Loma 9 - Seysyo No Tao

Si Ama ta do to a kano nipamnekan na Isedi a tao

¹ Sicyaikwa rana ya am yamanoyong ko ipanci jinyo. Ji ko palasa o ciring ko, ta ko macikaop ji Kizisto. Yako katenngan o ko ipanci, ta o Seyzi am ori o tomalamozong no onowned ko.

² Ko to naknakma sira o kasina no inawan ko a Isedi a tao a yapa ji nganoyong ji Yeso Kizisto. So yako ikarahet no aktokto a yameyngen so onowned.

³ Tana mazavat rana o karilawan na nyaken ni Kizisto do kahap na sira ni Ama ta do to so kasina ko no inawan am apyahen ko o akman sang.

⁴ Sira rana Isedi a tao am nipamnekan na ni Ama ta do to a akma ney anak do karawan. So yada rana nipakacita so azwazway na ni Ama ta do to. Sira o nitorwan na no pangozayan da ciring a kano iwawalam na. So da pakatenngan rana do da kararalay ni Ama ta do to. So da rana nipakahap so nakem na jira ni Ama ta do to.

⁵ Sira rana am sivosivovoong da sira no katenngan a ineynapo namen no kakwa. So ipacitetngehan na jira ni Kizisto. Am si Kizisto rana am makarakarang pa kano meycyamadadayan. So ikanoyong na paingan ta so ciring a Tao do to. Amin.

⁶ Beken a ko ipanci o kabo na rana no peypeypangayan no mina ciring na ni Ama ta do to jira, do da kaji nganoyngan ji Yeso Kizisto. Ta beken a todamimin sira o sivosivovoong ni Isedi a meyngongyod a Isedi a tao a italamozong na ni Ama ta do to.

⁷ O sivosivovoong na ni Apolahan am beken a todamimin sira akma ney anak ni Ama ta do to. Ta o mina ciring na ni Ama ta do to ji Apolahan am, “O nimapodpod ji Isa am ori o manoyong a sivosivovoong mo.”

⁸ O peypeypangayan no ciring na am beken a mamimin o nimapodpod ji Apolahan a abneken na anak ni Ama ta do to. Ta o meyhanhan nya a mangononong do ciring na am ori o meyngongyod a abneken na anak.

⁹ Ta o ciring na ni Ama ta do to ji Apolahan am, “No marateng o araraw na am mai ko an. So ipeytaodtod na ni Salay so asa ka mahakay.”

¹⁰ Akman sang, ta o rarwa ka anak na ni Leypeycya am asa o ama da. Iya rana am si Isa.

^11-12 Am ikongo do nipamnekan na o asa ka anak na, am ori o nipacisirsiring na ni Ama ta do to ji Leypeycya. Maniring am, “Allamen na no rakrakeh o ananak.” Am no kapacisirsiring na jya am abo pa dang o marahet a kano apya a vazay. Ta ji sira pa nimalikey o meyketeh ang. Am ori o ikanoyong na ni Ama ta do to a mangozay do nakenakem na. So ji na monganai do kapyapya no icicirawat no tao o pamnekan na ni Ama ta do to.

¹³ Akman so ciring na do Seysyo. Ta maniring am, “Yamahamahama pa o aryarilaw ko si Yakebo a kani Isaw.”

¹⁴ Am manngwa, apya o kapanci ta ni Ama ta do to a mapeykakaban so tao? Jyabo kapya no nang a.

¹⁵ Ta maniring si Ama ta do to ji Moyse am, “O ikarilaw ko am to ko arilawan. O ikasi ko am to ko asyan.”

¹⁶ O makahap so pangangasyan na ni Ama ta do to am ji monganai do nakenakem a kano vazay no tao, ta monganay do pangangarilawan na ni Ama ta do to.

¹⁷ Maniring si Ama ta do to ji Valaw a domket do Seysyo am, “Ko imo pamnekan a panirsirngen. Mangay ko peydednahen jimo o peyoyaoyyan ko a kapakateneng da jya no tao so oyowyat ko a kapeylimwang na rana no ngaran ko do peycyamahamahatawan na.”

¹⁸ Am ori an, ta o ikarilaw na am to na mangozai ni Ama ta do to o nakenakem na. O pasaliten na so onowned am todasalit so onowned.

Peyoyaoyyan na ni Ama ta do to a kano pangangasyan na

¹⁹ Ala amyan so tao a manci nya jyaken so, “No akman sang am ikongo oyyan na nyaken ni Ama ta do to do peyraratenan ko. Ta abo mapasobna do nakenakem na.”

²⁰ Am sinosino ka a to makadket ji Ama ta do to a yapasobnan. Kadketan no tana kapanci na nya do meytanatana tao so, “Mo akmanan jyaken so sya so kamamaogan.”

²¹ Manngwa, abo o nakenakem na no meytanatana tao a mapeykataretarek so amamaogen na? Jyabo kaji na makamaogan no tao no asa memeh a tana so adwa meytarek so kapyapya a.

²² Akman sang o vazay na ni Ama ta do to. Ta nipacita na o peyoyaoyyan na kano oyowyat na. Am na kato anketkenan do nakenakem na yamwoya no tao do da peyraratenan.

²³ Am na kapacita nya jyaten so rako a pangangasyan na. Ta yaten rana ya am nipamnekan na yaten a macikazway jya no makwa.

²⁴ So yata ikanoyong a na nipamnekan do tao do Yotay a kado beken a tao do Yotay.

²⁵ Akman so ciring na ji Hesiya. Ta maniring am, “Sira rana jya nimeycicinda ananak ko am ipanci ko na sira anak ko. Sira rana ji ko aktoktwan a ikarilaw am ikarilaw ko na sira.”

²⁶ “Nipanci ko na jira no kakwa pa o kaji ko mapeyyanakan sira. Am ko na abneken sira sicyaikwaya anak ko, ta yaken rana am to ko meyyonong a mavyay a Tao do to.”

²⁷ O nipanci na pa ni Isayya do Isedi a tao am, “Tana akmey anay do pasalan sira so karwaro o Isedi a tao am apereh jira o ahapen na ni Ama ta do to.

²⁸ Ta yana makeykai o Panirsirngen ta a mapeykapyapinpin so tao do karawan.”

²⁹ Akman so ciring na pa ni Isayya. Ta maniring am, “No na jya nipamezed yaten ni Ama ta do to so sivosivovoong ta am jyabo kaji ta nimakmanan so tao do Sotoma kado Hamola a nimamimin a nimawakwak a.”

Taosyahen da no Isedi a tao si Yeso Kizisto

³⁰ O makdeng do jya am sira rana beken a tao do Yotay a yaji meyhanhan no apya icicirawat da am yana sira nivonas so raraten. Na abneken rana sira apya do tangain na do yada kapeyhanhan nya.

³¹ Am sira rana tao do Yotay a yamangozay do iwawalam na ni Moyse am jyabo da kapakahap so aryarilaw na sira ni Ama ta do to a.

³² O da ikakman sang am yada ji meyhanhanan si Yeso Kizisto. Ta yada ipeyhanhan o da kapya no icicirawat. Am si Yeso Kizisto am akmey veysen a cikadan no tao, ta ji da meyhanhanan.

³³ Akman so ciring do Seysyo. Ta maniring am, “Citahen nyo, ta yako mapangay so yasa ka veysen do yasa ka ili a meyngaran so Sian. O veysen rana ori am cikadan da no tao. Am o meyhanhan nya tao am amyan so nakem na jira ni Ama ta do to.”