Locya 9 - Seysyo No Tao

Tovoin na sira o macinanao jya ni Yeso

¹ Lovoten na ni Yeso sira o rarwa so ikakarwan a macinanao jya kapanta na nira so oyowyat da ipamozwaw da so kalamsoyan ni Satan a kano ipangiwakwak da so meykeyngeyngen a tao,

² katovoy na sira mangay a meylimwang no ciriciring na do katalamozong na nyaten ni Ama ta do to a kapangiwakwak da so meyngen a tao.

³ Maniring jira am, “No mangay kamo na am ji kamo meyyaomas. Ji kamo mapalolo so sisikod nyo a kano kanen nyo a kano nizpi nyo an. Ji nyo peytapila o ayob nyo.

⁴ No somdep kamo do asa ka vahay am to kamo na ngiseysan do dang an, mangay do ikaro nyo na jira.

⁵ No ji da naotawwa inyo am karwan nyo o ili da katoktok nyo so tana do ai nyo. Ta itovil nyo jira meyraraten a tao a ji mamlis so nakenakem.”

⁶ So nyangay da omlivolivon do peycyeylilyan na a meylimwang no Mapasaray a Ciriciring na ni Ama ta do to a kapangiwakwak da so ingingnen no tao.

No ikarahet na no aktokto na ni Helote

⁷ Mamizing no panirsirngen no Cyadidi a meyngaran si Helote o aro a vazay ni Yeso am marahet o onowned na. Ta ji na tenngi o kapwan na no vazay na ni Yeso. Ta patolinen da si Yeso ji Yowani a nimirwa a mavyay.

⁸ Amyan so tao a manci nya si Idiya a nimai. So iyan no tao a manci no kanimavyay no asa ka panoyonoywan na so ciring ni Ama ta do to no kakwa pa.

⁹ Maniring si Helote am, “Jyabo ka si Yowani na. Nipotowan ko na o oo na asyoo. Sinosino tao ang. Asyo o aro a vazay na paha.” Am ori o to na naknakmi so kapakacita na sya.

Nibsoy na ni Yeso o kakaliman a ranaw (5000) a tao

¹⁰ No kapeysinaoli da no rarwa so ikakarwan a nipamnekan na ni Yeso a amlivolivon no ciriciring na am kakadain da o mina vazay da ipanci jya, kapalolo na sira ni Yeso a komaro do dang a kangay na nira do asa ka ili a meyngaran so Peysayta.

¹¹ Katenngan da no aro a tao am macihza sira mangay. So nirapongan na sira ni Yeso kapanci na nya so katalamozong na nyaten ni Ama ta do to a kapangiwakwak na so aro a meykeyngeyngen a tao.

¹² Somipsip o araw am mangay o rarwa so ikakarwan do tangain ni Yeso. Maniring sira jya am, “To ta na mancyan o aro a tao a mangay an, kangay da meykala do ili so kanen da kano isanan da. Ikongo to ta kamet a ipakan ta sira do takey eya.”

¹³ Maniring si Yeso jira am, “Pantan kamo sira so kanen da.” Maniring sira ji Yeso am, “Yalima ka myanpaw a kano yadwa ka among o yamyan jyamen. Manngwa, apyapya kangay namen manazang no aro a tao eya so kanen da?”

¹⁴ O mahakay rana no kano nang am kakaliman sira ranaw (5000). Maniring do macinanao jya am, “Peykalyalipenpenen nyo sira palisnahen. Kakaliman (50) sira o teyhesa ka lipenpenan.”

¹⁵ So nionotan da do ciring na no macinanao jya. So nilisna da rana no aro a tao.

¹⁶ Meyratateng am ahapen na rana o alima ka myanpaw a kano adwa ka among a katangara na so hanit a kasaray na nya ji Ama ta do to a kakcikcil na sya patodahen do macinanao jya kavonong da rana sya do aro a tao.

¹⁷ Ori o nikamimin da rana nimabsoy. Peysinsinmowen da rana no macinanao jya o nimapanpan am adwa o ikarwa na no ka yalayala na.

Kasingkadan ni Pite si Yeso a Kizisto

¹⁸ Ipisa maveyvow si Yeso a meynozi am mangay da citahen no macinanao jya. Maniring si Yeso jira am, “Sino kwan da yaken no aro a tao.”

¹⁹ Maniring sira am, “Yamyan so tao a manci nimo a nimanaktak a si Yowani. Yamyan so yamanci nimo a si Idiya. Yamyan so manci nimo a nimirwa mavyay a panoyonoywan na so ciring ni Ama ta do to no kakwa pa.”

²⁰ Maniring jira si Yeso am, “Manngo kamo. Sino kwan nyo yaken.” Maniring si Pite am, “Imo rana am Kizisto ka apo ji Ama ta do to.”

²¹ O nipakoyokoy na pa jira am, “Ji nyo meycicicyan o akman sang a vazay do tao an.”

Ciring na ni Yeso do alalaw na kano kawakwak na

²² Maniring pa jira am, “Yamai o aro alalaw ko a Nipamnekan na ni Ama ta do to an, a peymakarwan da no kamanrarakehan a kano kabedbedan da rana panipanirsirngen no mapatanatanang so nakem da si Ama ta do to a kano mangnanao so iwawalam ni Ama ta do to a tao a kawakwak da rana jyaken. Am ikatlo na araw am mirwa ko a mavyay.”

²³ Maniring pa jira si Yeso am, “No myan so tao a macilolo jyaken am to na pangawawan o kataotao na somabway no jyojika na a macihza jyaken. Tana wakwaken da am cyaha, ta o akman rana sang a tao am manoyong a omonot jyaken.

²⁴ Ta o tao a makza no kasaray na do karawan am beken a ikapya na ori. Am o to ngawaw pa no kataotao na a mahap so vazay ko am mahap na o to meyyonong a ikavyay no pahad na.

²⁵ Tana abwata ji ngyangyan jinyo a makadpeh jinyo a tao do karawan, a kangay no pahad nyo do kararatan am ikongo angangayan na no nang.

²⁶ No myan so macimanig nyaken a kano ciring ko am no meysinaoli ko a Nipamnekan na ni Ama ta do to a macihza do azwazway ni Ama ta do to a kano aro a tinsi am abo nakenakem ko sya.

²⁷ Ko pa ipanci jinyo am inyo rana yameytatanek do jya am amyan jinyo so makapis pa so sang a mavyay pa tao. So ipakacittan nyo so talamozongan na ninyo ni Ama ta do to.”

Nimablis o keyteytawan na ni Yeso

²⁸ Ikawao na araw no nipancyan na no aro a ciriciring am palolwen na si Pite a kani Yowani a kani Yake a mangay do tokon a meynozi.

²⁹ Meynozi si Yeso am todablis o keyteytawan na. So mina to na lavangi a maniray so ayob.

³⁰ Meyratateng am meyhekas o rarwa ka tao a macisirsiring jya. Sira rana o rarwa am si Moyse a kani Idiya,

³¹ nimablis so keyteytawan. Ipeysirsiring da kani Yeso o kawakwak na do Yelosaleng a mapakavos so nitoro na jya ni Ama ta do to a vazay na.

³² Si Pite a kano kararay na am makapya sira mitkeh. Mayokay sira am macita da si Yeso a kano rarwa a meytatanek a macitazing jya a mablis so keyteytawan.

³³ To da ji ngaroi si Yeso no rarwa ori am maniring si Pite ji Yeso am, “Mo Mangnanao, tanyo tey yapya do jya. So ipamaring namen so atlo a ka sarwap, asa imo, asa si Moyse, asa si Idiya.” Akmey ji na onongi o ipanci na ciring.

³⁴ Ji pa ngavos o ciring na am amyan so asa ka cinalab a ombengbeng sira. So nikanyahey da Pite.

³⁵ Meyratateng am amyan so ciriciring do cinalab a manci no, “Iya rana am nipamnekan ko Anak ko. So amizngan nyo sya an.”

³⁶ Amizngen da o ciring ori am si Yeso o macita da asa ka tao. Do araraw no nang am ji da meycicicyan o nimacita da vazay do tao.

Nivozwaw na ni Yeso o komovot do kanakan a kalamsoyan ni Satan

³⁷ Ikadwa na araw am omosok sira apo do tokon. So nirapongan da sya no aro a tao.

³⁸ Meyratateng am amyan dang so asa ka tao amlololos. Maniring am, “Mo Mangnanao, ikasi mo pa o anak ko an. Ta iya rana am yako veyvowen a anak ko.

³⁹ Yamasangib ori a na kovotan no kalamsoyan ni Satan. Ori o to na lololosi a mamezamezay a meyotaotab so ngongoy. Ji na ngaroi no kalamsoyan ni Satan. So to na makasii a meyzaza so kataotao.

⁴⁰ Nipanci ko o macinanao jimo a omvozwaw sya am da jyavozwaw.”

⁴¹ Maniring si Yeso am, “Ikongo nyo ji meyhanhani ni Ama ta do to. Akman rana so wanjin o kownownay ko a macikaop jinyo. Akman ko rana so wanjin a marilaw ninyo.” Maniring do tao ori am, “Ayyan o anak mo do jya.”

⁴² Makaranes o anak na am paleklekteken na no kalamsoyan ni Satan a kapamezamezay na. Ori o nioyyan na nya ni Yeso so kalamsoyan ni Satan. Am ori o nikapya na rana no kanakan a katoro na rana nya do ama na.

⁴³ Am ori o nisavasavakan da no oyowyat na ni Ama ta do to no aro a tao. Isavasavak da o mina vazay ni Yeso. So niyan no ciring na do macinanao jya.

Ciring na ni Yeso do omanam a ikawakwak na

⁴⁴ Maniring am, “Ji nyo ngawawan o ipanci ko a ciring an. Yaken rana a Nipamnekan na ni Ama ta do to am makeykai da yaken a itoro do macioya jyaken an.”

⁴⁵ Am ji da tenngi o peypeypangayan no ciriciring na, ta masalit o ayyaingan na. Am ori o ji da makatenngi jya. Am ji dadkeci a ipanahes o peypeypangayan no nipanci na vazay.

Sino o pakarakehan a tao

⁴⁶ Ikazyak da no macinanao jya sino jira o pakarakehen a tao.

⁴⁷ Katenngan na ni Yeso o nakenakem da. Am ori o nipancyan na no asa ka kanakan a mai, kapanci na nya meytatanek do katangked na.

⁴⁸ Maniring jira am, “O mahap so vazay ko a tomaotao so kanakan eya am yaken an o taotawwen da an. O tomaotao jyaken am akma dey taotawwen o nitomovoy jyaken an. Sino paro jinyo o to mapownot so nakenakem na mangarilaw so icyatatao na. Ta ori o pakarakehen a tao.”

Amrahet sya kano macyanod jya

⁴⁹ Maniring si Yowani ji Yeso am, “Mo Mangnanao, namen nimakacita so tao a mamozwaw no ngaran mo so kalamsoyan ni Satan am namen nizazatan. Ta beken a kararay namen ori.”

⁵⁰ Maniring si Yeso am, “Ji nyo oyyan an. Ta o ji rahet jinyo am macyanod jinyo.”

Ji naotao si Yeso a tao do asa ka ili

⁵¹ Makeykai rana o kapeysinaoli na ni Yeso do teyngato am ji na ngaolii o kangay na do Yelosaleng.

⁵² So nitovoyan na so tao a manma mangay do asa ka ili da no Samadiya kapeykala da ni Yeso so itkehan na.

⁵³ Am ji da mya no tao do dang a misan, ta katenngan da si Yeso a meypangay do Yelosaleng.

⁵⁴ Macita da Yake a kani Yowani am ipanci da o, “Mo Panirsirngen, manngwa, apyahen mo yamen a mapakas so apoy do hanit a itemtem sira an?”

⁵⁵ Citahen na pa sira ni Yeso a kaoya na nira.

⁵⁶ So nipeypangay da do matarek a ili.

Macilolo ji Yeso a tao

⁵⁷ Mangonong sira do rarahan am amyan so asa ka tao a manci nya ji Yeso, “O angayan mo am abo ji ko macihzai jimo.”

⁵⁸ Maniring si Yeso jya am, “Amyan so vahay no votdak, amyan so vahay no lapik am yaken a Nipamnekan na ni Ama ta do to a tao am abwata o tangnan ko so oo ko an.”

⁵⁹ Maniring do asa ka tao am, “Macihza ka jyaken an.” Maniring o tao ori am, “Mo Panirsirngen, apyahen mo pa yaken a omonong do inawan ni ama kangay ko macilolo rana jimo an?”

⁶⁰ Maniring si Yeso am, “To mo macipanadngi sira o omonong do nimapoling so peylingalingayan a tao. Am imo rana am apyapya pa kangay mo meylimwang no Mapasaray a Ciriciring do na katalamozong ninyo ni Ama ta do to.”

⁶¹ Maniring pa o asa ka tao am, “Mo Panirsirngen, ko ikakza o kapacilolo ko jimo. Am mangay ko pa taitaiden sira o inyapwan ko an.”

⁶² Maniring si Yeso jya am, “Omhakakaw no baka tao am ji to paolya o mata, ta meycyagilogilo o kowzowzitan na. Akman sang, ta no naknakmen o kapacikaop do italamozong ni Ama ta do to am ji peykarwa o nakenakem jya an.”