan am meykalakalavaten rana sira. Maniring sira am, “Kongwen tamo ori a tovisan. No si ipanci ta o kapo na ji Ama ta do to am ji na panenesha yaten ni Yeso a ji nganoyong ji Yowani a.

³² No si kwan ta o kapo na do tao am jyabo kaji da oyyan nyaten no aro a tao, do da kanoyong ji Yowani a panoyonoywan na so ciring ni Ama ta do to a.”

³³ Meyratateng am maniring sira ji Yeso am, “Namen jyatenngi.” Maniring si Yeso jira am, “No komwan am ji ko mancyan jinyo o na nikapwan no oyowyat ko a yamapeyvazay so aro a vazay.”