Loma 16 - Seysyo No Tao

Ipeyminaminasi na ni Pawlo o sinjya do Loma

¹ Amyan so mangay jinyo do dang a meyngaran si Veypey. Iya rana ori am akma tey kakteh do cinai a mavakes a yasomidong so sinjya do Kengkedi.

² Taotawwen nyo ori an, ta ori o vazay ta akmey meyketeketeh do cinai. No amyan so kakzeben na am sidongen nyo. Ta iya rana ori am ney makdeng a nisomidong so aro a tao. So nisidongan na jyakehen.

³ Ko ipeyminaminasi si Paycila kani Akwila a kararay ko a mahap so vazay na ni Yeso Kizisto.

⁴ Ta toda jyangay o inawan da no kasidong da jyaken. So ikabeken a yakehen no yasomaray nira, ta yakman sang o akma tey kakteh do cinai a beken a tao do Yotay do peycyakyokyokayan na a yasomaray nira.

⁵ Ko ipeyminaminasi sira o yamalwalovot a yameynozi do vahay da. Ko ipeyminaminasi o kagagan ko a si Ipaynayto. Ta iya rana am ney manma na niomanoyong ji Yeso Kizisto do Yasiya a pongso.

⁶ Ko isaray ji Madiya o zikzikna na jinyo.

⁷ Ko ipeyminaminasi o kasina ko no inawan a si Antoniko a kani Yoniya. Sira ori am nimanmanma pa ka nyaken a niomanoyong ji Yeso Kizisto. No kapteng da jyamen am sira ori o mina kararay ko do pamemtengan. Katenngan da sira no nipamnekan na ni Yeso Kizisto a amlivolivon no ciriciring na.

⁸ Ko ipeyminaminasi si Anpodi a kagagan ko a yarana omanod ji Kizisto.

⁹ Ko ipeyminaminasi pa si Opano a kararay ta a meyvazay ji Kizisto a kani Setawey a kagagan ko.

¹⁰ Ko ipeyminaminasi si Apeydi a jyablis so nakenakem ji Kizisto a kani Aditopo asa ka vahay.

¹¹ Ko ipeyminaminasi o kasina ko so inawan a kakteh ta si Helotyan a kano akma tey kakteh do cinai a si Naciso asa ka vahay a omanoyong ji Yeso.

¹² Ko ipeyminaminasi o kararay ko si Toveyna kani Tovosa kano kavakes ko a meyngaran si Peysi. Ta sira rana ori am yamakdeng sira a yamahap so vazay na ni Ama ta do to.

¹³ Ko ipeyminaminasi pa si Lovo. Iya rana ori am ney yapya na mahap so vazay na ni Ama ta do to. Ko ipeyminaminasi pa si ina na, ta iya ori am akma ney anak yaken.

¹⁴ Ko ipeyminaminasi si Asincito a kani Veykong a kani Hemeyse a kani Palopo a kani Hema kano karwan da akma tey kakteh do cinai.

¹⁵ Ko ipeyminaminasi pa si Veyaytaw a kani Yodiya kani Nidiya kano kakteh na mavakes a kani Awdinpa kano aro a sinjya a kararay da.

¹⁶ Ipeyminaminasi nyo pa o kadwan jinyo. Yada ipeyminaminasi inyo no aro a sinjya do peycyakyokyokayan na do jya.

Manowji rana ivavaga na jira

¹⁷ Manga kakteh, o ko ivavaga jinyo am azimanen nyo sira o mangamaog so ciring a ipeyvwak da jinyo a iraherahet da so nakenakem da no amraralay ni Ama ta do to. Azimanen nyo sira o amlikolikod do manoyong a nanao a nimamizing nyo. Ta o akman rana sang a tao am ji nyo macikasngeni sira.

¹⁸ Ta o akman rana sang a tao am da ji ngapa o vazay ni Yeso a Panirsirngen ta. Ta o kataotao da o da naknakmen. Sira ori am littan da no ciring da o mahaha so nakem ji Ama ta do to a tao.

¹⁹ Yabo yaji makateneng jinyo so nakenakem a yamahap so ciriciring na ni Ama ta do to. Am ori o ko sarayan ya jinyo. O yako kakzeben jinyo am makakdeng kamo do apya vazay. O marahet a vazay am ji nyo macikasngeni.

²⁰ Si Ama ta do to o yamanta nyaten so ikapiya no onowned ta. Makeykai na rana si Satan a haragen a kabo na rana no oyowyat na amlita jinyo. Inaoy si itoro na ni Yeso Kizisto a Panirsirngen ta o pangangarilawan na jinyo.

²¹ Na ipeyminaminasi inyo no mina kararay ko a si Timotay a nimeylimwang no ciriciring na ni Ama ta do to. O kasina ko no inawan a meyngaran si Lociye a kani Yeson a kani Sosipate am sira mamimin a yameyminaminasi ninyo.

²² Yaken rana am si Tesan ko a yamvatvatek do teygami eya. Yako ipeyminaminasi inyo.

²³ O yako pacivahayan a meyngaran so Cyayo a yamrara so sinjya a yameynozi do vahay da am yakman sang a yameyminaminasi ninyo. Si Ilato a yatomalamozong no nizpi do keymiminili namen ya kani Kose am yakman sang sira yameyminaminasi ninyo.

²⁴ [Inaoy si itoro na ni Yeso Kizisto a Panirsirngen ta o pangangarilawan na jinyo. Amin.]

Ney manowji na inozi na kano sarasaray na ni Pawlo

²⁵ Manoyong o kazwazway ta si Ama ta do to. Ta iya rana am yamanoyong a yaomoyat jinyo a meyhanhan nya akman so Mapasaray a Ciriciring na a ipeylimwang ko a yaomagaz ji Yeso Kizisto. Ori rana am ji da nikatenngan no kakwa a nanao na ni Ama ta do to.

²⁶ Am sicyaikwaya am yameylimwang rana o nivatvatkan da no panoyonoywan na so ciring na no kakwa. Ori rana am ciring na do peycyamahamahatawan na no to meyyonong a Tao do to. So ikanoyong da na no tao a meyhanhan nya.

²⁷ Azwazwain ta si Ama ta do to a tey mateneng a Tao do to a mangay do kaidan no karawan, do kanisomidong na jyaten ni Yeso Kizisto. Amin!