Loma 6 - Seysyo No Tao

Komaro do raraten a kapacikaop ji Kizisto

¹ Manngwa, ji ta ngaroi o raraten ta a kato na ngarilawan nyaten ni Ama ta do to?

² Jyabo kakman ta sang a. Ta yatamo rana nikarwan o peyraratenan ta. Am manngwa, olin ta pa o peyraratenan taha?

^3-4 Kamo jyamimin a makateneng do peypeypangayan no kataktak da jyaten. Ta ori rana am yongkad no kapacizanod no raraten ta a yakmey nimaciwakwak ji Yeso Kizisto. So icyakman ta sang a macizanod ji Kizisto a mirwa a mavyay. So ikanoyong ta na makahap so vayo rana icicirawat ta, akman si Yeso a nipirwa na avyain ni Ama ta do to no oyowyat na.

⁵ No ta na macikaop ji Kizisto am yamyan pa so kapirwa na jyaten a avyain ni Ama ta do to no makwa.

⁶ Tamo na katenngan o adan ta onowned a yarana akmey nimacizanod ji Kizisto a nipadket do jyojika. So ikanoyong ta na a nikomaro rana do raraten ta. So ikabo na rana no oyowyat no raraten a tomalamozong nyaten.

⁷ Ta no mawakwak rana o tao am ji na rana nalamozongan no raraten.

⁸ No si nimacizanod ji Kizisto o adan ta onowned a nidomket do jyojika am anoyngan ta o kapacizanod ta ji Kizisto a mavyay.

⁹ Ta tanyo na katenngan si Kizisto a nimirwa a mavyay. So ji na rana wakwaki. Ta abo o oyowyat a makawakwak sya.

¹⁰ Ipisa si Yeso a mawakwak no raraten ta tao. So na rana ipacikaop ji Ama ta do to a mavyay sicyaikwaya.

¹¹ Akman sang, ta naknakmen nyo o kapacizanod no adan a onowned nyo ji Kizisto a nimawakwak no raraten nyo. So ikanoyong nyo na a meypahagnat so onowned ji Ama ta do to, ta kamo rana macikaop ji Yeso Kizisto.

¹² Am ori o ji nyo to amyapyai so kataotao nyo a italamozong no raraten. Ji nyo to ngonongonoci o marahet a onowned nyo.

¹³ Ji nyo mamyapyan o peyvongvongwan nyo a peylamlamsoin no raraten. Ta itoro nyo o kataotao nyo ji Ama ta do to a mahap so vazay na. O torwan nyo no kataotao nyo ji Ama ta do to am ahapen nyo o apya vazay na. Ta iya o na yapwan no vayo a inawan ta.

¹⁴ So ji na rana nalamozongi ninyo no raraten. Ta nyo na ipeyhanhan o pangangarilawan na ni Ama ta do to a makavonas so raraten nyo. So ji na monganai do apya icicirawat nyo.

Lamlamsoy na ni Ama ta do to

¹⁵ No akman sang am manngwa, apya saon o kato ta na meyraratenan a meyhanhan no pangangarilawan na ni Ama ta do to a makavonas so raraten ta? Jyabo kakman ta sang a.

¹⁶ No onotan nyo o ciring no tao am manoyong kamo a lamlamsoy da. Akman sang, ta no si onotan nyo o raraten am manoyong kamo a lamlamsoy no raraten a mangay do kararatan. Am no si onotan nyo si Ama ta do to am abneken na inyo a abo so raraten do tangain na.

¹⁷ Am ta isaray ji Ama ta do to. Ta no kakwa am akma ney lamlamsoy inyo no raraten. Am sicyaikwa rana ya am yasa rana o onowned nyo a yaomonot do manoyong a nanao.

¹⁸ Am ori o ji na rana mapeylamlamsoi jinyo no raraten. So ikanoyong nyo na yamahap so apya vazay na ni Ama ta do to.

¹⁹ Abo o makdeng a ciring ko jinyo, ta ko ihawa inyo a ji makateneng jya. No kakwa pa am ji nyo amzaci o onowned nyo. Am ori o ikarahet no vazay nyo. So ikanoyong nyo akma ney lamlamsoy no raraten. Am sicyaikwa rana ya am itoro nyo o kataotao nyo ji Ama ta do to a mahap so vazay na. Ta ori o ji nyo rana meylimotengi so onowned a lamlamsoy na ni Ama ta do to.

²⁰ No kapeylamlamsoy na pa jinyo no raraten am ji nyo akzan o kapeyvazay nyo so apiya vazay.

²¹ O yanyo ipacimanig rana sicyaikwaya a vazay am nipeyvazay nyo na. Am ikongo o na kapyapyan no akman sang. Kangay nyo saon do kararatan no akman sang am.

²² Am inyo rana sicyaikwaya am ji na rana peylamlamsoya inyo no raraten. Ta yanyo rana kakzeben si Ama ta do to a mapeylamlamsoy jinyo. So yanyo rana ipeyngongyod a yaomonot rana ji Ama ta do to. So ikanoyong nyo a makahap so to meyyonong a ikavyay no pahad nyo.

²³ Ta o kapalit no raraten am mangay do makotokotod a lila no apoy a mangay no makwa. Am o yazaw na ni Ama ta do to so yamacibedbed ji Yeso Kizisto a Panirsirngen ta am ipanta na so to meyyonong a ikavyay no pahad da.