Locya 5 - Seysyo No Tao

Nimanma na nipamnekan ni Yeso a macinanao jya

¹ Ipisa am meytatanek si Yeso do pamsan na no rako a meybebneng a ranom a ngaranan da so Kenisale. Am meysilisilin sira o aro a tao a omamizing so ononongan na ciriciring na ni Ama ta do to.

² Meyratateng am macita na o adwa ka vazangay do pamsan na nipeygegcinan no nimangahahap a tao a omoyas do tawaz da.

³ Meyratateng am somakay si Yeso do vazangay na ni Simong a kapanci na nya komaod sya. Am ori o nikaodan na sya a mapahawang sya do pamsan na so alikey. Meyratateng am amlisna si Yeso do vazangay a kananao na sira so aro a tao.

⁴ Iptad na o ciring na am maniring ji Simong am, “Pakarairain mo pa o kaodan mo sya kazoyo nyo no tawaz nyo.”

⁵ Maniring si Simong am, “Mo Mangnanao, namen todazikna yakasahep a yameytawaz am yabwata namen nimamong. Am tana amizngen ko pala o ciring mo amzoyo no tawaz ko.”

⁶ Am ori o nizoywan da rana no tawaz da. So nipakatawaz da so aro among a kaji na pisipisingan rana no tawaz da.

⁷ Am ori o niraran da so kararay da somidong sira. Meyratateng am nipno da o adwa ka vazangay kaji na ranangnedan rana.

⁸ Macita na ori ni Simong Pite am meylilitod do tangain na ni Yeso a manci no, “Mo Panirsirngen, to mo na ngaroi yaken an. Ta ko meyraraten a tao an.”

⁹ Si Simong rana kano kararay na tao am niyak da no mata o nimatawaz da aro among.

¹⁰ O anak ni Sipitay a meyngaran si Yake a kani Yowani am akman sira so sang a omyak nya. Maniring si Yeso ji Simong am, “Ji ka nyahey an, ta papwen mo sicyaraw eya o kakma moy mangahahap a tao a mapanop so aro a tao.”

¹¹ So nipangid da rana kakaro da do aro a ipangahap da a macilolo rana ji Yeso.

Niwakwakan na ni Yeso o omlabyab so kolit a tao

¹² Ipisa si Yeso amyan do asa ka ili am makacita so omlabyab so kolit a tao. Macita na si Yeso am mangay meylilitod do tangain na mapasyasi jya. Maniring am, “No si apyahen mo am jyabo kaji na apyan no kataotao ko a.”

¹³ So niparapongan na so lima na jya ni Yeso a kapanci na no, “Ko apyahen. Apya rana o kataotao mo.” So ji na meyyahahai a nimapya no kolit na.

¹⁴ Pakoyokoin ni Yeso do tao ori am, “Ji mo meycicicyan an. Ta yangay mo ipacita do mapatanatanang so nakem ta si Ama ta do to a tao a kavalivaliw na so kataotao mo a kapangozay mo do iwawalam na ni Moyse a mapatanang so nakem mo ji Ama ta do to. So anoyngan da jimo no tao a nimapya rana so kataotao.”

¹⁵ Meyratateng am ori o nipeylimwang na rana no ngaran na ni Yeso do dang. So nipeylovolovot da no aro a tao a omamizing so nanao na makza no keywakwak do kataotao da.

¹⁶ Am masangib si Yeso a komaro jira mangay a meynozi do kabwan no tao.

Niwakwakan na ni Yeso o ji makapeyvangon a tao

¹⁷ Ipisa mangnanao si Yeso am amyan so makanateng a tao a macyagom do Vadisay a kano mangnanao no iwawalam ni Ama ta do to. Sira rana ori am nimapo sira do Yelosaleng a kado peycyeylilyan na do Cyadidi a kado Yotay. Ikongo do nioyatan na ni Ama ta do to si Yeso, am ori o nipangiwakwak na so meykeyngeyngen a tao.

¹⁸ Amyan so nyai da a ji makapeyvangon a tao do ireyrayan na. So vovwan da jya isdep do tangain na ni Yeso.

¹⁹ Ikongo do tey yaro tao, am ori o ji da makasdepi nya. Meyratateng am to da rana ngalatan do atep no vahay a kakabkab da so atep na katonton da sya pazomtaden do tangain na ni Yeso.

²⁰ Makazazap na ni Yeso o onowned da a omanoyong jya. Am ori o nipancyan na nya jya so, “Imo rana am yarana nimavonas o raraten mo.”

²¹ Am ori o nikazyakan da nya no tao a macyagom do Vadisay a kano mangnanao no iwawalam ni Ama ta do to. So nipancyan da no, “Sinosino o tao eya a yato nazovaz si Ama ta do to. Ta si Ama ta do to saon o makavonas so raraten no tao.”

²² Katenngan na ni Yeso o nakenakem da. Am ori o nipeycirngan na jira so, “Ikongo nyo ikakman sang so nakenakem.

²³ Manngwa, apyapya o kapanci nya do meyngen a tao so, ‘Yanimavonas rana o raraten mo’? No apyapya o kapanci no, ‘Tanek rana kalam mo rana.’

²⁴ Ta ko kakzeben inyo a makateneng do oyowyat ko a Nipamnekan na ni Ama ta do to a tao a makavonas so raraten no tao. So pancyan ko nya do meyngen a tao so, ‘Tanek rana kahap mo so ireyrayan mo a mangay rana do vahay nyo.’ ”

²⁵ So mina to na meytatanki no tao ang do tangain da no aro a tao a kahap na rana so ireyrayan na somaray nya ji Ama ta do to a mangay rana do vahay da.

²⁶ So nipeyzokaban da nya no aro a tao a isaray ji Ama ta do to a manci no, “Sicyaraw rana ya am yanamen nimakacita so yamapeyzokab a vazay.”

Rarahen na ni Yeso o meyngaran si Diwey

²⁷ Makowbot si Yeso am makacita so asa ka mapeyvazay so deyking a tao a meyngaran si Diwey a amlisna do torotorwan no deyking a vahay. Maniring jya am, “Macilolo ka jyaken an.”

²⁸ So nikarwan na rana do vazay na kapacilolo na rana jya.

²⁹ Meyratateng am taotawwen na si Yeso do vahay da. So ikaro no macitovong jira mapeyvazay so deyking a kano karwan no tao a macyakan jira.

³⁰ Ori o nikazyakan da nya no tao a macyagom do Vadisay a kano mangnanao no iwawalam ni Ama ta do to. Am ori o nipancyan da nya do macinanao ji Yeso so, “Ikongo nyo ipacihanghang do mangangap so deyking a kano aro a meyraraten a tao.”

³¹ Maniring si Yeso jira am, “O apiya so kataotao am ji da ngala o koysang an. Ta o meyngen a tao am ori o komala sya.

³² Ta yaken rana am beken a ko manara so ji meyraraten a tao an. Ta vazay ko o kapanci ko no meyraraten a tao a mamlis so nakenakem an.”

Ikazyak da o ji mangakadayan a meynozi

³³ Yamyan so tao a manci nya ji Yeso. Maniring am, “O macinanao ji Yowani am masangib sira ji mangakaday a meynozi. Yakman sang o yamacinanao do tao a macyagom do Vadisay. Am o yamacinanao jimo mo Yeso am yabo da ji nganakanna.”

³⁴ Maniring si Yeso am, “Manngwa, no mamaring sira so kanen o matarek so vahay a tao am ji nyo mya sira o tao da koman? Jyabo kakman na sang a.

³⁵ No marateng rana o araraw na no irakep da so mahakay am, ori rana o ikanoyong da ji mangakaday.”

³⁶ Mangononong pa jira so pehngehngayan na sya so ciring. Maniring am, “Abo o tao a mising so vayo ayob a mangay mapatapang sya do adan na ayob. Ta ikaraherahet na no vayo ayob a mapisipising. Jyabo kapacingay no adan a ayob do vayo a ayob a.

³⁷ Yabo tao a mangap so vayo a potaw cyo a paglowen do adan a niparing a kolit no baka, ta zombak.

³⁸ Am ori an, o paglowan so vayo a potaw cyo do vayo a kolit no baka an.

³⁹ Abo tao a nimyop rana so adan a potaw cyo a keyyop na pa so vayo a potaw cyo. Ta ji na tahamtam o kapyapya pa no adan a potaw cyo.”