Loma 1 - Seysyo No Tao

¹ Yaken rana am si Pawlo ko a lamlamsoy ni Yeso Kizisto. Na nipamnekan yaken ni Yeso Kizisto a amlivolivon no Mapasaray a Ciriciring na ni Ama ta do to.

^2-3 O Mapasaray a Ciriciring na ni Ama ta do to am nipatwaw da no panoyonoywan na so ciring na do nivatvatkan da Seysyo no kakwa pa a omagaz do Anak na si Yeso Kizisto a Panirsirngen ta. No hapen do itetngehan ta do tao am iya o sivovoong na ni Tawey.

⁴ No hapen do ka Tao do to na am iya o nipeyvangon na ni Ama ta do to a nimapo do heseb na. So ikanoyong na Anak na ni Ama ta do to.

⁵ Am ori o ko pangozayan do ngaran na a yamahap so vazay na yamapanop so tao a yaomanoyong ji Yeso Kizisto do peycyamahamahatawan na,

⁶ a pacizanodan nyo a tao do Loma a yana nipamnekan ni Ama ta do to a italamozong na ni Yeso Kizisto.

⁷ Am ori o yako peyteygamyan ninyo a na tey karilaw ni Ama ta do to a tao do Loma a yamanoyong a na italamozong ni Ama ta do to. Inaoy si itoro na o pangangarilawan na kano ikapiya no onowned nyo ni Ama ta do to a kani Yeso Kizisto a Panirsirngen ta.

Sarasaray na kano inozi na ni Pawlo

⁸ Ney manma na am ko isaray ji Ama ta do to si Yeso Kizisto, ta o nyo peyhanhanan nya am yada rana peyrengarengayan no tao do peycyamahamahatawan na.

⁹ Na katenngan ni Ama ta do to o ko kasangib a yameynozi ninyo, do yako ikowyat a yamahap so vazay na yameylimwang no Mapasaray a Ciriciring no Anak na.

¹⁰ Ko jimtad a yameynozi ji Ama ta do to do kapeypalanginan na nyaken. So yangay ko jinyo do dang.

¹¹ Inaoy si macita ko inyo a kananao ko jinyo a kowyat nyo na meyhanhan ni Ama ta do to, do kasidong na jinyo no Seyzi.

¹² Ala apyapya o kapanci ko no kapasipayyait ta so onowned ji Ama ta do to.

¹³ Yako masangib a yamnakenakem so yako kangay jinyo manga kakteh. Am na katey aro no yamzazat jyaken. Am ori o ko jyangai jinyo do dang. Ta ko ikakza inyo a nanawen a kapeyparo da no tao a omanoyong ji Yeso Kizisto do dang, akman so niomanod a beken a tao do Yotay no keyyan ko pa do ili da no beken a tao do Yotay.

¹⁴ Tana ko macizavoz do meykataretarek a tao am meyyangangay sira ori a yako sidongen no Ciriciring na ni Ama ta do to.

¹⁵ Am ori o ko ikakman sang a yamakza no kapeylimwang no Mapasaray a Ciriciring na ni Ama ta do to jinyo a yameyili do Loma a tao.

Oyowyat no Mapasaray a Ciriciring na ni Ama ta do to

¹⁶ Ko ipeyhanhan o Mapasaray a Ciriciring na ni Ama ta do to. Ta ori rana am oyowyat na ni Ama ta do to a omahap so omanoyong jya tao do kapyapyan. Oya rana am manmanma a nipeylimwang do tao do Yotay a kapacitonton da no beken a tao do Yotay.

¹⁷ Ta o Mapasaray a Ciriciring na ni Ama ta do to o ipakateneng ta do kabnek na jyaten ni Ama ta do to a abo so raraten do tangain na. O yapwan na no nya am amyapo do kapeyhanhan ta nya. Ta maniring do Seysyo am, “O tao rana a abneken na ni Ama ta do to a abo so raraten do tangain na am mahap da o to meyyonong a ikavyay no pahad da.”

Raraten no tao do karawan

¹⁸ Nipaziman na rana ni Ama ta do to o rako a oyaoyyan na no meyraraten a tao a kano ji raralay nya tao. O raraten no tao am ori o yambonbon do yamanoyong a nanao na ni Ama ta do to.

¹⁹ Pasingsingtan na sira ni Ama ta do to, ta nipaziman na rana ni Ama ta do to o vazay na do tangain da. So da ipakateneng rana jya.

²⁰ Yajyacita si Ama ta do to. Am nimakalapo no kamamaog na so karawan o kaji na ablisan no ka Tao do to na. Ta apo do nyamamaog na o ipakateneng jya Tao do to arako so oyowyat. So ikabo no tao a omalalas jya.

²¹ Am tana da katenngan si Ama ta do to am da ji raralayan, da ji narayan o aryarilaw na sira. So da icyakmey yamavota so onowned a yaji makateneng ji Ama ta do to.

²² Sira mapakateneteneng. Am jyakman sang, ta yabwata da katatenngan.

²³ Da ji raralayan o yato meyyonong a Tao do to. Da iraralay o da nipariparing a yakmey taotao a kano meyyasasalap a kano omalalam a kano makakaday a nipariparing da.

²⁴ Am ori o to na rana macyozai ni Ama ta do to do onowned da a mapeyvazay so macimasesnek a raraten da.

²⁵ Da peymakarwan o manoyong a nanao na ni Ama ta do to a da kahap so malas a nanao amraralay no masaod no karawan a nyamamaog na ni Ama ta do to, a ji raralay no manoyong a Tao do to a nimangamamaog so makakaday. So ika si Ama ta do to na no to meyyonong a iraralay ta. Amin.

²⁶ O akman sang a vazay da am to na macipanadngi ni Ama ta do to o onowned da a somagpyan. Ta o mavakes rana am mangzakza sira so kehngehngay da no kolit.

²⁷ Sira akman sang o mahakay, ta da jyakzan o kapacitovong da do mavakes, ta ikeykakza da pa o kapacitovong da do icyamahakay da. Am ori o ipeydedna na jira no peyoyaoyyan na ni Ama ta do to a ingingnen no kataotao da.

²⁸ Ji da ranakzan no tao o manoyong a nanao na ni Ama ta do to. Am ori o to na rana macipanadngi do onowned da a meyparahet a mapeyvazay so makararahet a vazay.

²⁹ Yamakakaday o raraten do onowned da akman so mangagom, manginanahet, manwakwak so tao, mapatongtonggal, mangalalas a kano mangamaog no tao so ciring.

³⁰ Sira macitamtamwad. Da pacioyyan si Ama ta do to. Da pasnesneken o kadwan jira. Da pazwain o kataotao da. Sira manrahet so aktokto a yameyraraten. Da jyaglawan o inyapwan da.

³¹ Sya akmey yabo so nakenakem. Da alalasan o mina ciring da. Yabo pangangarilawan da.

³² Tana katenngan da si Ama ta do to a amwoya no akman so sang a vazay am da jyamamman, ta da ikeykavevek a yamanara so tao a akman sira so vazay.