Loma 13 - Seysyo No Tao

Mapanadnad so amyokod nyaten a seyvo

¹ Mamimin o tao a omanod so nakenakem do amyokod no seyvo. Ta o iyan no makayokod a tao am nakenakem na ori ni Ama ta do to. Ta o oyowyat da a amyokod no seyvo am apo ji Ama ta do to.

² O mapasobna do seyvo am akmey si Ama ta do to o pasobnan da. O akman rana sang a tao am jyabo kaji na ngyanan no ipasingsingkad na sira.

³ Ta o vazay no manyokod a tao am jyanyaheyan no apiya so ahahapan sya tao. Am ikanyahey ori no marahet so ahahapan sya tao. Mo ikanyahey o makayokod so tao ang? No si ikanyahey mo am mangasi ka so tao, ta ori o sarayan na nimo.

⁴ Ta iya rana am lamlamsoy na ni Ama ta do to. O vazay na am ipeypapya nyo. Am no si pasobnan nyo am manoyong kanyahey nyo nya. Ta manoyong ori a nipamnekan na ni Ama ta do to amwoya no mapasobna a tao.

⁵ Am ori o onotan nyo do makayokod ninyo. Am beken a kanyahey nyo no oyaoyyan na ninyo, ta omaing do onowned nyo rana a makateneng do apya kano marahet.

⁶ O itoro nyo a deyking do seyvo am itoro nyo, ta o meyvazay da no amyokod ninyo a tao am vazay ori ni Ama ta do to.

⁷ Am ori o torwan nyo jira. Ikanig nyo sira.

Ikarilaw nyo o icyatatao nyo

⁸ No amyan so nivood nyo jira am ji nyo peyyahahaya a paolin. To nyo peyyononga o karilaw nyo no icyatatao nyo. No si mangarilaw ka so tao am manoyong ka na nimakahap so iwawalam na ni Ama ta do to.

⁹ Ta o ciring a, “Ji mangzakza. Ji manwakwak. Ji manakaw. Ji mangagom,” a kano yamakakaday pa a iwawalam na am na to zaksa ori no yasa ka ciring. O ciring ori am, “O aryarilaw mo so kataotao mo am akman sang o karilawan mo no icyatatao mo.”

¹⁰ O mangarilaw so icyatatao am ji mapeyvazay so marahet a vazay a. Ta o akman rana sang am manoyong rana makahap so nanao na ni Ama ta do to.

¹¹ Peyvazain nyo o akman sang. Ta nyo katenngan o kakeykai na rana ni Yeso a mai a mahap jyaten. So ji nyo to ngitkehi. Ta meytataziman kamo.

¹² Yakomavos rana o marahet a vazay da no tao do karawan. Na kapakaranes rana no yapiya na patazadangan jyaten ni Ama ta do to. Am ori o ji ta to peyvazai so jyapsepsek a vazay ta. Ta kahap ta so apiya vazay akmey voovoo a ipakaharag ta so amlita jyaten a Satan.

¹³ To ta peynara o icicirawat do maraw. Ji ta to ngyop so saki. Ji pasagpyana o aktokto. Ji maciskaskad. Ji manginanahet.

¹⁴ Ahapen nyo si Yeso Kizisto a Panirsirngen ta, akma nyoy voovoo a ipzat nyo do onowned nyo. Ji nyo to mamyapyan o kapeyraraten nyo. So ingtwan nyo do kataotao nyo.