Loma 4 - Seysyo No Tao

Peycitacittan ta si Apolahan

¹ Naknakmen ta pala si Apolahan a manoyong a ineynapo namen a tao do Yotay.

² No si monganay do apya icicirawat na o abnekan na sya abo so raraten do tangain na ni Ama ta do to am manoyong kapakazwazway na nya. Am ji na mapazwayan do tangain na ni Ama ta do to.

³ Ta maniring do Seysyo am, “Na anoyngan si Ama ta do to ni Apolahan. Ori nibnekan na sya ni Ama ta do to do a abo so raraten do tangain na.”

⁴ O meyvazay a tao am manoyong o kapeynizpi sira. Am o nizpi da am beken a karilawan na nira no mapeyvazay sira, ta nizpi da do kapeyvazay da.

⁵ Am o nakenakem na jyaten ni Ama ta do to am beken a akman sang. Ta o meyhanhan nya tao am beken a monganay do kapya no icicirawat na. Ta o abnekan na sya abo so raraten ni Ama ta do to am monganay do kapeyhanhan na nya.

⁶ O akman rana sang a tao am tey yapya an, ta ji monganay do apya icicirawat na o yana vonasan so raraten na. Ori o akman so nipanci ni Tawey. Maniring am,

⁷ “O nivonas na rana so raraten ni Ama ta do to a tao am manoyong sira tey yapya o akman sang a tao.

⁸ O ji na rana naknakma ni Ama ta do to so raraten a tao am tey yapya o akman sang a tao.”

⁹ O ipanci na ni Tawey a tey yapya a tao am manngwa, o nimyongkad do kataotao na o peycirngan na sya? Beken a ori an. Ta macyangay sira o jya nimyongkad do kataotao da. Ta maniring do Seysyo am, “Na anoyngan si Ama ta do to ni Apolahan. Ori o nibnekan na sya ni Ama ta do to a abo so raraten.”

¹⁰ Ikongo nikapwan no akman sang. No kaji da pa nimyongkadan ji Apolahan an? No kateyka na rana niyongkadan da. Jyabo kaji na nimyapwan no kaji da niyongkadan do kataotao na.

¹¹ O peypeypangayan na no kayongkad da do kataotao na am nivonas na rana ni Ama ta do to o raraten na, ta nipeyhanhan na si Ama ta do to. Am ori nipancyan na nya abo rana so raraten. Ori o da abnekan si Apolahan a ama da no yameyhanhan ni Ama ta do to a tao. Tana ji da yongkaji o kataotao da am to na rana abneken sira abo so raraten do kapeyhanhan da ni Ama ta do to.

¹² Akman sang, ta yada akmey ama no yarana niyongkadan do kataotao da tao. Am beken a yada kanimyongkad rana do kataotao da, ta yada inarahen pa si Apolahan a yameyhanhan ni Ama ta do to.

Nakem na ni Ama ta do to so meyhanhan nya

¹³ O mina ciring na ni Ama ta do to ji Apolahan am itoro na o karawan ji Apolahan a kano sivosivovoong na. Am beken a kahap na ni Apolahan so iwawalam na ni Ama ta do to o peycirngan na sya, ta yamonganay do na kapeyhanhan ni Ama ta do to ni Apolahan. Ori nyabnekan na sya ni Ama ta do to abo so raraten do tangain na.

¹⁴ Ta no si azawen na yaten ni Ama ta do to do kahap ta so iwawalam na ni Moyse am manngwa, abo saon o peypeypangayan no kapeyhanhan ta ni Ama ta do to. So ikabo na saon no peypeypangayan no mina ciring na jyaten am.

¹⁵ O iwawalam na ni Moyse o yapwan no peyoyaoya na ni Ama ta do to. Ta abo yasa ka tao a manoyong a makahap sya. No abo pangozayan a iwawalam am do wanjin o kapwan no raraten no tao.

¹⁶ O mina ciring na ni Ama ta do to so meyhanhan nya tao am to na palololwa do kapeyhanhan da nya. So ji na monganai do kapya no icicirawat ta. Ta o aryarilaw na ni Ama ta do to jyaten a sivosivovoong na ni Apolahan am ori o nipanci na a itoro na jyaten ni Ama ta do to. So ji ta mangozai do iwawalam na ni Moyse. Ta macyangay ta ji Apolahan a omanoyong ji Ama ta do to. Ta iya rana am akma tey ama a yameyhanhan ni Ama ta do to.

¹⁷ Ta maniring do Seysyo am, “Ko abneken imo a ama da no tao do peycyamahamahatawan na.” So ipangononong na no ciring ni Ama ta do to. Ta o na anoyngan ni Apolahan a Tao do to am yamapeyvangon so nimawakwak a tao a nimangamamaog so karawan.

¹⁸ Tana katenngan na o katey masalit na no keyyan no minapodpod jya do kararakeh na rana am na anoyngan o kapangononong na no mina ciring na jya ni Ama ta do to. Ta maniring si Ama ta do to jya am, “Somaod ka so sivosivovoong.”

¹⁹ Toda ji makapoo (100) o kakawakawan na am naknakmen na rana o kararakeh na ni Apolahan. O mavakes na meyngaran si Salay am ji rana makapeytaodtod ori. Am ji na haywan ni Apolahan o kapeyhanhan na ni Ama ta do to.

²⁰ Tana akman sang am ji na haywan o kararalay na ni Ama ta do to. Ta ikowyowyat na meyhanhan ni Ama ta do to a omazwazway sya.

²¹ Anoyngan na si Ama ta do to a mangononong do mina ciring na jya.

²² Am ori o nibnekan na sya ni Ama ta do to si Apolahan a abo so raraten do tangain na do kapeyhanhan na nya.

²³ Am beken a iyaha o peycirngan na so kabo no raraten na.

²⁴ Ta akman sang o ciring na jyaten, do yata kanoyong ji Ama ta do to a nimirwa a omvyay si Yeso Kizisto a Panirsirngen ta. So icyakman ta sang a abneken na ni Ama ta do to a abo so raraten do tangain na.

²⁵ Nimawakwak si Yeso no raraten ta a kapirwa na rana mavyay. So ikanoyong ta na ipanci ni Ama ta do to abo so raraten do tangain na.