Loma 8 - Seysyo No Tao

Italamozong no Seyzi a tao

¹ O pacikaopan ni Kizisto a tao sicyaikwaya am ji na rana meydednai no peyoyaoyyan na ni Ama ta do to a mangay no makwa.

² Ta o Seyzi am ori o yamapanop jyaten ji Yeso Kizisto. So ta ikanoyong rana yakmey nikowvayan so raraten a kano ji na rana meydednai no peyoyaoyyan na ni Ama ta do to.

³ O iwawalam na ni Moyse am ji na sidong yaten a komaro do peyraratenan ta. Ta cinatao ta o kapeyraraten ta. Am si Ama ta do to am ori o yanisomidong jyaten. Na nitovoy o Anak na a yamacingay so keyteytawan do tao do karawan a yanimawakwak no raraten ta. So ji na rana nalamozongi nyaten no raraten.

⁴ O nikakman na sang ni Ama ta do to am na ikarilaw yaten a ji makataptap so iwawalam ni Moyse. Am ori o na nitovoyan so Seyzi a omoyat jyaten a omonot do isaray na ni Ama ta do to a vazay, a ji rana meyraratenan.

⁵ Ta o to mangozay do malas a onowned a tao am italamozong no onowned na. Omonot do Seyzi a tao am italamozong na ni Ama ta do to.

⁶ O italamozong no adan na onowned a tao am mangay do kararatan. O italamozong no Seyzi am mahap da o ikapiya no onowned da kano to meyyonong a ikavyay no pahad da.

⁷ O to mangozay do malas a onowned na tao am akma ney kavosoyan si Ama ta do to. Ta ji na ngonoci o iwawalam na ni Ama ta do to.

⁸ O to mangozay do malas a onowned na tao am ji nakzan o akman sang ni Ama ta do to.

⁹ No si italamozong na inyo no Seyzi am manoyong o kaji nyo na mangozayan do adan a onowned nyo. Ta o vazay no Seyzi o pangozayan nyo. O kabwan no Seyzi na ni Yeso Kizisto am ji macikaop ji Kizisto.

¹⁰ Am no si myan jinyo si Kizisto am tana mawakwak o kataotao nyo am mavyay o pahad nyo, ta yana rana nivonas o raraten nyo ni Ama ta do to. Am ori o na abnekan jinyo abo rana so raraten do tangain na.

¹¹ No si myan jinyo o Seyzi na ni Ama ta do to a niomvyay si Yeso Kizisto am akman kamo sang a ipirwa na avyain ni Ama ta do to, do kowyat na jinyo no Seyzi na ni Ama ta do to.

¹² Am ori an, manga kakteh o ji ta to mangozai do adan ta onowned an.

¹³ Ta no si to nyo mangozai o adan a onowned nyo am jyabo kaji nyo angayan do kararatan a. Am no si onotan nyo o Seyzi a komaro do raraten nyo am jyabo kaji nyo avyayan do teyngato a.

¹⁴ O ipeypalanginan na no Seyzi a tao am mamimin sira akma ney anak ni Ama ta do to.

¹⁵ Ta o itoro na ni Ama ta do to a Seyzi am beken a mapeylamlamsoy jinyo a omanyanyahey jinyo, ta peyvaliwen na inyo a akma ney anak ni Ama ta do to. So oyatan na jyaten no Seyzi a tomawag ji Ama ta do to a manci no, “Mo Ama.”

¹⁶ O Seyzi do onowned ta am ori o ipakateneng ta do mina kapeyvaliw na jyaten a akma ney anak ni Ama ta do to.

¹⁷ No manoyong o kakma tey anak ni Ama ta do to am manoyong keyyan no itoro na jyaten no makwa. So ikakman ta sang a macikasaray do Anak na si Yeso Kizisto. Ta yaten rana am no macyanod ta do alalaw na ni Kizisto am macikazway ta do azwazway na.

Azwazway no makwa

¹⁸ Ko naknakmen o alalaw ta sicyaikwaya am jyabo kapakataha na so yaomanam a azwazway ta no makwa.

¹⁹ O yamakakaday a na nyamamaog ni Ama ta do to am yada toda ji nalla o araraw no ipeytotwaw no azwazway na do omanoyong jya tao.

^20-21 Ta o yameykamadadayan a nyamamaog na ni Ama ta do to am nimablis o nyamaogan na sira do kanimacizanod da ji Adam a nioyyan na ni Ama ta do to. Am beken a monganay do nyamamaog na o akman sang, ta monganay ji Ama ta do to. Am tana akman sang am amyan so kasa araw a isaliway da no nyamamaog na. So ikanoyong da rana macikasaray do omanoyong ji Ama ta do to a tao a ji rana babalinas.

²² Yata katenngan sicyaikwaya o yamakakaday a yana nyamamaog ni Ama ta do to a yamyan so alalaw, akman so amyan do vahay a mavakes so zikzikna.

²³ Beken a o nyamamaog na o akman sang. Ta yaten rana ya na yanan no Seyzi a tao a yongkad na no kapanta na nyaten ni Ama ta do to so to meyyonong a ikavyay no pahad ta am akman ta sang do onowned ta a macizizikna jya, a omapanala si Ama ta do to a mapanop jyaten a anak na a manta nyaten so ji rana wakwak a kataotao ta do teyngato.

²⁴ O na patazadangan jyaten ni Ama ta do to am ta toda ji ngamoga a yamahap o yana itoro ni Ama ta do to. Am no to na cita o akman sang am ji mancyan ori a yatoda ji ngamoga a mahap a itoro na ni Ama ta do to.

²⁵ Am no ipeyhanhan ta o yaji macimatai am manoyong kaji ta maciziziknan a omnanala sya.

²⁶ Akman sang, ta no myan so alalaw ta am na sidongen yaten no Seyzi. No ji ta teneng a mapasyasi ji Ama ta do to am na rana to mapasyasyan nyaten no Seyzi no ji ta tenngi a patwawen a ciring.

²⁷ Si Ama ta do to o yamakateneng do onowned ta. Katenngan na o nakenakem no Seyzi. Ta o Seyzi am na to mangozai o nakenakem na ni Ama ta do to a yameynozi nyaten a yamanoyong a italamozong na tao.

²⁸ Tamo katenngan na kasidong ni Ama ta do to so yamraralay nya a tao a nipamnekan na mangozay do nakenakem na a tao. So na ikamimin no vazay da na ipeypalanginan ni Ama ta do to. So ikanoyong da meypapya nya.

²⁹ Ta o nipamnekan na ni Ama ta do to a amraralay nya tao am to na ji ngamoga sira akman so Anak na si Yeso Kizisto apiya so ahahapan sya. So ikanoyong na ni Yeso a akmey rakeh na jyaten akmey meyketeketeh do cinai.

³⁰ Ta o tao a nipamnekan na ni Ama ta do to a amraralay nya am nipanop na sira a omanoyong jya, kabnek na sira abo so raraten do tangain na. So ikanoyong da macikazway jya do teyngato no makwa.

Ipacita na ni Yeso o pangangarilawan na ni Ama ta do to

³¹ No yakman sang am ikongo ipanci ta. No si sidongen na yaten ni Ama ta do to am abo makaharag jyaten.

³² Kakwakwan no Anak na yana ji ingbeywani a yana nitoro a mawakwak nyaten. Ney manngo rana o yamakakaday a kakzeben ta no nakem. Ta jyabo o na ingbeywan jyaten a.

³³ Sino o amraherahet jyaten a nipamnekan na ni Ama ta do to. Ta yaten rana am na rana nibnek yaten a abo so raraten do tangain na.

³⁴ Am sino paro o yamanci no kaoya na nyaten ni Ama ta do to no makwa. Jyabo asa ka tao a. Ta si Yeso Kizisto rana nimawakwak a kapirwa na mavyay am yamyan rana do wanan na ni Ama ta do to a yameyneynozi nyaten.

³⁵ Ikongo o makapasyay jyaten do pangangarilawan ni Yeso Kizisto. Manngwa, alalaw ta? Manngwa, peyrarehtan da jyaten? Manngwa, kakcinan ta? Manngwa, kabo no peymeymasaodan ta? Manngwa, kangineynanawan ta? Manngwa, wakwakan da jyaten? Jyabo a. Ta yabo o makapasyay jyaten do pangangarilawan ni Ama ta do to.

³⁶ O aro a alalaw ta am akman so yadomket do Seysyo. Ta maniring am, “Anoyngan namen imo. Am ori o yanamen ipangday so araraw a yatoda jyangay so inawan. Yada yamen patpehen no tao do kagling a yaomanam a yada wakwaken.”

³⁷ Am cyaha, ta no si ipeyhanhan ta si Yeso Kizisto a yamarilaw nyaten am jyabo kaji ta makaharagan so yamakakaday a alalaw ta a.

^38-39 Ta yako anoyngan o kabo no makapasyay jyaten do pangangarilawan ni Ama ta do to. Tana mavyay ta, tana mawakwak ta am to meyyonong o karilawan na nyaten ni Ama ta do to. Tana tinsi a tana kalamsoyan ni Satan am abo o makapasyay jyaten ji Ama ta do to a marilaw nyaten. So ikabo no oyowyat do sinokob no hanit a makapasyay jyaten do aryarilaw na jyaten ni Ama ta do to. Tana sicyaikwaya, tana no makwa am abo do karawan o amyan so oyowyat a mapasyay jyaten do pangangarilawan na ni Ama ta do to a yarana macikaop ji Yeso Kizisto a Panirsirngen ta.