Loma 11 - Seysyo No Tao

Aryarilaw na ni Ama ta do to so Isedi a tao

¹ To ko na macitangain jinyo am manngwa, nitaosya na sira ni Ama ta do to o nipamnekan na tao? Jyabo a. Ta yaken rana am Isedi a tao ko a sivovoong na ni Apolahan a macitetngehan ji Penyaming.

² Na jya nitaosya ni Ama ta do to o nipamnekan na pa tao no kakwa. Nyo jyatenngi o ciring do Seysyo? No karaherahet na so Isedi a tao ni Idiya do tangain na ni Ama ta do to am,

³ maniring am, “Mo Panirsirngen, niwakwak da o panoyonoywan mo so ciring a tao a da kasokasokab so patatanangan so nakem da jimo. So yako ikasa ka tao rana. Am da pa naknakmen yaken a yawakwaken.”

⁴ Tovisan na ni Ama ta do to am, “Yapito a ranaw (7000) pa sira o yako nivezed a omanoyong jyaken. Sira rana am ji sira pa nimanaralay so malas a iraralay da a ngaranan da Paar.”

^5-6 Yakman sang sicyaikwaya do Isedi a tao. Ta yana nipamnekan ni Ama ta do to sira o yapereh a tao. Na pangozayan o pangangasyan na a yamamnek do tao. So ikabeken a apya icicirawat da no yana pangozayan. No si manoyong o kapangozay na do apya icicirawat no tao am malas o pangangasyan na.

⁷ Am ori o ji da makahapi sya no Isedi a tao so kakzeben da no nakem. Ta o nipamnekan na ni Ama ta do to am ori o nivonas na so raraten a kabnek na sira abo so raraten do tangain na, ta nipeyhanhan da si Yeso Kizisto. Am o karwan no tao am to da nazibwan o pangangasyan na ni Ama ta do to.

⁸ Akman so ciring na do Seysyo. Maniring am, “To na macyocyozai rana sira ni Ama ta do to a ji mamlis so onowned a mangay sicyaikwaya. So yada icyakmey mavota, yakmey mateleh.”

⁹ O mina ciring na pa ni Tawey am, “Inaoy no si ipeyparahet da o yada pamarmarngan so kanen. Inaoy no si meydedna jira o oyaoya na ni Ama ta do to.

¹⁰ Inaoy no si masari o citahen da kaji da rana makacittan, kaji da rana makatankan a alpiden no alalaw da a mangay no makwa.”

¹¹ Am o yako ipacici jinyo am manngwa, to sira na nakeb o tao do Yotay a ji na ngapa rana ni Ama ta do to? Jyabo kakman na sang a. Ta sicyaikwaya am na avyain o beken a tao do Yotay. So kaoyyan da nira ikeynanahet no tao do Yotay a kablis da rana so onowned da a omanoyong rana ji Ama ta do to.

¹² Yada nipeypapya no tao do karawan o da kajya niomanoyngan ji Ama ta do to no tao do Yotay. Am no si mamlis rana sira o tao do Yotay a kavyay na sira ni Ama ta do to am jyabo kaji na rakorakwan pa no peypapyan na so tao do karawan a.

Ahapen na o beken a tao do Yotay ni Ama ta do to

¹³ Yako pacisirsirngan inyo a beken a tao do Yotay. Yako tey masaray a nipamnekan ni Yeso Kizisto a omlivolivon no Mapasaray a Ciriciring na ni Ama ta do to jinyo a beken a tao do Yotay.

¹⁴ Ala ikeynanahet da yaken no tao do Yotay a kasina ko no inawan. Am cyaha, ta ipakasidong na so karwan da a kaji na meydednan jira no peyoyaoyyan na ni Ama ta do to.

¹⁵ Ta peymakarwan na sira o tao do Yotay a kahap na so beken a tao do Yotay. Am si ahapen na sira o tao do Yotay am jyabo kaji da narayan a makahap rana so to meyyonong a ikavyay no pahad da.

¹⁶ Ta nipamnekan na si Apolahan ni Ama ta do to. So ikakman da sang no sivosivovoong na nipamnekan na ni Ama ta do to. Akman so kayo. Ta no mavyay o yamot na am mavyay o kayo na kano yangayangaw na.

¹⁷ O tao do Yotay am sira akman so kayo a meyngaran so kanlan a polcingen a kangay mapatolang so yangaw no jya nimowa kanlan. Inyo rana beken a tao do Yotay am kapalangayan nyo o yajya nipamowa kanlan. So yanyo ipacizanod do tao do Yotay a na ikarilaw ni Ama ta do to.

¹⁸ Am ji nyo ngolala o yangaw na a nimapolcing, ta kapalangayan nyo o yangaw ang. So ji nyo mapazwai so kataotao nyo, ta beken a inyo o yapwan no pamnowan no kayo. Ta o yamot na am ori na ilida.

¹⁹ Ala no maniring ka am, “O yapolcingan so yangaw na no nipamowa a kanlan am yaken o da patolangen do dang.”

²⁰ Jyabo na kalalasan no ciring nyo a. O yada polcingan sya am sira ji manganoyong o tao do Yotay. Inyo am apya kamo, ta kamo manganoyong. Am ko ipanci jinyo am ji kamo mapahama so nakenakem an. Ta manginanawa kamo.

²¹ Kakwakwan no tao do Yotay a meyngongyod akmey yangaw no kayo a na ji ingbeywani am ney manngo kamo, ta jyabo kabeywan na jinyo a, do nyo kaji manganoyngan.

²² Naknakmen nyo pala si Ama ta do to. Ta yamyan so pangangasyan na. Yamyan so peyoyaoyyan na. O meyraraten a tao am manoyong kaoya na nira. Am inyo am na ikasi. Am ori o ji nyo ngaroi do pangangasyan na ni Ama ta do to. Ta akman kamo so yangaw no kayo a polcingen na.

²³ No si mamlis sira o tao do Yotay a omanoyong ji Yeso am ori rana o paolyan na sira do nikapolcingan da kayo. Ta mowwamek ori ji Ama ta do to a vazay na.

²⁴ Inyo rana beken a tao do Yotay am yakamo akmey yangaw no yajya nipamowa a kayo do kahasan a nimapolcing a yada kapatolang sya do nimowa kayo. Am sira akmey nipamowa kayo o tao do Yotay. Kakwakwan nyo a na patolangen a yamacitarek a yangaw no kayo am imanngo sira o tao do Yotay. Jyabo kaji na patolangan pa sira do kayo ori a.

Yato meyzangkap o pangangasyan na ni Ama ta do to do peycyamahamahatawan na

²⁵ Manga kakteh, inaoy no si katenngan nyo na o vazay na ni Ama ta do to a ji nipatwaw no kakwa. So ji nyo mapakarangi so nakem nyo. Ta beken a todamimin o Isedi a tao a ji mamlis, ta yana pananalahen ni Ama ta do to o karwan no beken a tao do Yotay a omanod jya.

²⁶ So ikamimin da no Isedi a tao ahapen na ni Ama ta do to. Ta maniring do Seysyo am, “Amyan so mai apo do Sian a mapatazadang jinyo do teyngato. Iya rana am vonasen na o raraten da no tao do Yotay a sivosivovoong na ni Yakebo.

²⁷ No si marateng rana o araraw am pangononongan ko o ciring ko a amvonas so raraten da.”

²⁸ Da nitaosya no tao do Yotay o Mapasaray a Ciriciring na ni Ama ta do to. Am ori o na likodan jira ni Ama ta do to a na katoro nya jinyo a beken a tao do Yotay so na pangangasyan ni Ama ta do to. Am meykongwen o pamnemnekan na ni Ama ta do to a marilaw sira. Ta akman sang o aryarilaw na sira so ineynapo da no kakwa pa.

²⁹ Ta jyablis o nakenakem na ni Ama ta do to a marilaw no nipamnekan na tao.

³⁰ No kakwa am ji nyo ngonoci si Ama ta do to a beken a tao do Yotay. Am nyo na mahap o pangangasyan na ni Ama ta do to. Ta da ji ngonoci si Ama ta do to no tao do Yotay.

³¹ Akman sang sira o tao do Yotay. Tana ji da nganoyngi si Ama ta do to sicyaikwaya am mahap da o pangangasyan na no makwa.

³² Nakenakem na ni Ama ta do to o kamimin no tao do karawan a makateneng do da peyraratenan. Ta ori o ipakateneng da do pangangasyan na.

Isaray si Ama ta do to

³³ Yatey rako o pangangasyan na ni Ama ta do to. Ta yabo o makahap so teneteneng na. Sino makapatak no ahahapan na sya ni Ama ta do to. Sino makateneng do vazay na.

³⁴ Maniring do Seysyo am, “Sino makateneng do onowned na ni Ama ta do to. Sino makayokod nya tao.”

³⁵ “Sino niomazaw sya so paolyan na jya.”

³⁶ Ta yamamimin o makakaday a yana nyamamaog. So ika iya na no tomalamozong no makakaday do karawan. Inaoy no si mangay jya o azwazway na mangay do kaidan no karawan. Amin.