Loma 7 - Seysyo No Tao

Peypeypangayan no kaji na rana nalamozongan nyaten no iwawalam na ni Moyse

¹ Nyo jyatenngi, manga kakteh, o yokoyokod rana no tao do karawan eya am o mavyay a tao o kapyan na. Am no mawakwak rana tao am abo rana peypeypangayan na no yokoyokod do karawan.

² Akman so nimacivahavahay rana a mavakes. Ta no mavyay pa o kahanghangan na am ji na to ngaroi. Ta ori o adan a iwawalam no tao do karawan. No si mawakwak saon o kahanghangan na o ji na rana mangozai do iwawalam ori am.

³ Am ori an, no meyigegen pa o kahanghangan na am ji to macitovong do karwan no tao. Ta o akman rana sang am somagpyan. Am no nimawakwak rana o kahanghangan na am ipanci rana ori no tao a to rana naliway. So ikapya na rana macivahavahay.

⁴ Manga kakteh, yakamo akman sang a na rana ji nalamozongan no iwawalam na ni Moyse. Ta kanyo na macikaop ji Yeso Kizisto a nimawakwak no raraten nyo. Inyo rana sicyaikwaya am na rana ipeymatmatngeh inyo ni Yeso a yanimirwa a mavyay a Panirsirngen ta. Ta iya o manoyong a ahapen ta so vazay.

⁵ No kato ta pa mangozayan do adan a onowned ta a meyraraten am nipatwaw no iwawalam na ni Moyse o raraten ta do onowned ta. Am o kapalit no raraten am mangay do makotokotod a lila no apoy a mangay no makwa.

⁶ Am sicyaikwa rana ya am na rana jyagogadan yaten no nivatvatkan a iwawalam na ni Moyse. Ta ori rana am adan rana ori. So ta na pangozayan do na ipananao jyaten no Seyzi a vayo a nakenakem ta ji Ama ta do to.

Iwawalam na ni Moyse a kano raraten

⁷ No akman sang am manngwa, ipanci ta o iwawalam na ni Moyse a yapwan no raraten? Jyabo kakman na sang a. Ta o iwawalam na ni Moyse am ipakateneng ta do raraten. No abo iwawalam a yamanci no kaji mangagoman am jyabo ko kapakateneng do karahet no mangagom a.

⁸ Nimeycicinda jyaken o raraten a amyan. No ipanci no iwawalam na ni Moyse o kaji mangagoman am ikaraherahet ko a mangagom. No abo iwawalam na ni Moyse am jyabo kapakateneng ta do kapeyraraten ta.

⁹ No kaji ko pa makatenngan do iwawalam na ni Moyse am akmey abo raraten ko. Am katenngan ko na o iwawalam na ni Moyse am katenngan ko na o karahet no icicirawat ko, do kapakateneng ko rana do peyoyaoyyan na ni Ama ta do to do meyraraten a tao.

¹⁰ Am o peypeypangayan no iwawalam na ni Moyse am ipakateneng no tao do to meyyonong a ikavyay no pahad. Am o akman rana sang jyaken am yangay ko do kararatan. Ta yako jya nimataptap a yanipeyvazay no iwawalam na ni Moyse.

¹¹ Manoyong ko kakmey mavota no raraten. Am ori o ko nipasobnan do iwawalam na ni Moyse. So ikanoyong ko mangay do kararatan.

¹² Am o iwawalam na rana ni Moyse am apyaha, ta abo marahet do dang.

¹³ Manngwa, iwawalam na ni Moyse o yangay ko do kararatan? Jyabo kakman na sang a. O yangay ko do kararatan am raraten ko. Abo o karatan no iwawalam na ni Moyse. Ta ipakateneng no tao do raraten na. So na ikanoyong no raraten a mapeyparai jyaten ji Ama ta do to.

Ikarahet no onowned no tao

¹⁴ Manoyong o na kapo ji Ama ta do to no iwawalam na ni Moyse. Am yaten rana am tao ta. Jyabo kapakataptap ta so yadomket a ciring do iwawalam na ni Moyse a.

¹⁵ Ko jyatenngi o ko vazay. Ta o ko ikakza a vazay am ko ji peyvazaya. O ko pacioyyan a vazay am ko mangay peyvazain.

¹⁶ Ko anoyngan o iwawalam na ni Moyse a manci nyaken a ji meyraraten. Am ko jyapakongo kataotao ko, ta ko meyraraten.

¹⁷ No yamanoyong ori am beken a yaken o yameyngongyod a yamapeyvazay sya. Ta o raraten do onowned ko am ori o yamapeyvazay sya.

¹⁸ Ko katenngan o na kabo no apya do onowned ko. Tana ko tey kakza ahapen o apya vazay am ko jyapakongo a yapeyvazain.

¹⁹ O ko ikakza apya vazay am ko ji ngapa. O ko jyakzan a marahet a vazay am ko ahapen.

²⁰ No si peyvazain ko o yako jyakzan a vazay am manoyong ka beken a yaken no nang. Ta vazay na ori no yamyan do onowned ko a raraten.

²¹ Cinatao ko o kapeyraraten ko. No ko ikakza o yako kapanidong am ko ji peyvazaya, ko kahap so yamarahet a vazay.

²² Am o na ikakza no onowned ko am vazay na ni Ama ta do to.

²³ Am kapeylamlamsoy na so kataotao ko no raraten. Ori o yamaciliman do ikakza no onowned ko. Am ori o yako icyakmey mavaod no raraten.

²⁴ Yako tey mazikna so onowned. Sino makasidong jyaken a komaro do raraten kaji ko angayan do kararatan.

²⁵ Ko isaray ji Ama ta do to. Ta yana sidongen yaken ni Yeso Kizisto a Panirsirngen ta. Yako ikakza o yako kownot ji Ama ta do to am o raraten do onowned ko am ori o yasomengseng jyaken.