Locya 24 - Seysyo No Tao

Meyvangon si Yeso apo do heseb na

¹ Madagdag do niciyo am palolwen da na no mavavakes ang o nipeysinsinmo da mahangno a haneng a mangay do nipakakasan da si Yeso.

² Makaranes sira am to da cita o rako a vato a aneb na a nimalolog.

³ Somdep sira am abo rana o kataotao ni Yeso.

⁴ Naknakmen da o akman sang a vazay am to ngyan so rarwa ka tinsi a maniray so ayob a meytatanek do katangked da.

⁵ So nikanyahey da ambengbeng so moing da. Maniring o rarwa ka tinsi jira am, “Ikongo nyo ipeykala so mavyay a tao do yanan no nimawakwak a tao.

⁶ Yaji ngyan do jya, ta yana nimavyay. Naknakmen nyo an o mina ciring na jinyo do Cyadidi an. Ta maniring asyo am,

⁷ ‘Iya rana am itoro da do lima no ji manaralay a tao a kapadket da sya do jyojika a kavyay na rana do ikatlo na araw.’ ”

⁸ Am ori o nipakanakman da rana sya no mavavakes so mina ciring na ni Yeso,

⁹ a kakaro da rana do dang a mangay manci nya do asa so ikakarwan a macinanao ji Yeso a kano aro a tao so nimacita da vazay.

¹⁰ O ngarangaran da no mavavakes am Matelyan Madiya kani Yeanna kano ina na ni Yake a meyngaran si Madiya kano karwan da mavakes.

¹¹ Am o mina ciring da jira no mavavakes am ji da nganoyngi no nipamnekan na ni Yeso a omlivolivon no ciriciring na, ta ala da to ngamaoga a ciring, kwan da.

¹² Si Pite am mina to malalayo a mangay do nipakakasan da sya a kapeylologod na tomita sya. Am o nivaovaod da rana sya milakayob o nimacita na. Am ori o nioli na a somavasavak no nimacita na vazay.

Mapacita si Yeso do rarwa ka tao

¹³ Do araraw no kano nang am amyan so rarwa ka tao a meypangay do asa ka ili. O ngaran no ili ori am Imao. O karairai na no ili ori do Yelosaleng am atlo a ka vatvatek o yalam sya.

¹⁴ Sira rana ori do nyalaman da am malavat da o mina vazay do araraw no nang.

¹⁵ Kapyahen da meysirisiring am macisngen si Yeso jira a kapacihza na jira omalam.

¹⁶ Macita da si Yeso am ji da na tovili.

¹⁷ Maniring jira am, “Ikongo nyo malavat ang.” Mamizing da am mina to neyked sira a marahet nya so onowned.

¹⁸ O asa ka tao jira meyngaran so Kelopa a mapacici si Yeso. Maniring am, “Manngwa, mo pa jya nimamizing o vazay do Yelosaleng a yamiseysan do dang?”

¹⁹ Maniring si Yeso am, “Ikongo a vazay.” Maniring sira am, “Vazay na ni Yeso a tao do Nasale. Iya rana am panoyonoywan na so ciring ni Ama ta do to, tey mowyat so ciriciring do tangain ni Ama ta do to a kano aro a tao.

²⁰ Iya rana ori am da todey ngapa no panipanirsirngen no mapatanatanang so nakem ta si Ama ta do to a kano aro a panipanirsirngen a wakwaken a kapadket da rana sya do jyojika.

²¹ Namen nipanci ya a nimai a mapatastas so Isedi a tao. Am yajyakman sang, ta ikatlo na araw ya no akman sang a vazay.

²² Da nipaogto yamen no yamakanateng a mavavakes, ta sira niomhep a yanimangay do nipakakasan da sya.

²³ Am yada jya nimacita do dang o kataotao na. Am ori o da nipeysinaoli a manci no, ‘Yamyan so namen nimacita a tinsi, na kapanci nya jyamen so na kanimavyay rana ni Yeso.’

²⁴ Yamangay sira o karwan jyamen do nipakakasan da sya a tomita sya am yajyalas o ciring da no mavavakes, ta yabo rana si Yeso.”

²⁵ Maniring si Yeso jira am, “Manoyong kamo a yajyateteneng a tao an. Ta ikongo nyo ji nganoyngi do ciring da no panoyonoywan na so ciring ni Ama ta do to no kakwa.

²⁶ Manngwa, nyo jyatenngi o kangay no akman sang a alalaw no Misayya a kai na rana no azwazway na?”

²⁷ Meyratateng am pangozayan na o nivatvatkan ni Moyse a kano panoyonoywan na so ciring ni Ama ta do to a kaononong na rana do mina ciring da sya do Seysyo a omagaz do kataotao na.

²⁸ Masngen rana kapakaranes da do angayan da a ili am to mangonong pa si Yeso.

²⁹ Meyratateng am ipanci da si Yeso a macisan jira, ta makeykai rana o kahep na. Am ori o nionotan na jira ni Yeso.

³⁰ Amhezsad a macihanghang jira si Yeso am ahapen na o myanpaw kasaray na nya ji Ama ta do to a kapeyketeb na sya a itoro na jira.

³¹ Meyratateng am mina todeywangi o mata da. Am ori o nipakasingkadan da ji Yeso. Am todabo rana si Yeso.

³² Maniring sira do kadwan jira am, “Yanimacisirsiring jyaten do ta pangonongan a na kapangononong jyaten so Seysyo no kano nang am ta mina todeyrasi so onowned a yamasaray a omamizing sya!”

³³ So nikakeykai da nimeysinaoli do Yelosaleng. Makaranes sira do dang am macita da o asa so ikakarwan a macinanao ji Yeso a kano aro a kararay da a malovot do dang,

³⁴ a makalavat so kanoyong ni Yeso a nimeyvangon rana a kanimapacita na rana ji Simong.

³⁵ O rarwa ori am malavat da o mina vazay da do rarahan no kapeypangay da do Imao a kapakalavat da so kanimapeyketeb na ni Yeso so myanpaw a itoro na jira. Am ori o nipakatovilan da rana jya. Ori o mina ciring da do aro a tao no rarwa ori.

Mapacita si Yeso do macinanao jya

³⁶ Malavat da o aro a vazay am to meytatanek si Yeso do tangain da a manci nya jira so, “Kokay kamo.”

³⁷ Am ori o niogtwan da nya a mapatolin sya do anito.

³⁸ Maniring si Yeso jira am, “Ikongo nyo ikanyahey a ji meyhanhan nyaken.

³⁹ Cittey kamo o lima ko a kano ai ko so ika yaken na. Beken a kadwan. Pinaney kamo yaken. Ori o ipakateneng nyo jya, ta ji sira meyyasisi. Ji sira meytotowang o anito. Cittey kamo. Ta yamyan so asisi ko a kano totowang ko!”

⁴⁰ Meyratateng am ipacita na jira o lima na kano ai na.

⁴¹ Am katenngan da o kasaray da am ipeyzokab da. Am ori o ji da pa nganoyngi jya. So peycirngan na jira so, “Yamyan so kanen nyo do jya?”

⁴² Meyratateng am mangap sira so asa cilad a nisazaban a among a patodahen jya.

⁴³ Todahen na jira kakan na rana sya do tangain da.

⁴⁴ Meyratateng am maniring jira si Yeso am, “O aro a vazay rana ya am nimalavat ko na jinyo no kakwa pa. O nivatvatkan ni Moyse a kano panoyonoywan na so ciring ni Ama ta do to a kano nivatvatkan a Anwanood a yaomagaz jyaken am yarana nimangononong.”

⁴⁵ Ori o icyakma dey mababa so nakenakem. So ipakateneng da do Ciriciring no Seysyo.

⁴⁶ Maniring pa jira am, “O nivatvatkan da do Seysyo a ciriciring am amyan so alalaw ni Kizisto. Ikatlo na araw am mirwa pa mavyay.

⁴⁷ Am ori o papwen sya do Yelosaleng a meylimwang no mamlis a kano manvonas so raraten a ciriciring a kangay na do peycyamahamahatawan na.

⁴⁸ Inyo o yongkad no vazay ko a nidomket do Seysyo, do mina kapakacita nyo so akman sya a vazay a nimangononong rana.

⁴⁹ Tovoin ko jinyo o Seyzi a nipanci na a itoro na jinyo ni Ama. Am to kamo ngyan do ili eya amnanala sya mangay no si parawaten na jinyo o oyowyat apo do teyngato.”

Meysinaoli mangay do teyngato si Yeso

⁵⁰ Meyratateng am palolwen na sira ni Yeso a mangay do meyngaran so Potani a ili. Amyan sira do dang am ipanlanlag na sira no lima na.

⁵¹ Ipanlanlag na sira am karwan na rana sira a meycyakavat a mangay do teyngato.

⁵² Ori o niraralayan da nya masasaray so onowned a meysinaoli do Yelosaleng.

⁵³ So nikasangib da rana do rako a panaralayan a omazwazway si Ama ta do to.