Loma 2 - Seysyo No Tao

Peyoyaoyyan na ni Ama ta do to

^1-2 Yata katenngan o kanoyong na no oyaoyyan na ni Ama ta do to no akman so sang a tao. Am no si manamwad ka so tao am raraten mo ori. Ta o peyraratenan mo so sang am mo ipanci o kataotao mo a abo so karatan.

³ O nyo raten a vazay da no tao am ori o nyo peyvazain. Am makatayo ka do peykapyapinpinan na rana so tao ni Ama ta do to?

⁴ Manngwa, mo jyatenngi o pangangarilawan na ni Ama ta do to a yameypalanginan nimo a yamamlis? Am yamo kato nazibwan no rako a pangangasyan na yamvonas so raraten mo, do yana kakzeb jimo a yamamlis so onowned.

⁵ Am yamo kakmey mavota so onowned a yaji mamlis. Am no si marateng rana o araraw na no peyoyaoyyan na ni Ama ta do to am jyabo kaji nakdekdengan pa no ipasingsingkad na jimo no ji mapeycyakaban so tao a Tao do to a.

⁶ Ta si Ama ta do to rana am to na palololwa do vazay no tao o itoro na jira.

⁷ Yamyan so tao a yajimtad no da kapanidong so tao a yakomala so azwazway na ni Ama ta do to a kano to meyyonong a ikavyay no pahad da. O akman rana sang a tao am itoro na jira ni Ama ta do to o to meyyonong a ikavyay no pahad da do teyngato.

⁸ Am o yatomaosya so manoyong a nanao na ni Ama ta do to a yaomonot do malas a vazay da am meydedna jira o peyoyaoyyan na ni Ama ta do to.

⁹ O yameyraraten rana tao am tana tao do Yotay a tana beken a tao do Yotay am abo jira o makaliklik so alalaw da.

¹⁰ Am o manidong a tao am tana tao do Yotay a tana beken a tao do Yotay am ipanta na sira so azwazway da kano ikeynakem da kano ikapiya no onowned da.

¹¹ Ta si Ama ta do to rana am ji mapeykakaban so tao.

¹² O iwawalam na ni Ama ta do to a nitaid na ji Moyse am abo ori do beken a tao do Yotay a pangozayan da. O raraten da am ori oyyan na nira ni Ama ta do to, ta amyan so ipakateneng da do apya kano marahet. Am o tao do Yotay am ori o yanan no nitaid na a ciriciring na. So pangozayan na ni Ama ta do to do iwawalam na amwoya nira no meyraraten sira.

¹³ Beken a omamizing sya o abneken na ni Ama ta do to abo so raraten do tangain na. Ta o mangozay do iwawalam na a peyvazain o abneken na abo so raraten do tangain na.

¹⁴ O beken a tao do Yotay am ji da tenngi o iwawalam na ni Ama ta do to a nivatvatkan ni Moyse. Am amyan so pangozayan da do onowned da. So ipakateneng da do apya kano marahet. So icyakma ney to ngyan no iwawalam na ni Ama ta do to do onowned da no beken a tao do Yotay.

¹⁵ O apya icicirawat da am yongkad na ori no keyyan na do onowned da no iwawalam na ni Ama ta do to. Ta katenngan da o apya kano marahet a nakenakem da.

¹⁶ O yako ipeylimwang a Mapasaray a Ciriciring na ni Ama ta do to am no si marateng rana o yai ni Yeso Kizisto a mapeykapyapinpinan so tao am patwawen na rana o makakaday a taywen no tao do onowned da.

Tao do Yotay a kano iwawalam na ni Moyse

¹⁷ Inyo rana a tao do Yotay am nyo ipakazwazway o iwawalam na ni Moyse a kano mina kapamnekan na jinyo ni Ama ta do to amraralay nya.

¹⁸ Nyo katenngan o apya kano marahet, ta yamyan jinyo o iwawalam na ni Ama ta do to.

¹⁹ Yanyo ipanci o yanyo kapangonong no mavota tao a yamangay do kazngangan.

²⁰ Nyo ipanci o kataotao nyo a makananao so jyateneng a tao. Nyo kapanci no kataotao nyo a mapamizing so avayo pa amraralay ni Ama ta do to a tao do yanyo kapakateneng do manoyong a nanao, a yamangozay do iwawalam na ni Moyse.

²¹ Nyo nanawen o aro a tao. Am ikongo yanyo ji makananaoi so kataotao nyo. No kamo maniring am, “Ji kamo manakaw,” am kamo manakaw.

²² No kamo maniring am, “Ji mangzakza so icyatatao,” am nyo ikakman sang. Nyo ikaoya o yamanaralay so malas a da iraralay. Am ikongo yanyo ipanakaw do panaralayan da.

²³ Nyo ipakazwazway o na keyyan jinyo no iwawalam na ni Ama ta do to. Am nyo ji peyvazaya. Am ori o na pacikatamwadan jinyo ni Ama ta do to.

²⁴ Ta maniring do Seysyo am, “Inyo a tao do Yotay o na yapwan no da kakolala so ngaran na ni Ama ta do to no beken a tao do Yotay.”

²⁵ No kamo manoyong a yamahap so iwawalam na ni Ama ta do to am manoyong o keyyan no peypeypangayan no kayongkad do kataotao nyo. Am si ji nyo ngapa o iwawalam na am abwata peypeypangayan no kayongkad nyo do kataotao nyo.

²⁶ Tana ji da yongkaji no beken a tao do Yotay o kataotao da am no ahapen da o iwawalam na ni Ama ta do to am jyabo kaji na pazanodan sira do nimyongkad do kataotao da a tao ni Ama ta do to a avyain na.

²⁷ So ikanoyong na a meydedna jinyo a tao do Yotay no peyoyaoyyan na ni Ama ta do to. Ta tana myan jinyo so nivatvatkan ni Moyse a iwawalam na ni Ama ta do to a amyongkad do kataotao nyo am nyo ji mangononongi o iwawalam na a peyvazain. Tana da ji yongkaji o kataotao da no beken a tao do Yotay am da pangononongan o iwawalam na ni Ama ta do to.

²⁸ Am sino manoyong a tao do Yotay a italamozong na ni Ama ta do to. Manngwa, nimyongkad do kataotao da? Beken a ori, ta o omanoyong jya tao am ori o italamozong na.

²⁹ O manoyong a tao do Yotay am mamlis so onowned a omanoyong ji Ama ta do to. Ta ori rana am vazay na ori no Seyzi na ni Ama ta do to. So ikabeken a kahap so iwawalam na ni Ama ta do to a nitaid na ji Moyse. O mahap na azwazway no nimamlis so onowned a tao am beken a apo do tao, ta apo ji Ama ta do to.