Loma 12 - Seysyo No Tao

Iyangay no mahap so vazay na ni Ama ta do to

¹ Manga kakteh, ko vavagan inyo an. Ta yatey rako na kasyan nyaten ni Ama ta do to. Am ori o torwan nyo no kataotao nyo a italamozong na a komaro do raraten nyo. Ta ori sarayan na ninyo ni Ama ta do to a meyngongyod so onowned a amraralay nya.

² Ji nyo to panwanoda o kataotao nyo do yamarahet so yahahapan sya tao do karawan. Ta apyapya pa o kablis na so onowned nyo ni Ama ta do to. Ta ori o ipakateneng nyo do apya nakenakem na jinyo ni Ama ta do to a kano isaray ni Ama ta do to a vazay.

³ Yaken rana a nipamnekan ni Ama ta do to a lamlamsoy na a nipantan na so aryarilaw na am ko vavagan inyo. Ji nyo pahamaha o kataotao nyo. Ta to nyo palololwa o ahahapan nyo so kataotao nyo do na nitoro jinyo ni Ama ta do to a teneteneng nyo.

⁴ O makakaday a peyvongvongwan ta am ori o ta ikamaog a yasa ka tao. Am yameykataretarek o vazay da no peyvongvongwan ta.

⁵ Yakman sang, ta tana tamo aro a tao am tamo akmey asa ka tao ji Yeso Kizisto a yamacisidosidong.

⁶ Na ikarilaw yaten ni Ama ta do to a nimanta nyaten so meykataretarek a teneteneng ta. Am ori o pangozayan ta do teneteneng ta a nitoro na jyaten ni Ama ta do to a somidong so akma tey kakteh do cinai. No teneteneng a mangononong so ciriciring na o nitoro na jyaten am pangozayan ta o nakenakem ta si Ama ta do to a mangononong so ciriciring na.

⁷ No panidongan ta o na nitoro jyaten am manidong ta so tao an. No na nitoro jyaten o ikateneng ta mangnanao am mangnanao ta so tao an.

⁸ No manvavaga o nitoro na jyaten am vavagan ta o icyatatao ta an. No mazonos o nitoro na jyaten am ji ta mangbeywan do icyatatao ta an. O meypanirsirngen am ji maciziziknai o vazay an. No mangarilaw so tao am masaray onowned.

⁹ Beken a hapet no onowned o ipangarilaw so tao. Ji nyo akzan o marahet a vazay, ta o kahap nyo so apiya vazay.

¹⁰ Masicyakarilaw kamo an. Ta inyo rana am akmey meyketeketeh kamo do tangain na ni Kizisto. So ipasikakanig nyo.

¹¹ Taosya o malma, ta kowyat nyo a meyvazay. Ahapen nyo o makdeng a nakenakem nyo a omahap so vazay na ni Ama ta do to.

¹² Masaray kamo a omnanala so na itoro jinyo ni Ama ta do to. Tana amyan so alalaw nyo am ji kamo ahayo a meynozi ji Ama ta do to.

¹³ Sidongen nyo sira o makasi a tao a akma nyoy kakteh do cinai. Taotawwen nyo sira o minangilili a tao.

¹⁴ Ipeynozi nyo sira o mapakakasi jinyo a tao. Ji nyo manircirngi sira o macioya jinyo a tao.

¹⁵ Macikasaray kamo do somaray a tao. Macikalavi kamo do amlavi a tao.

¹⁶ Peyyangangain nyo o tao a sidongen. Ji nyo pahama o nakenakem nyo, ta pehbowen nyo o nakem nyo. Ji kamo mapakateneteneng.

¹⁷ Ji kamo mapatongtonggal. O ipanci no tao apiya vazay am ahapen nyo a peyvazain.

¹⁸ Makapya kamo so nakenakem do icyatatao nyo.

¹⁹ Ji nyo to meyneynakman o kapatonggal nyo do amwoya ninyo a tao, manga keypong. Cyaha, ta si Ama ta do to o mapasapa do dang. Ta maniring do Seysyo am, “Yaken o mapasapa do oyaoyyan da ninyo. Yaken o mapeyvazay so amwoya ninyo.” Ori rana am ciring na no Panirsirngen ta.

²⁰ Maniring pa do Seysyo am, “No makcin o kavosoyan nyo am pakanen nyo sira. No mawaw sira am peyyopen nyo sira. Si akman kamo sang am to sira nasnek a manig ninyo.”

²¹ O marahet a vazay da jimo no tao am ji mo rata. Ta o apiya ahahapan mo sya am itovis mo do marahet a vazay da.