Loma 3 - Seysyo No Tao

¹ No manoyong kakman na sang am ikongo peypeypangayan no ka tao do Yotay da kano kayongkad da do kataotao da.

² Yaro peypeypangayan no nang. O ney manma na am na nitoro jira ni Ama ta do to o ciriciring na.

³ Tana yamyan jira so yatatasa yaji nganoyong do ciriciring na am cinakongo na. Manngwa, ablisen na pa o nakenakem na ni Ama ta do to?

⁴ Jyabo kakman na sang a. Tana todamimin o tao a mangalalas am jyabo kapangalalas na ni Ama ta do to a. Akman so ciring na do Seysyo. Ta maniring am, “No mehtaw o ciring mo am yamo pangononongan an. No kapacici da jimo am ji ka nikapatawan.”

⁵ Ala yamyan so tao a manci no, “Apya o keyyan no raraten ta. Ta o raraten ta am ipakateneng da no tao ji Ama ta do to a ji meyraraten a kazwazway da sya. So ikalas na ni Ama ta do to a mapasingsingkad jyaten.”

⁶ Beken a akman sang an. Ta no si malas o kapasingsingkad na jyaten ni Ama ta do to am makongo so wanjin a mapeykapyapinpin so tao do karawan.

⁷ Ala yamyan pa so tao a yamanci no, “Si malas o ciring ko am jyabo kaji da makatenngan jya no tao si Ama ta do to a yajyalas so ciring a. No akman sang am ikongo pasingsingkadan na jyaken ni Ama ta do to.”

⁸ “Ikongo ta jyangai a meyraraten a kapeypapya ta nya.” So da iyan no tao a yamanci no kapeyciring ko so sang, do da karaherahet jyaken. So ikanoyong da no akman sang a tao a peydednan na no oyaoyyan na ni Ama ta do to.

Abo ji meyraraten a tao

⁹ Manngwa, namen apyapya pa tao do Yotay a kano karwan no tao do tangain na ni Ama ta do to? Jyabo kakman na sang a. Nipanci ko na o tao do Yotay a kano beken a tao do Yotay a yameyyangay a yameysaod pa so raraten.

¹⁰ Akman so ipanci na do Seysyo. Ta maniring am, “Abwata o yasa ka tao abo so raraten.

¹¹ Abwata o yasa ka tao a yamakateneng ji Ama ta do to. Yabo o yasa ka tao a yamakza no na kararalay ni Ama ta do to.

¹² Yamamimin o tao a yamlikod ji Ama ta do to a yamangay do da peyraratenan. Yabo o yasa ka tao a apya so nakenakem.

¹³ O ciriciring da am ikarahet no tao. Sya mangononong so yamalas. So na icyakmey mavowaw no ciriciring da a tey manginanawa.

¹⁴ Ta mamimin a ipangangavay o ciriciring da.

¹⁵ No meyoyaoya sira am panwakwakan da rana so tao.

¹⁶ O angayan da nira ori am abo o ji da peyrarehta tao.

¹⁷ Ji da tenngi o kapya no onowned da do icyatatao da.

¹⁸ Ji da anyaheyan o peyoyaoyyan na ni Ama ta do to.”

¹⁹ O iwawalam na ni Moyse am itoro na ni Ama ta do to do tao do Yotay a pangozayan da. So ikabo no tao do karawan a omalalas do raraten da do tangain na ni Ama ta do to.

²⁰ Abo asa ka tao a mangozay do iwawalam na ni Moyse a manoyong a manci no kabo no raraten na do tangain na ni Ama ta do to. Ta o iwawalam na ni Moyse am kapanidong na so tao a makateneng do raraten da.

O ikapya ta do tangain na ni Ama ta do to

²¹ Sicyaikwaya am na rana nipananao jyaten o na kabnek jyaten ni Ama ta do to a abo so raraten do tangain na. Ori rana am beken a iwawalam na ni Moyse, ta monganay do kapeyhanhan ni Yeso Kizisto akman so mina ciring da no panoyonoywan na so ciring ni Ama ta do to.

²² Si ipeyhanhan ta si Yeso Kizisto am abneken na rana yaten ni Ama ta do to a abo so raraten do tangain na. So ipeyyangangay na no nang a itoro na do meyhanhan nya tao.

²³ Ta tanyo mamimin a yameyraraten a yaji makanet so nakenakem do tangain na ni Ama ta do to.

²⁴ So na nitovoyan si Yeso Kizisto a yasomidong jyaten a komaro do raraten ta do na karilaw nyaten. So ikanoyong ta na abo so raraten do tangain na ni Ama ta do to.

²⁵ Nitovoy na si Yeso Kizisto a mangay mawakwak no raraten ta. So ikanoyong no meyhanhan nya tao a mavonas rana so raraten. O ikakman na sang ni Ama ta do to am ipacita na o kaji na alasan a mapeykapyapinpin so tao. Ta o pangangasyan na am ori o ji na rana mapasingsingkaji do meyhanhan nya tao no kakwa.

²⁶ Am sicyaikwa rana ya am na nyahap ni Yeso Kizisto o raraten no tao. So ikanoyong da no meyhanhan nya tao a mavonas rana so raraten ji Ama ta do to a kabnek na sira a abo so raraten do tangain na. Ori na ikatey yapya no na ahahapan sya ni Ama ta do to.

²⁷ Am ikongo ipakazwazway ta. Jyabo a. O ko pancyan no nang am beken a ta kahap so iwawalam na ni Moyse o yata ikapya do tangain na ni Ama ta do to. Ta yaomagaz do yata kapeyhanhan ni Yeso Kizisto.

²⁸ O ikabo no raraten no tao do tangain ni Ama ta do to am meykasaha. Ori rana am ipeyhanhan si Yeso Kizisto. So ikabeken a kahap ta so iwawalam na ni Moyse.

²⁹ Jyabo ka tao do Yotay no mapeytao do to si Ama ta do to a. Ta Tao do to da no beken a tao do Yotay. So na ikanoyong no nang.

³⁰ Yasa si Ama ta do to. O ikapya namen a tao do Yotay do tangain na am akman sang, ta inyo rana beken a tao do Yotay am no si anoyngan nyo si Ama ta do to am akman kamo sang a vonasen na so raraten.

³¹ No akman sang am manngwa, todabo rana o oyowyat na no iwawalam na ni Moyse? Jyabo kakman na sang a. Ta o manoyong a meyhanhan ni Yeso Kizisto a tao am ori o ipanci a manoyong a mangononong do iwawalam na ni Moyse.