Loma 14 - Seysyo No Tao

Ji raheraheta o akmey kakteh do cinai

¹ O malma pa so onowned ji Ama ta do to a tao am makapya kamo jya so nakenakem an. Tana macitarek o ahahapan na sya am ji nyo a zyakan.

² O makdeng so onowned ji Ama ta do to a tao am abo ji da ngangana. Am o malma pa so onowned a tao am o voovoong o yakan da.

³ O makakakan a tao am ji na zyakan sira o ji makakakan a tao. O voovoong so yakan am ji na namwada sira o makakakan a tao. Ta meyyangay sira akma ney anak ni Ama ta do to.

⁴ Sino ka a yamazyak no lamlamsoy no karwan no tao. Manngwa, ji na zyakan no katenngan a tao o karatan no lamlamsoy na? No si Yeso o Panirsirngen na kasidong na sya am jyabo karahet na.

⁵ Amyan so tao a manci no katey makdeng no kasaraw a raralayan ni Ama ta do to a kano toda kararaw. Am amyan so tao a manci no kato na meyyangangayan no araraw. Ney yapya na am ji meykawad so nakenakem.

⁶ O tao rana a tongdeng do kasaraw a raralayan da ni Ama ta do to am isaray da o kapakanakem da si Ama ta do to. Akman sang o makakakan a tao, ta isaray na ji Ama ta do to o kanekanen na. O ji makakakan a tao am akman sang. Ta isaray na si Ama ta do to.

⁷ O cinatazak ta tao do karawan a yamraralay ni Yeso am beken a kakakzeb ta so kapeypapya no kataotao.

⁸ Ta si Yeso a Panirsirngen ta am yapwan no inawan ta. Am ori o ika si Yeso na no pasarain ta. Tana do ika mavyay ta pa, tana do ikawakwak ta na am ji ta hamangi o ka si Yeso no tomalamozong nyaten.

⁹ Ta si Yeso Kizisto rana am nimawakwak a keypirwa na rana mavyay. O ikakman na sang am peypanirsirngan da no mavyay a tao a kano nimawakwak a tao.

¹⁰ Am sino ka paro amraherahet so akma moy kakteh do cinai. Ikeykongo ka yajyaninig no akma moy kakteh do cinai. Ta yaten rana am mamimin ta tomnek do tangain na ni Ama ta do to no pacicin na yaten.

¹¹ Ta maniring do Seysyo a ciring na ni Ama ta do to am, “O ko pa ciring jinyo am ko manoyong a mavyay a Tao do to. Am ori o ikamimin da no tao a meylilitod do tangain ko a zomwazway jyaken a Tao do to da.”

¹² No si akman sang am mamimin tamo a mangay do tangain na pacicin na ni Ama ta do to no makwa.

Ji mapeyvazay so pacikzan da meyraraten no akmey kakteh do cinai

¹³ Am ori o ji ta macitamtamwaji an. Ta naknakmen ta kaji ta mapeyvazayan so pacikzan da meyraraten no akma tey kakteh do cinai.

¹⁴ Macikaop ko na ji Yeso a Panirsirngen ta am katenngan ko na o kabo no makanyaw a kanekanen. No amyan so tao a manci nya makanyaw am manoyong o kakanyaw na do tao no nang.

¹⁵ No si kanen mo o ikarahet no nakenakem no akma moy kakteh do cinai am manoyong kabwata no pangangarilawan mo. Ta tey marahet o koman so ikarahet da no onowned no nikawakwak na ni Yeso Kizisto a tao.

¹⁶ Tana apya jimo o naknakmen mo a vazay mo am ji mo peyvazaya o raten da no tao a itamwad da jimo.

¹⁷ Ta o ney makdeng na do italamozong na ni Ama ta do to am beken a monganay do kanen a kano yopen. Ta monganay do apya vazay a kano kapyapya no onowned kano sarasaray a itoro na jyaten no Seyzi.

¹⁸ Ori an o ahapan ta so vazay ta ji Kizisto an. Ta ori o sarayan na nyaten ni Ama ta do to a kano icyatatao ta.

¹⁹ Am ori o ikasangib ta mapeyvazay so ikapya no tao a vazay a kano ipeypakdeng no tao so nakenakem ji Ama ta do to a vazay.

²⁰ Ji nyo peyparaheta no isovo nyo a kanen o vazay na ni Ama ta do to do onowned no akma nyoy kakteh do cinai. Ta abo kararatan no kanekanen. Am no si kanen nyo o ikarahet da no akma nyoy kakteh do cinai am raraten nyo rana ori.

²¹ Apyapya pa o kajyanganan so vinyay, ji ngyop so saki a ji mapeyvazay so makakaday a vazay a pacikzan da meyraraten no akma tey kakteh do cinai.

²² Ta ipeyhanhan mo o vazay mo do tangain na ni Ama ta do to abo so karatan. So ji mo meykawaji so nakenakem. Ta o akman rana sang a tao am tey masaray. Am ji mo mancyan do tao. Ta si Ama ta do to makateneng jya.

²³ Am no si amyan so ji mo adkeci a kanen a kakan mo sya am raraten mo ori. Ta ji mo panadnada o nakenakem mo si Ama ta do to. No meyvazay a kaji mapanadnadan si Ama ta do to am mamimin o akman sang a raraten.