Loma 5 - Seysyo No Tao

Macikaop ji Ama ta do to

¹ O na abnekan jyaten ni Ama ta do to a abo so raraten do tangain na am ta ipeyhanhan si Yeso Kizisto a Panirsirngen ta. So ikanoyong ta rana macikaop ji Ama ta do to.

² O ta ikakman sang sicyaikwaya am pangangarilawan na ni Ama ta do to, do ta kapeyhanhan ni Kizisto. Am ori o ikasaray ta, ta katenngan ta o kahap na jyaten ni Ama ta do to do teyngato a macikasaray do azwazway na.

³ Tana amyan so alalaw ta am masaray ta. Ta ori ipakateneng ta rana do ahapan ta sya no myan so alalaw ta.

⁴ Ta si myan rana so peyneynaran ta sya do alalaw ta am mowyat ta na so onowned a omnanala so itoro na jyaten ni Ama ta do to sarasaray ta,

⁵ do kapeyhanhan ta ni Ama ta do to a mangononong do mina ciring na jyaten. Ta o Seyzi a nitoro na jyaten ni Ama ta do to am ori o yaomoyat do onowned ta a makateneng ta do pangangarilawan na ni Ama ta do to.

⁶ No kakwa pa am abo oyowyat ta a komaro do peyraratenan ta. Am kanimangozay na jya ni Kizisto do nipamnekan ni Ama ta do to a araraw a mangay mawakwak nyaten.

⁷ Yabo o tao a mawakwak no icyatatao na. Am ala yamyan so mawakwak no apiya so ahahapan sya tao.

⁸ Am no kapeyraraten ta pa am nikawakwak na yaten ni Kizisto. Ori rana am yongkad na ori ni Ama ta do to, do na karilaw nyaten.

⁹ No ta manoyong rana a yanimavonas so raraten no rala ni Yeso Kizisto am abneken na rana yaten ni Ama ta do to a abo so raraten do tangain na. No si akman sang am maliklik ta o peyoyaoyyan na ni Ama ta do to no makwa.

¹⁰ No kakwa am abo o kasngesngenan ta ji Ama ta do to. Am mina kawakwak na nyaten no Anak na. Am ori o ta na ipacikaop ji Ama ta do to. No manoyong o akman sang am jyabo kaji na ngahapan jyaten a. Ta si Yeso Kizisto rana am yamyan do teyngato a yasomidong jyaten.

¹¹ Tamo isaray ji Ama ta do to o na kanimapanop jyaten ni Yeso Kizisto ji Ama ta do to. Am ori o yata ipacikaop ji Ama ta do to. So ta na ikasaray do yana kanimahap ni Kizisto so vazay na ni Ama ta do to a yasomidong jyaten.

Si Adam a kani Kizisto

¹² Si Adam o yapwan no raraten do karawan. Am ori o nyangay na no inawan na do kapeyraraten na. Ori o nikapwan no kawakwak rana no tao do karawan. Ta yamamimin o tao a yameyraraten.

¹³ No kabo na pa no nitoro na ni Ama ta do to a iwawalam na ji Moyse am amyan rana so raraten no tao do karawan. Am o raraten no tao am ji pa mancyan a raraten da, ta abo pa o iwawalam a pangozayan da.

¹⁴ Am no kabo pa no iwawalam na ni Moyse am amyan rana so tao a mawakwak. Tana ji sira akman si Adam a ji niomamizing si Ama ta do to am akman sira si Adam a mawakwak, ta amyan so raraten da. Si Adam am pehngehngain ji Yeso Kizisto. Am meytarek o pamoonen da do tao.

¹⁵ Ta si Adam rana am nimeyraraten. Am ori o nikapwan no ikawakwak no tao. Am si Yeso Kizisto am tey mangarilaw, ta nikawakwak na o raraten no tao. O akman sang a pangangarilawan na ni Ama ta do to a yana nitoro do aro a tao am yabo tonggal na.

¹⁶ Meyraraten si Adam. Am ori o iyan no raraten no tao a mangay do kararatan. Am o meyhanhan ni Yeso Kizisto a tao am mavonas o raraten da, ta mahap da o pangangarilawan na ni Ama ta do to. Am ori o abnekan na rana sira abo so raraten do tangain na.

¹⁷ So ikanoyong na no raraten na ni Adam a yapwan no ikawakwak rana no tao. Am arakorako pa o pangangarilawan na ni Ama ta do to a kani Yeso Kizisto a yamapeyvaliw jyaten a abo so raraten do tangain na ni Ama ta do to a manta nyaten so to meyyonong a ikavyay no pahad ta.

¹⁸ So ikanoyong na no raraten na ni Adam a yapwan no kapeydedna no oyaoyyan na ni Ama ta do to do tao do karawan. Akman sang, ta o kapyapya na ni Kizisto am ikamimin no meyhanhan nya tao a mavonas rana so raraten a ipakahap da rana so to meyyonong a ikavyay no pahad da.

¹⁹ Yakman sang o aro a tao a omamoon so raraten ni Adam. Am kanyahap na rana ni Yeso Kizisto so vazay ni Ama ta do to a mawakwak no raraten ta. Am ori o ikamimin no tao a meyhanhan nya abneken na ni Ama ta do to a abo so raraten do tangain na.

²⁰ O nitoro ni Ama ta do to a iwawalam na ni Moyse am ipakateneng no tao do raraten da. Am tana akman sang am arakorako pa o aryarilaw na jyaten ni Ama ta do to.

²¹ No kakwa pa am niharag no raraten o tao do karawan. Am ori o ikamimin da mawakwak no tao. Am o pangangarilawan na ni Ama ta do to am na nitoro do meyhanhan nya tao. So ikamimin da rana vonasen na so raraten. So ipakahap da rana so to meyyonong a ikavyay no pahad da, do da kanoyong ji Yeso Kizisto a Panirsirngen ta.